跳转到内容

上海历史

出自维基百科,自由个百科全书

上海历史最早可以追溯到距今6000余年前个马家浜泽文化。到泰伯奔吴搭周天子分封后,此地被纳入中原版图。随后个上海,由于气候温润、濒临大海,遂逐渐发展成为盐业个产区之一。东吴立国后,境内发展愈速。到时期,境内勒行政区划高头有了长足进展,出现了独立个县治华亭县。上海作为行政区域名称也出现勒箇一时期。入后,华亭县升格为松江府,上海镇升级为上海县明代,随着上海地区棉纺技术个改进,松江府成为全国主要个棉布生产地而被誉为“衣被天下”。黄浦江成为上海地区最大河流也形成于明代。末,由于第一次鸦片战争个失利,上海成为最早开放个通商口岸之一,也由此开启现代化个进程。至1920年代,上海成为远东首屈一指个国际都会。到1945年以后,内战导致钞票急速贬值弗值铜钿,上海流出150万难民,弗少人拥去香港。后些来中共执政,上海变成功一座工业城市。1978年改革开放后,上海又重新发展,成为中国对外展示个重要窗口之一。

上古时期[编辑]

上海陆地形成于地质史个近期。6000多年前,上海市域内只有西部个青浦、松江、金山三地基本成陆。箇些陆域都属于古太湖淤浅后形成个湖沼(特别是青浦、松江一带)搭湖滨平原。从箇辰光一直到中原西周时代中后期,期间个陆地都形成得非常缓慢,距今3000年前,嘉定、闵行、奉贤三地个西部大部或局部形成。此时,包括市中心区在内其他区域仍处勒海平面之下。

史前时期主要依靠考古发掘来了解当时个人类生活搭文明发展。根据乃朝有个考古成果,上海最早个文明是马家浜文化(距今6000年)。接着是崧泽文化(据今5500年),2004年春季个青浦泽文化墓葬考古发掘中[1],发现了上海最早个人类遗骸。然后是良渚文化(距今4200年),渠个晚期已经相当发达,以玉器最为著名。马家浜-泽-良渚文化,有着传承个关系。良渚文化已经到了原始社会个晚期。良渚文化衰亡得很快,衰落原因假说乃朝主要有:洪水讲法或发展受阻等。

最后是马桥文化(距今3200年)。箇种文化个出土文物较良渚文化相比,数量搭质量侪下降了,而且文化风格上更加受到闽江流域考古文化以搭山东岳石文化(东夷)个影响。

有意思个是,1999年,专家勒拉松江考古个辰光发现广富林文化,发现伊是一個从中原来个人群,约莫距今4000年前到仔太湖流域,勒拉后头几百年里向慢慢融入当地而消失[2]

周到隋末[编辑]

上海春秋属吴越两国边境,战国时期,周元王三年(越王勾践二十四年,公元前473年),越国灭吴,上海地区属越。战国中期,灭越,又归属楚。楚考烈王十五年(公元前248年),战国四公子之一春申君黄歇受封勒吴,上海属于其封地,贯穿现代上海个黄浦江也称春申江,故上海别称为“申”。

秦统一后,置会稽郡勒吴县(治乃朝江苏省苏州市)。乃朝嘉定区西部属于娄县(治乃朝江苏省昆山市东北),乃朝松江县、青浦县搭闵行区冈身以西地区勒由拳县(治乃朝浙江省嘉兴市南)境;乃朝金山区搭奉贤县冈身以西地区属海盐县(治乃朝金山区张堰镇南)。

西汉初期,上海地区曾分属勒楚王韩信、荆王刘贾、吴王刘濞领地。两汉时期归属娄、由拳、海盐3县。三国两晋时期,上海地区分属吴郡娄、嘉兴、海盐3县。东汉建安二十四年(219年),东吴名将陆逊曾被封为华亭侯,是正史第一次出现“华亭”地名,也往往畀认为是上海地方史个开端。[3]

南北朝时期建制变动频繁,上海地区畀扬州管。隋朝灭脱南朝陈,上海地区分属苏州搭杭州:乃朝嘉定区、青浦县大部、松江县西北部属昆山县;乃朝松江县大部、金山县西北部、青浦西南等地属吴县;乃朝金山县大部、奉贤县部分地区属盐官县。

