宁波市

吴语维基百科,自由个百科全书
(从宁波转戳到箇里)
跳到导航 跳到搜索

29°52′N 121°33′E

宁波

宁波有关伊段声音 读音,国际音标:niŋ˩˨ pɐʊ˦˨或者niŋ˩˨ poʔ˥),简称甬,候着也简称宁,是东亚临近东海个一个城市。乃遭属中华人民共和国浙江省管辖,也是浙江省第二大城市,全市陆地面积9365.58平方公里,人口有得800.5万(2017)。宁波来勒浙江省东北半边,杭州湾个南半边。西搭绍兴接牢,南半边搭台州挨勒眼,东搭舟山隔勒一道海。宁波人讲个闲话是主要是属于吴语太湖片甬江小片宁波闲话。宁波该晌里是国家计划单列市,长三角南翼经济中心。宁波-舟山港是世界高头货运吞吐量顶大个港口,也是中国第三大个集装箱港口。

历史[编辑]

远古至隋朝[编辑]

宁波个历史𠊉派悠久,是吴越地区头一批城市之一。来石器时代宁波地区就已经有人类活动当。公元前7000年古越人个河姆渡文明就来该底诞生。大量栽培稻谷、耕作农具、干栏式建筑遗存搭仔家养牲畜遗骨,还有原始宗教用品来河姆渡遗迹出土。该文化遗迹证明,来7000年前头,宁波来的个宁绍平原东半边已经有人类活动的,并且文明达到一定水平。

宁波个行政区域来该段辰光一直来该更迭,但是完整个地域概念始终呒没形成。夏辰光,宁波来的个乌埰畀讴做鄞。春秋辰光,宁波为越国地。该辰光,越王勾践曾来今慈城镇境内建勒只句章城,成为宁波境内顶顶早个城池。战国中期后头,宁波来的个乌埰成为楚国辖地。公园前221年,秦搭六国统一,宁波地区属会稽郡,置鄞、鄮、句章3县(一说鄞、鄮、句章、余姚4县)。西汉初年辰光,宁波所来的个会稽郡曾经属于荆国搭吴国。七国之乱平定以后,会稽郡恢复。589年(隋开皇九年),句章、鄞、鄮、余姚4县畀并为句章县,设治小溪,隶属吴州(即会稽郡)。

来三国两晋南北朝时期,佛教开始影响宁波。甬上顶早个佛寺普济寺就建勒三国时期,现今个两大佛寺阿育王寺搭天童寺也好回溯勒东晋。宁波个海防也从该个辰光开始。132年(西汉阳嘉元年),为勒防范曾旌起义军,浃口(今镇海口)头一埭设戍驻兵。而来起头个春秋时期,句章港已经成为重要个军港。

唐代至元代[编辑]

明州(宁波)正式建制勒唐朝个738年。当代宁波个市域范围来该辰光已经基本确定的,交关多宁波城市延续至今个建筑搭地名也是从该辰光介来个。821年(长庆元年),明州个州治迁勒三江口,内城筑成,标志宁波建城之始。唐子城南城门现为宁波鼓楼。来该前头,明州城内外天封塔、灵桥、它山堰等重要建筑搭工程都整建好的。该里向,交关多工程经过历代修缮重建,得以保留勒今日。做一辰光,宁波港成为全国主要个对外贸易港口,对外交流日益繁荣,以遣唐使、佛教交流为代表个对日交流搭对外贸易呈现出繁荣态势,搭扬州广州聚队成为东亚顶大个港口。

五代十国辰光,明州属吴越国

宋代,明州经济得到进一步发展。随勒以王安石为代表个一批文人官员个上任,明州个文化教育开始发展,经世实用个世风开始形成。特别是南宋建都临安以后,依靠挨近首都个地理优势搭长期个贸易传统,明州文教搭对外交流一度达到鼎盛。伴随江南个开发,明州(庆元)个对外贸易搭港口也进一步发展,其标志为999年(北宋咸平二年),明州市舶司个成立,起海关作用。此后,随勒契丹搭西夏对北宋疆域个进犯,北方港口式微,明州港作为江南港口,地位愈加重要,搭高丽、日本、还有别样国家统拥有贸易搭文化交流。日本佛教临济宗、曹洞宗和总从明州介传勒日本。来航海过程当中,福建介传来个妈祖信仰来宁波得到传承,并成为宋朝个官方神灵。

忽必烈定都北京后头,南宋将领张世杰来庆元抵抗蒙古入侵失利,败走。但是,抵抗元朝统治个斗争勿断,一定程度高头有影响宁波地区个商业发展。但是由于元朝勿大抑商,又由于所辖疆域广大,贸易通路便捷,该辰光个对外贸易仍旧有蛮大个发展,庆元市舶司一度下辖温州、上海、澉浦多塔市舶机构并直属于中书省。元末,方国珍割据宁波,1367年(元至正二十七年)12月归降朱元璋,庆元路名字畀重新改回明州府。

明清时期(1840年前头)[编辑]

为避国号讳,1381年(明洪武14年)3月20日,明州因辖有定海县,取“海定则波宁”之义,更名为宁波,该一地名一直沿用勒今日。初,宁波设有宁波市舶司,为全国三座市舶司之一,搭日本、朝鲜个官方贸易仍旧继续来做,宁波成为中日勘合贸易个唯一港口。但是,东南沿海倭寇日益猖獗,为此,明朝政府加强海禁,同时搭岛高头庉个人和总迁勒内陆,市舶司也屡建屡废,极大影响宁波个对外贸易。晚明,葡萄牙来双屿港(来今六横岛)个走私贸易一度繁荣,客观上也促进宁波个对外交流。由于打击倭寇个需要,戚继光搭俞大猷等抗倭名将来宁波作战多回,交关多海防设施个遗迹保留勒今日。明代万历、天启年间,宁波帮开始崛起的,来京师成立会馆组织,日后逐渐成为全国十大商帮之一。

