良渚文化

吳越歷史年表
史前 時代 前9000 | 前12世紀		上山文化
		跨湖橋文化
		河姆渡文化
		馬家浜文化
		崧澤文化
		良渚文化
		錢山漾文化
		好川文化
		肩頭弄文化
		馬橋文化
甌越 前12世紀﹣前306			勾吴 前12世紀﹣前473				於越 前12世紀﹣前306
東甌 前472﹣前138
			楚 前306﹣前222				越人部落 前12世紀-？
			秦 前222﹣前209
			西楚 前209﹣前201
		汉 前202﹣196		吴（刘濞） 前202﹣前153
孙吴 196﹣280
晋 280﹣420				孫恩 盧循
南朝 420 | 589			宋 420–479
			齐 479–502
			梁 502–557
			陈 557–589
隋 589﹣618						高智慧 刘元进 沈法兴
唐 624﹣907						陳碩真 袁晁 裘甫 董昌
吴越 907﹣978					杨吴 902﹣937
					南唐 937﹣975
宋 978﹣1276						方腊
元 1276﹣1355						杨振龙 陈空崖 方国珍
張士誠 1355﹣1367
明 1368﹣1644 南明 1644﹣1646						汪直 胡乘龍 叶宗留
清 1646﹣1911						张念一 钱宝通
						太平天国 1853﹣1864
						上海公共租界 1845﹣1943
						上海法租界 1849﹣1943
浙江軍政府 1911﹣1912		江蘇都督府 1911﹣1912		滬軍都督府 1911﹣1912
中華民國 臨時政府 1912-1913
北京政府 1913-1927				浙江省 1913﹣1916
國民政府 1927-1948								日本 1937﹣1945 上海市大道政府 1937
中華民國政府 1948-1955
中华人民共和国 1949﹣今
注：所標年份依照政权统治吴越地区个辰光

良渚文化是新石器時代文化，距瑲5300到4000年光景。良渚文化分布个中心地帶勒環太湖地區，遗址分布最密集个地区是勒太湖流域个东北面、东面搭东南面。箇中，良渚遗址作為余杭县个良渚、瓶窑、安溪三镇之间弗少遗址个总称，1936年勒浙江杭县（今朝余杭）畀发现，1959年依照考古惯例命名。

政治

良渚文化个政治模式是酋邦，也便是一隻最高酋長控制个一系列村莊聚落或者社區。良渚文化裡頭，各个酋邦組作聯盟。佢已經有大型祭祀場地、城牆、防洪牆。

佢个政治體系神權色彩濃重，有多隻分化个社會階層，包括王搭王族、貴族、工匠搭武士、平民許。箇中，玉器搭玉器上頭个徽章，還有各許禮器，按照階層弗同講究險。王會戴玉三叉形器、玉椎形器、玉梳背搭玉半圓形飾，還擁有代表至高王權搭教權个良渚象牙權杖；貴族也戴玉梳背搭玉三叉形器，隨葬品一般是玉琮和玉鉞；工匠搭武士戴數量少眼个玉椎形器，隨葬品有石鉞、石璧。平民也可能有玉椎形器搭石鉞。

佢有至少三級聚落，包括住10000到30000人个都邑（比方良渚王城）、環壕組成个區域中心（比方臨平玉架山遺址）搭住40-60人个基層聚落（比方海鹽仙壇廟遺址）。

宗教

玉琮上頭个人面獸面紋

良渚聚落中心都有宗教祭祀个土墩。莫角山遺址有規格頂高个宗教祭壇，反山、瑤山遺址有兩隻殯葬祭壇。玉琮象徵教權，有精粗大小區別，上頭徽章也有扗講究，因之，代表个權威也有差別。

良渚文化頂要緊个徽便是人面獸面紋，佢是一隻戴羽冠个人面、人个脊身、一隻獸面搭獸个脊身（帶爪）組成，人个下半身搭獸个脊身貤共用起，脊身上頭都有紋樣。對佢个意義，有多種講法。有認為箇獸是大蟲个，也有人認為是在騎豬。人面獸面紋按照完整性搭樣子弗同，有無數種形式，代表弗同个權威，包括完全个人面獸面紋、簡略獸面紋搭各許。

吳越歷史上一向有鳥崇拜个傳統，箇也是良渚文化重要个組成部分。箇中有「鳥立高台」玉璧、鳥形玉、鳥紋。鳥紋主要来勒玉琮、冠狀飾、玉璜搭三叉形器上頭。

文字

良渚遗址出土个带有刻画符号个陶罐

良渚文化已經有形成中个文字系統或原始文字，刻勒玉器搭陶器上頭，圖形規範化，畀認為有義涵。

住民搭相關研究

復旦大學个李輝个研究指出，良渚住民个DNA主要是瑲朞南島民族中央高頻分佈高單倍群O-M119（O1a）（2.1萬年共同祖宗）；箇基因在現代浙江佔比接近25%，顯示良渚人搭南島搭壯侗族群个血緣關係。

對前南島人（Pre-Austronesians）个研究裡頭，有一派認為揚子江三角洲極有可能是南島語族个起源地。佢侇相關族群有可能在公元前10000年到6000年，從閩江三角洲移居台灣。語言、考古搭遺傳學證據證明，前南島人搭揚子江流域个早期農耕文化聯繫密切。佢侇展現出典型个南島人標誌，括拔牙、黑牙、玉雕、紋身、巢居、先進个造船、水產養殖、濕地農業搭豬、狗、雞馴化技術。