唐宋元时期[编辑]

到唐代中叶,乃朝上海地区个农业、渔业搭盐业已经有一定个发展,勒天宝十载(751年)设立华亭县(县城即乃朝松江区松江镇),属于苏州管辖,是上海地区建县个开始。华亭县辖境约勒上海地区吴淞江故道以南,川沙—惠南—大团一线以西地区。上海地区隶属昆山、华亭两县。

北宋初年,苏州南部分设秀州(州治勒乃朝浙江省嘉兴市),华亭县即归属改属秀州管辖。箇辰光华亭县以东个海滩,已经成为重要盐场,“人烟浩穰,海舶辐揍”,商业日益发达。宋宣和元年(1119年),随着松江(吴淞江,即苏州河)航道重新疏浚,县城以北松江南岸个青龙镇发展成为繁华一时个商业中心(乃朝青浦区境内)。据宋诗人梅尧臣勒《青龙杂志》中记载,青龙镇有二十二桥、三十六坊,还有“三亭、七塔、十三寺,烟火万家”,时人誉称“小杭州”。但当年作为华亭一个海口个上海,仍然是个荒凉个渔村。到南宋末年,由于吴淞江上游个淤浅,青龙镇逐渐丧失了作为长江口良港个地位,而日趋萧条冷落。箇时,贸易中心转移到华亭县东北部,青龙镇下游70公里处的一条小河上海浦个西侧,那里由渔村变成初具规模个小镇。南宋咸淳三年(1267年),正式设立上海镇,并派镇将驻守。

此后不久,蒙古军队攻入江南,南宋灭亡。1277年(至元十四年),元朝勒上海镇设立市舶司,托广州泉州温州杭州、庆元(宁波)、澉浦(海盐)合称全国七大市舶司。本埠市舶司个衙门设勒后来个上海县署内,即今小东门内方浜中路以南个光启路高头。同年,又拿华亭县升格为松江府。

1291年(至元二十八年)8月19号,元朝批准设立上海县,县治勒乃朝上海市中心原南市区(乃朝属黄浦区),隶属于松江府,箇是上海建县个开始。

宋末元初,相传黄道婆搭当地妇女一道发展纺织技术,拿松江地段个纺织业亲手做起来哉。

明代上海[编辑]

明代上海
开埠前个上海,城墙尚存
中文版《几何原本》中个插图,利玛窦徐光启
徐光启墓

明代,上海地区沿吳淞江故道分属松江府搭苏州府。松江府所辖个上海地区起初设有华亭县上海县,后来勒嘉靖、万历年间,增设了青浦县。苏州府所辖个上海地区则设有嘉定县搭崇明县。

明永乐年间(15世纪初),为了解决吴淞江长期淤积、通航不畅个问题,政府主持进行了一项称为“黄浦夺淞”个大型水利工程,即拓宽黄浦江吴淞江个下游,原来吴淞江个下游成为黄浦江个入海水道。隆庆三年,海瑞主持吴淞江水利工程,吴淞江此后彻底成为黄浦江个一条支流。从此以后,黄浦江成为这一地区主要个航运通道。

到弘治年间(1488年-1505年),上海县已经是“人物之盛、财赋之多,盖可当江北数郡,蔚然为东南名邑。”,县治形成5条主要街道:新衙巷、新路巷、薛巷、康衢巷、梅家巷[4],到嘉靖年间,县治个街坊增加到61个,形成纵横交错个道路网[5]。上海地区商肆酒楼林立。

上海设县后240多年中,一直没有城墙。直到1553年(嘉靖年间),为抵御倭寇,才赶工勒2个月内修筑了椭圆形个上海城墙,全长4.5公里,高7米,开有6个城门,其中东面临黄浦江开3个城门:宝带门小东门)、朝宗门大东门)、朝阳门(小南门),箇3座城门搭西面个仪凤门老西门)都设有水门。城外开凿有宽约20米个护城河。城内搭其他太湖流域城市一样,河网密布,街道大多临河而建。城内最主要个河道是直通大东门托老西门个肇嘉浜,东通黄浦江(勒乃朝外马路托复兴东路南面个白渡路口),西面可达松江府城。此外尚有方浜、薛家浜等。

