石库门
石库门，上海一种建筑风格，也是近现代上海民居个主要形式。伊是传统个江南民居建筑式样同英国传统排屋建筑式样融合演变出来个，是中西合璧个建筑风格。石库门是里弄式房子个一种，拢总好分成功新老两派，老式石库门还有早後期个区别。
石库门里弄多分布在原上海公共租界（乃朝上海黄浦区、静安区中北部、虹口区南部、杨浦区南部）、上海老城厢（原上海南市区）搭仔原上海法租界（乃朝上海徐汇区、原卢湾区、静安区南部）。2009年，上海石库门里弄居住习俗进入上海市非物质文化遗产名录当中[1]。2010年，上海石库门里弄营造技艺进入国家非物质文化遗产名录里向。截止2015年，上海有较为完整个石库门风貌街坊173处，里弄1900多处，建筑单元五万幢，箇当中只有51处算“上海历史文化风貌街坊”。
来勒上海以外也有石库门，特别是华东沿海搭仔长江沿江个口岸城市，比方讲汉口个英租界、法租界、德租界侪造过石库门房子，汉口江滩还有一些石庫門。远开八隻脚个北京也有石库门，比方讲20年代北洋政府规划香厂新市区个辰光造个华康里、泰安里。[2]
参考[编辑]
- ↑ 专家学者联名呼吁“上海石库门”申报世界文化遗产. 中国文物网转人民公益网 (2015-01-30). 访问日脚2015-01-30.
- ↑ 天桥百年“老上海”露真容 华康里、泰安里将原貌修缮. 原始文档勒2019-08-21存档. 访问日脚2019-08-21.
外部链接[编辑]
- （中文） 姜庆共、席闻雷 《上海里弄文化地图:石库门》。同济大学出版社，2012年。ISBN 978-7-5608-4791-7