洋泾浜

洋泾浜，是老底子上海个一条河浜。大约莫2公里长，弗到20米宽，流进黄浦江。伊是英法租界个界河，北岸是英租界，南岸是法租界，大样莫仔是今朝个延安东路（外滩到西藏中路段）。1914年-1915年，两租界合作，拿河浜填脱造路，洋泾浜连同两岸个小路才变成功一条东西向大马路。

洋泾浜丄有过弗少桥：外洋泾桥（外滩）、二洋泾桥（四川路）、三洋泾桥（江西路）、三茅阁桥（河南路）、带钩桥（山东路）、郑家木桥（福建路）、东新桥（浙江路）、北八仙桥（云南路）咾啥个。

当年租界辰光，洋泾浜个特殊地理位置形成特殊个集市，常年有小贩从黄浦江划船进来叫卖，又有相当数量个小摊贩从华埠等地界来到此地，多数集中勒浜丄个桥浪。为仔招揽外国生意，小贩形成仔弗标准个英语，俗称“洋泾浜英文”，后手来“洋泾浜”也畀泛指成某种言话发音勿准着个现象或人。