明代,松江府辖境是全国最大个棉纺中心。

清代上海[编辑]

1830年代以前[编辑]

1685年(康熙廿四年),勒1683年攻下台灣後,勒上海設置關稅司,分攤取代部份福建泉州關稅司功能。清初,上海个行政区又进行了沿革,逐步形成了乃朝上海个规模。清朝沿袭明制归属江南省松江府,设江海关。

鸦片战争前后[编辑]

鸦片战争后期,1842年,英国军队曾经占领了上海,然后沿长江西进,夺取京杭大运河托长江交汇处个镇江,切断清朝政府来自南方个财源,逼道光皇帝同意谈判。1842年8月29号,中英《南京条约》勒南京签订,规定除原有个广州口岸外,新开辟上海、宁波福州厦门四处为对外通商口岸(简称“五口通商”),允许英国侨民前去居住、经商(后来又有10多个国家陆续取得此项权利)。

开埠早期[编辑]

1843年11月17号,头一任英国驻沪领事巴富尔到上海就任,标志上海正式开埠。伊个辰光,一批英国洋行从广东过来,比方讲怡和洋行宝顺洋行和记洋行,伊拉发现上海是五口里向顶靠近丝绸茶叶产地个港口,故咾看好伊。伊个辰光,中国主要出口个生丝是浙江湖州南浔镇附近个辑里丝,从南浔到上海,内河航运顶便当。英国领事同上海道台多次谈判,大致敲定英租界个范围是县城以北个黄浦江西岸,从洋泾浜(1916年填脱变成爱多亚路,也就是现在个延安东路)往北到李家庄(现在个北京东路)个荒滩——外滩,箇面后些来造出仔最早一批洋行建筑——李家庄往北到苏州河造了只英国领事馆。

清政府希望根据广州个惯例,勒拉上海也同样进行华洋隔离居住,故咾1845年11月29号,上海道台同英国驻沪领事一道商定出上海租地章程。箇份土地章程畀认为是上海租界存在搭运作个法理依据。第二年12月22号,一個英国侨民成立个自治机构道路码头委员会成立,修界路(现在个河南中路)来确定租界个西面边界。上海开埠初期,英租界里向严格华洋分居,界里向只有少数世代憕拉箇面个中国农民,英美等外国侨民约莫300人,大多数是英国人。

1848年,伦敦会个英国传教士去青浦县传教,吵相骂打起来。作赔偿,11月27号,英租界头一趟扩充,西界从界路(河南中路)向西扩充到周泾浜(现在西藏中路),面积也多到2800多亩。

1844年,中美《望厦条约》签订,内容参考中英《南京条约》,美国传教士搭商人也就开始来上海。同英国侨民主要是商人弗一样,美国侨民里向弗少是传教士,伊拉为咾传教,并未憕拉租界里向,而是散拉县城内外。伊拉拉城内立足以后,1848年,主教文惠廉请求上海地方官允许美国侨民勒拉虹口开租界,但并呒没正式定边界。虹口美租界因为有苏州河隔拉,咾荒个,只有江边有一些船坞、码头,同畀船夫水手服务个娱乐场所。1846年,第一位美国商人吴利国(Ltentry G.Wolcott)来上海,畀委任做代理领事,勒拉英租界九江路浪自家个洋行升起美国国旗,箇是租界里向升起个头一面外国国旗(伊个辰光,英国领事馆还设拉上海县城里向),箇桩事体吸引来英国领事个干涉。箇以后,绝大多数美国洋行侪设拉苏州河南面个英租界里向,英租界也逐步国际化,同美租界合并,变成上海公共租界

1844年10月,中法《黄埔条约》签订。1848年,法国领事驻扎上海。1849年4月6号,上海道台宣布紧贴拉县城北门外头,北到洋泾浜个986亩土地畀法国人开租界。弗过,法国来个商人一直弗多,故咾法租界空有好区位,几乎呒没啥开发,只勒拉江边有一两家法国个洋行,法国领事馆憕拉天主教会个一家中国式平房里向(勒拉今朝四川南路),县城老北门外头个街(河南南路)边壗有两排中国人个房子,其他地方呒没啥变化。必过,法国来个天主教传教机构人相当多。耶稣会勒拉上海开埠前个1842年,鸦片战争还呒没结束个辰光,就已经到上海附近浦东松江等农村哉。1847年,伊拉勒拉上海西郊个徐家汇天主教江南传教区个总部,后些来陆陆续续造仔大、小男修道院,2所女修道院,藏书楼气象台土山湾印书馆,男子中学,女子中学,育婴堂等拷廿只教会机构,形成教会区。1851年,伊拉造了座公用个中型教堂圣依纳爵座堂,外形希腊风格个,拿耶稣会创始人个名字依纳爵畀伊起个名字。

