第一次世界大战

1914年两大集团结盟形势图

第一次世界大战(WWI 或者WW1)是20世纪人类爆发过个两场顶顶激烈个全面战争之一。迭个战争从1914年7月28号开始，一直持续到1918年11月11号终结。冲突辰光超过4年，参加个国家包括世界上所有主要个列强。个当中，德意志帝国、奥匈帝国、奥斯曼帝国为首结成个同盟国对大英帝国、法兰西第三共和国、沙皇俄国为首个协约国发起挑战，企图颠覆维也纳会议之后个欧洲搭世界霸权形式。战争主要立在欧洲战场进行，分成东西两条战线。立在阿拉伯半岛、巴勒斯坦、胶州湾以及东非等地区，列强和相互进行过小规模战争。1917年，沙皇俄国发生革命，之后退出战争，美国参战。1918年，奥斯曼帝国搭奥匈帝国先后战败投降，德意志帝国独木难支，终于爆发政变，推翻自家个皇帝威廉二世。到1918年11月11号，签署投降书，战争结束。

影响

第一趟世界大战彻底改变欧洲主宰世界个格局。老早中欧搭东欧个四大帝国——德意志帝国、奥匈帝国、奥斯曼帝国搭沙皇俄国全部崩溃。美国总统威尔逊鼓吹民族自决，让此地个民族主义者有机会创造自家个民族国家。弗过因为手段太快，带来邪气多个后遗症。立在俄国，布尔什维克掌握政权，建立苏联，成为共产主义夺得控制权个模板。立在意大利王国，因为战争回报太推板，让交关军人搭老百姓弗满意，造成法西斯主义个兴起。立在德国，因为战败带来个赔偿让老百姓弗能理解接受，造成极端思潮兴起。让希特勒有参与政治个可能。立在英国，大批贵族立在弗兰德斯死脱，造成平民主义搭工会政治兴起，大英帝国个霸权严重削弱。