對壯侗搭南島語系个大南方假說認為兩者可能是前南島語後裔，有姊妹關係。各許學者有人表示質疑，也有人有構建還要廣泛語系聯繫个打算。

物事

玉琮王

玉器

良渚文化个玉器品類豐富、數量奇多，雕琢精細。玉器有璧、琮、钺、璜、冠許器型，還有玉三叉形器、玉镯、玉管、玉珠、玉坠、柱形玉器、锥形玉器、玉带、玉環許。

陶器

良渚文化陶器主要是灰黑陶，輔夾砂紅陶，陶器風行圈足搭平底，陶壺貫耳多。製作陶器用快輪技術。福泉山等大墓隨葬个陶鼎、陶壺有許有精緻刺紋搭彩繪。早期陶器个代表在钱山漾、张陵山許遗址：陶器主要是灰陶，也有眼黑皮陶， 器形有鱼鳍形足个鼎、袋足、 镂孔豆、贯耳壶、球腹罐、附耳杯、附耳、大口圜底缸搭各許。晏期陶器主要在良渚、雀幕桥許遗址：陶器多泥质黑皮陶，還有薄胎黑陶，器形有断面呈丁字形足个鼎、竹节形把个豆、贯耳壶、贯耳罐、侈口圆腹罐、簋、大圈足盘、宽把带流杯搭各許。

漆器

反山、瑤山墓葬出土爻漆器，箇中有玉嵌在裡頭个。

絲綢

良渚文化壞出土爻絲綢，比方，在錢山漾遺址發現爻囥在竹篚裡頭个絲帶搭絲帛。

石器

良渚文化出現扁平長方形穿孔石斧搭有段石錛，適合建構干欄建築。耕具有石犂、耘田器搭石鐮許。禮器也有石製，比方，福泉山遺址用玉少，大件琮、璧有石質。

王墓

良渚國王畀認為埋在反山12號墓，按照復原，佢頭戴特殊長玉璧、玉梳背、玉三叉形器，頭正面是成組組成扇形个玉椎形器。佢頭頸戴玉管串，胸頭板一梗有兩端个首飾、有瑁个玉鉞搭良渚象牙權杖，手爭頭戴玉鐲搭玉琮。墓裡頭還有鑲插端飾、嵌玉漆盤、嵌玉漆杯、長管、陶罐、陶鼎、榫頭端飾、大口缸。

反山12號墓个玉琮王是玉琮裡向个頂精品，是頂權威个禮器，是王權搭教權个象徵。佢中央中空，外層方圓筒形，裡層圓形，重3.5公斤，人面獸面紋搭獸面紋精緻險。

紋樣

良渚文化有無數紋樣，主要是動物，有鱷魚、鹿、烏龜、鳥、蛇、蠶、魚、大蟲、蝦、鹿、狗搭各許。螺旋、鳥紋許都是長見元素。

生活

環境

良渚住民生活在生物種群豐盈个宕地，當時氣候也比瑲朞暖無數。良渚遺址在个天目山餘脈上頭河網、濕地密布，礦產、森林豐盈。

喫

良渚住民饭稻羹魚。

良渚文化稻作農業發達。在各個遺址當中，廣泛發現爻稻穀搭稻米遺存。佢侇已經發明出兩種新形制个石犁，進行犁耕。佢侇還種植蔬菜、瓜果搭油料作物搭採集野生植物，比方講錢山漾遺址便有出土爻葫蘆、花生、芝麻、蠶豆、甜瓜子、兩角菱、毛桃核、酸棗核許。

佢侇飼養馴化動物，主喫豬肉。還打野生動物，比方野豬、鹿，還有魚、蝦、蟹、殼許。動物个骨頭還好做成裝飾、生活用品搭工具。

佢侇燒飯用鼎，一般用來煮粥搭熬湯。喫飯用豆、簋、盘。喫飲料用鬶、壺、杯。

物

良渚文化芸集百工。手工匠人在產業化个作坊裡頭做玉器、石器、骨器、漆木器、陶器，佢侇有可能穿麻衣。

住

莫角山台地上有七座大型宫殿建筑，木構件有十把米長，以榫卯結構支撐建築。牆體用毛竹骨，草泥迫牆，黃黏土打泥再搨牆，再用火烤讓佢堅固防潮。

行

良渚遺址城內有51條河，貴族出行會用獨木舟或者竹排。城市之間運物事也好用水道。

地理範圍

良渚文化以環太湖地區為中心，政治影響力北越揚子江，盛極進淮北，西到茅山搭天目山，東瀕東海。在前期，良渚王城是佢核心，後髖，權力中心有向太湖背面寺墩遺址一帶遷移。

消亡

距瑲4000年光景，良渚文化消亡，佢个繼承者馬橋文化搭佢相比，有明顯弗同，還有出現經濟、技術个倒退。佢个消亡原因畀弗同學者認為可能搭洪水，社會衝突或者瘟疫有關。

卻情，遺傳學研究證明馬橋文化住民个基因繼承性，講明政治結構解體無導致人口个大規模替換。

良渚文化遺址

良渚文化遺址眾多，範圍廣扗猛，包括良渚王城遺址、反山遺址、玉架山遺址、茅山遺址、新地裏遺址搭各許。

延伸阅读

• 艺术与建筑索引典—良渚文化 于2011年3月18日查阅
• 图文：中国社科院考古所赵志军讲述发现故事
• 浙江发现四千年前良渚古城. 明报 [2008年2月10日].

外部链接

维基共享资源里向寻得着搭该篇文章搭界个多媒体资源：

良渚文化

• 良渚文化數據庫 档案，存勒互联网档案馆当中。（2019年8月28号），杭州市余杭区图书馆建設