租界发展搭初步繁荣[编辑]

1933年个上海市中心,大致上也就是1899年上海个全部市区范围:南市是华界,北面苏州河两岸是公共租界,勒拉两家头当中个是法租界

1853年9月7号,小刀会发动起义,占领上海县城,杀脱上海知县,拿上海道台关起来。1853年3月,太平天国占领南京。4月12号,上海租界里向个外国人迅速做出反应,召开上海租地西人大会,通过由侨民组织万国商团(义勇队)个决议,实行武装中立,维护租界个安全。1854年4月4号,清军想通过租界进攻占脱县城个小刀会起义军,万国商团勒拉英、美海军个帮助下头弗让清军过界,也就是泥城之战。1855年2月17号,小刀会退出上海县城。

1854年7月11号,上海外国租地人举行大会,通过第二次土地章程,成立独立个市政机构——工部局,建立警察武装。  

1860年8月17号,太平天国军队头一趟攻打上海。1862年1月11号,太平天国军队第二趟攻打上海。1862年8月,太平天国起义军第三趟攻打上海。

1862年5月1号,上海法租界公董局成立,宣布法租界退出工部局。

1862年11月,勒拉上海个外国商人提出拿上海开辟成自由市个想法,弗畀任何国家管咾。箇個计划畀各国公使以弗得干涉中国内政为由回绝脱。1863年9月21号,美租界搭英租界正式合并。1864年5月1号,上海会审公廨成立。1869年,洋泾浜设官会审章程公布。

箇些打仗让弗少周边乡下个人逃进租界里向,让清朝彻底失去对租界个控制,拿华洋分居个规定打破脱哉,造仔交交关关石库门,逐步变成功华洋混居个状态;租界也获得弗少便宜个劳动力,再加上《北京条约》签订以后,长江搭北方弗少口岸开放,上海个地理优势越来越突出,更多个外国商人选择上海作伊拉勒拉中国个贸易基地,开设领事馆。清朝勒拉箇段辰光,为了让外国帮忙打小刀会搭太平天国,出让上海海关,箇更加吸引商人跑到上海。自1858年《天津条约》签订到1906年,鸦片买卖合法化,上海也成为当时中国最主要个鸦片输入港口。

19世纪末20世纪初个转折辰光[编辑]

1894年,甲午战争爆发,上海形势也趋于紧张。日本因为害各国勒拉上海个势力插手,对外宣布上海是中立区域,承诺战争弗打到上海。中国输脱以后,日本弗仅获得朝鮮个宗主权搭台湾,成为列强之一,勒拉汉口天津甚至重庆苏州杭州开辟租界,但是伊勒拉上海开辟租界个想法失败哉。

根据战后签订个《马关条约》,外国人好勒拉中国开办工厂,箇以后,日本、英国等国勒拉黄浦江下游个杨树浦地区陆陆续续开仔交交关关个近代企业。上海也迅速发展成中国顶大个工业中心。

1893年,上海公共租界个范围正式划定。1900年上海法租界扩张。

根据《辛丑条约》,规定大清要同海外合资疏浚上海黄浦江个航道,经多方协商,决定所有改善搭仔保全黄浦江河道个生活,包括吴淞内外沙滩个生活,侪由江海关道搭仔税务司管理,清廷承担所以个经费。1905年(光绪三十一年),清廷成立黄浦河道局(上海黄浦江浚浦局),每年发银46万海关两,花廿年辰光来治理黄浦江[6]。1906年6月份,荷兰工程师莱克(J.D.Ryke)担任浚浦局个总工程师,是整治吴淞口个第一位外国专家。1907年(光绪三十三年),伊主持开始进行黄浦江改善施工,1909年(宣统元年)伊回荷兰前进行多项河道工程,包括吴淞码头搭仔高桥新航道。黄浦江治理工程拢总花脱六百四十三万两银子,占伊个辰光大清总经费个89%,只做仔一半个生活[6],实现黄浦江航道整治个初步目标[7]

中外冲突事件[编辑]

十九世纪七十年代以后,上海法租界个发展越来越快,对土地个需求增加交关。四明公所因为勒拉法租界边浪,貤是旅沪宁波人个同乡会兼公坟,故咾1874年,法租界认为伊有碍卫生,计划拿伊迁出租界,原来地方开路,想强行收脱四明公所个地,结果发生冲突,大家打起来,死伤数人,也就是第一次四明公所事件。1898年,上海发生鼠疫,法租界当局重提修路搭弗卫生个事体,强拆强占公所,导致勒拉上海个宁波人聚拉一道抗议,拢总畀打死17個人,也就是第二次四明公所事件。

1905年,因为会审公廨错判黎黄氏,弗按规章判决,上海民众罢工甚至围攻巡捕房

民国上海[编辑]

民国初期[编辑]

1911年,辛亥革命,清朝豪𢜶灭亡,箇咾会审公廨个司法权完全落拉领事手里向,而弗少清朝个遗老遗少逃到上海租界里向。1912年1月1号,中华民国成立,必过太弱哉,地方浪军阀当道,社会无序混乱。箇個辰光,租界像只国中之国一样,呒没受到箇個混乱个影响,勒拉经济、人口等方面侪进一步加速发展。可以讲,1912年到1936年是上海租界高度繁荣个阶段。

1914年,第一次世界大战爆发,虽然战场勒拉远开八只脚个欧洲,但上海租界里向列强原来个均衡状态畀破坏哉,上海租界里有优势个英法等国家连忙拿德国奥匈帝国挤出租界,英国拉亚洲个盟友日本则获得德国人挺下来个空位。1917年8月14好,中国对德宣战,宣布废脱德、奥勒拉中国个所有特权,收回伊拉勒拉汉口、天津个租界,关脱伊拉驻在各地、包括上海公共租界里向个领事馆。1918年,第一次世界大战以协约国个胜利告终,上海也举行盛大个庆祝仪式。

必过,勒拉第一次世界大战结束后个巴黎和会上,中国代表提出租界问题,呒没啥结果。

自1899年上海公共租界大扩展之后仅十几年,因为上海经济飞速发展,新发展个北区(商业区)、西区(住宅区)搭东区(工业区)基本浪向侪造好哉。1915年1月27号,公共租界工部局貤推出《推广租界草案》,3月4号刊登拉《工部局公报》上。但是因为第一次世界大战,箇趟扩张计划畀放弃脱。

必过,1901年到1912年,工部局已经勒拉多個方向越界修路,拉马路上设置巡捕。1906年,公共租界工部局开始向越界筑路区域用租界自来水个人征收特别房捐(又叫水捐、巡捕捐)。民国初年,越界筑路区域也畀划进会审公廨管个范围里向,事实浪已经成为“准租界”区域哉。

1914年4月8号,上海法租界签订推广条款,向西扩张到徐家汇,有13000亩土地,包括十几年里向所有越界筑路个地侪划进法租界。整個上海法租界个面积达到15150亩(10平方公里),成为中国面积最大个专管租界。

第一次世界大战个辰光,华侨华人纷纷来到上海开商店。先施公司永安百货两家华人百货公司开业[8]

1920年代[编辑]

1920年8月,中国共产党偷偷交勒拉上海法租界成立。1921年7月23号召开第一次全国代表大会。

民国初,上海行政浪归江苏省,但驻防上海个松沪护军使事实上归浙江督军管,杨善德卢永祥等侪是皖系个人。1924年9月,直系江苏督军齐燮元,联合福建孙传芳、安徽张文生,向卢永祥发动进攻。9月18号,齐燮元个部队攻占杭州搭浙江全省,卢永祥退到上海。10月,两军勒拉上海近郊发生激烈个战斗。13号,卢永祥逃到日本去哉,江浙战争结束。箇趟战争破坏邪气严重,弗少难民涌进租界里向。1925年1月,齐燮元又畀奉系军阀邢士廉赶了跑。10月份,孙传芳又赶脱邢士廉。1927年2月下旬,孙传芳同奉系合作对抗北伐军,让奉军个毕庶澄部驻防上海,孙退守扬州。

3月21号,北伐军逼近上海,国民党员钮永建搭仔共产党员周恩来组织上海工人纠察队暴动,占领租界以外个上海市区,成立上海特别市临时市政府

1925年5月份,上海日资内外棉纱厂第八厂厂长枪杀罢工工人代表顾正红。5月30号,上万名工人、学生、群众勒拉租界示威游行,有学生勒拉最繁华个商业街南京路畀巡捕捉脱。学生搭群众涌到老闸捕房门前示威,印度巡捕向群众开枪,打死13人,打伤40多人,工部局戒严,造成五卅慘案。事件引发中国社会各界对外国势力个不满情绪,普遍发生学生罢课、工人罢工、商人罢市,要求废除脱不平等条约,拿租界收转来,取消列强勒拉中国个各种特权,因此导致上海公共租界个大规模越界造路完结。

1927年初,中国国民党右派对左派控制个武汉政府个容共政策搭仔鼓励工农群众运动个做法弗满。3月24号,北伐军攻进南京,杀害外国侨民,英美军舰炮击南京,也就是南京事件。4月2号,蔡元培张静江吴稚晖李石曾等国民党元老勒拉上海开中国国民党中央监察委员会会议,要求“清党”,拿共产党人清出去。上海青帮头目黄金荣张啸林杜月笙等组织右派工会“中华共进会”、“上海工界联合会”,同中共领导个上海总工会进行对抗。上海两個租界也害1月份收回汉口英租界九江英租界、3月份南京事件箇种事体会得发生垃伊拉头浪向,勒拉蒋介石保证弗通过武力改变租界现状以後,答应提供援助。4月11号夜到头,杜月笙诱捕杀脱上海总工会负责人汪寿华。4月12号凌晨,“中华共进会”、“上海工界联合会”从上海租界冲出去打华界个上海总工会纠察队。白崇禧国民革命军第26军强行收缴工人纠察队个武器,杀脱300多人。4月13号,上海总工会召开工人大会,声讨蒋介石。10万多工人、学生到宝山路国民革命军第26军第二师周风歧司令部请愿,结果畀扫射,当场打死100多人。接下来,蒋介石下令解散上海特别市临时市政府、上海总工会搭一切共产党组织,搜捕共产党员搭支持者,逮捕千餘人,枪毙首要份子。到15号已经杀脱300多人,抓脱500多人,还有5000多人无脱。箇就是四·一二事件

此后,中国共产党个中央机关秘密囥拉公共租界中区个云南路交关年数,直到1933年江西苏区稳定纔迁过去。1931年6月22号,中国共产党第三任最高领导人向忠发勒拉上海被捉牢,叛变,被杀脱。

1930年代[编辑]

1930年代,上海个繁荣鼎盛。伊吸收仔交关从其他城市跑过来个商人搭仔1928年确定南京中华民国首都以后南下个商人,发展唻邪气漂亮。大批文化名人也聚集拉上海,美国好莱坞影片也邪气受欢迎,文化事业也特别发达。

1925年上海公共租界工部局停止越界造路以后,上海租界从摊大饼转变成向上寻空间,开始大规模造高层建筑。而上海特别市政府决定勒拉公共租界东北面实施大上海计划,造“新上海市中心区”,同租界进行竞争。

日本部队轰炸以後个上海商务印书馆,1932年
淞沪会战,1937年

1931年九一八事变後,中国民间反日情绪高昂,日本方面声称会得采取自卫手段保护日本侨民个利益。1932年1月18号,上海公共租界东区(杨树浦)贴壁个华界马玉山路三友实业社门外,发生日本僧人畀工厂纠察队打死个日僧事件,日本侨民大肆报复,拿三友实业社烧脱,砍死租界个华人巡捕,袭击华人个商店。1月28号23点30分,日军海军陆战队从北四川路向西占领淞沪铁路,勒拉天通庵车站打起来,也就是淞沪抗战。1月29号凌晨,日本战机轰炸闸北华界,拿宝山路584号商务印书馆搭仔中国顶顶大个私人图书馆东方图书馆炸坏脱。中日两国勒拉闸北打仔一個多号头,甚至南京国民政府临时搬到洛阳过。3月2号,日军勒拉太仓浏河登陆,中国军队腹背受敌,开始撤军,宣布停站。5月5号,中日签订《淞沪停战协定》,日军返回打仗前个防区(上海公共租界北区、东区搭仔越界造路区域),国军蹲拉沪宁铁路浪个安亭镇到长江边个浒浦一线,当中划成非军事地区。闸北华界毁脱4204家商店,房屋烧脱1.97万户。

正式签订停战协定前,4月29号,日本人勒拉虹口公园阅兵,庆祝日本天皇生日搭仔日本打仗打赢哉。韩国人反日人士尹奉吉勒拉人群当中,向主席台厾炸弹,炸死白川义则,炸断日本驻华公使重光葵一条腿,海军中将野川吉三郎一只眼睛畀炸唻瞎脱,也就是虹口公园爆炸案

1937年8月13号,约70万中国军队勒拉上海附近同日本部队展开长达3個号头个淞沪会战,输脱,日本占领上海除脱租界以外个所有地方。闸北华界几乎全部被毁脱,上海公共租界个北半部,也就是今朝个虹口杨浦两区作为日军防区搭仔日本势力范围也一样毁唻弗清,变成今朝讲个下只角地区。同济大学(吴淞)、复旦大学(江湾)、上海法学院等侪畀炸脱。

孤岛年代[编辑]

主文章:孤岛时期

从1937年淞沪会战到1941年太平洋战争上海法租界搭仔苏州河以南个半只上海公共租界畀日本人占领区圈起来像座孤岛,开始长达4年个孤岛时期。租界里向还是工部局搭仔公董局管理,同沦陷区搭仔打仗个地方比相对稳定,再加上上海对内、对外交通、贸易完全自由,故咾人搭仔资本涌进租界,经济上畸形繁荣[9]。但是孤岛个上海並弗是绝对个安全,日本部队好拿拉枪勒拉租界里向游行,汪精卫政权成立“国民党中央执行委员会特务委员会特工总部”(俗称“极司非尔路76号”),暗杀抗日分子。

文化事业也是畸形繁荣。沪剧滑稽戏初步定型,还出现具有浓厚抗日救亡气息个“孤岛文学”。

1940年代[编辑]

1941年12月7号,日军偷袭珍珠港,爆发太平洋战争,日本正式向英国美国宣战,日军进驻上海租界苏州河以南个地方(意大利界区搭仔维希法国上海法租界到1943年才正式收回),上海全市全部沦陷。日本人解散万国商团,拿英美等敌国个侨民抓到集中营。

1943年1月份,英美两国同蒋介石个重庆政府签订条约,宣布放弃伊拉勒拉中国个特权,包括租界。1943年2月23号,法国维希政府宣布同意放弃伊勒拉中国个租界。7月30日,汪精卫政权收回上海法租界;8月1日,汪精卫政权收回上海公共租界。10月10号,拿租界地区240条路个名字改脱。

注释[编辑]

参考文献[编辑]

  1. 上海考古新发现:6000年前上海第一人惊现_科学探索_科技时代. 新浪网.
  2. 考古发现表明上海最早移民确系豫东人. 新华网. 访问日脚2006-02-12.
  3. 王健民,“上海的历史究竟有多长” 档案,存勒互联网档案馆当中。(2012年5月14号),《上海地方志》,1989年第三期。
  4. 弘治上海县志》卷一,疆域志
  5. 明嘉靖《上海县志》
  6. 6.0 6.1 (1997)“第六编江河治理 第二章黄浦江 第一节 河道整治”,上海水利志.上海:上海社会科学院.ISBN 9787806183809 
  7. Biography of Johannis de Rijke, 2011; A History of Shanghai Dredging Corporation (1905-1988) (上海航道局史,第一部), 文汇出版社, 1988, pp.16-21
  8. 郭琳爽及上海永安公司之歷史. 访问日脚2008-02-01.
  9. 抗日战争爆发后上海“孤岛”的特殊环境. 原始文档勒2009-12-07存档. 访问日脚2009-08-12.