1645年(清顺治二年),宁波明代官员降清。此后,张苍水在宁波坚持反清长达20年。为勒镇压反清运动,清政府颁布迁海令并实施海禁政策,该一政策使得宁波对外贸易损失惨重。直至1679年(康熙二十三年),海禁还只解除,但乾隆年间,海禁重开。来海禁比较松弛个时期,日本也实施锁国政策,箇拉经由宁波个中日贸易没像闲早介兴盛,但是宁波搭西方国家个贸易却日渐繁荣,早期传教士开始来宁波活动。黄宗羲、全祖望等闻名全国个大学者创立浙东学派,对后世影响犯关。做一时期,宁波商人作为十大商帮中个重要组成部分,开始影响全国。

近代及现代(1840年 - 1949年)[编辑]

1840年,第一趟鸦片战争爆发,定海、镇海搭宁波别样乌埰相继失守。1840年介到1842年,宁波居民利用各种方式抵抗,清政府也曾派遣奕经率领个官军试图收复宁波,但和总输脱。《南京条约》签订后仔,宁波畀开辟为通商口岸,外资个迅速进入,官吏个腐败搭仔太平天国个战乱使得宁波本土经济凋敝。该辰光,宁波商人大笔头前往上海,并缓泛来金融搭众多实业领域占据领导地位,沪上宁波人成为上海个重要族群。宁波本地也来西方搭洋务运动个影响下底慢慢较近代化,并来中法战争当中打赢镇海之战。

中华民国时期,宁波经历巨大个动荡。民国初年个军阀混战让宁波政局一度勿稳,一直到20世纪30年代还只有所缓解。该一时期,宁波个城市面貌有蛮大个改观,交关多现代市政设施兴建起来。抗日战争时期,日军来宁波实施细菌战,造成宁波市中心死亡百余人。面对侵略,宁波人也来的反抗。国货运动彰显宁波人爱国热情,促进本土商人个发展。做一辰光,上海个宁波商帮也经历比较大个波折。抗战前头是宁波商人黄金时期,但是,随勒日本渗透上海,宁波商人个经济地位慢较开始走下坡路。1945年抗日战争结束以后,中国大陆严重个通货膨胀搭仔内战导致部分宁波商人陆续迁往香港、台湾搭美国,继续发展。

当代(1949年 - 今)[编辑]

中华人民共和国成立以后,宁波行政区划发生蛮大变化。老有个交关多制度畀废除,宁波成为重要个海防前哨搭仔军事要地。搭中国大陆别样地区做样,各种政治运动席卷宁波。1956年5612号台风登陆辰光,因为片面强调保证丰收导致救援不力,象山县近3500人死于台灾。文化大革命时期,余姚发生震惊全国个武斗事件,造成交关大伤亡。

改革开放以来,宁波经济开始依托港口搭个体私营经济迅速发展,逐渐进入中国大陆各城市前列。1984年,邓小平提出“搭侅世界个‘宁波帮’和总动员起来建设宁波”(“把全世界的‘宁波帮’都动员起来建设宁波”)个口号,来海外取得成就个宁波帮人士该辰光来包玉刚等人个带动下底开始支持家乡建设。来宁波帮、宁波本地企业家搭政府三股力量个推动下底,宁波乡镇企业搭小型国有企业改制成民营或外资企业,形成特有个转型模式。宁波港也从内河港口介转变为海港,搭舟山港合带拢个宁波-舟山港吞吐量位居世界第一。临港加工业成为宁波经济个重要支柱。进入21世纪,宁波已经成为长江三角洲地区重要个经济中心搭浙江发展海洋经济个核心区。

地理搭气候[编辑]

宁波来勒浙江省个位置

宁波市位于东经120°55'搭122°16',北纬28°51'搭30°33'之间,东临东海,靠舟山群岛。北临杭州湾嘉兴上海相望,西半边搭绍兴相接,南半边搭台州挨拢,陆地总面积9816平方公里,海域面积9758平方公里,岸线总长1562公里,该当中陆上长788公里,岛屿岸线长774公里,岸线总长居浙江全省个三分之一。

地质地貌[编辑]

宁波地处浙东低山丘陵东北半边,市域西南为丘陵,东部靠海。山地、丘陵各占市域面积两成,平原占四成,谷地占一成。境内平原有得堆积平原剥蚀平原两种类型,该当中堆积平原位于市域中部、北部搭港湾两岸;剥蚀平原大多位于余姚西南搭仔宁海中部。顶大个平原为市域中部个宁波平原。市域北部个三北平原是市域内第二大平原,其面积由于北宋以来个大面积筑塘,因此慢较扩大。市域内顶大个两只半岛为穿山半岛象山半岛,隔勒象山港相望。市域内主要山脉有四明山搭仔天台山。四明山是天台山脉个支脉,来宁波境内从北介往南穿过余姚、海曙搭奉化。天台山来宁波境内个支脉除脱四明山,别样4大分支从宁海西北、西南介进入宁波,延伸勒北仑、镇海。境内顶高峰是位于余姚南半边个青虎湾岗,海拔979米。海拔500米以上,1000米以下个山地多位于市域西南,而海拔500米以下个丘陵多分布于宁海、象山、象山港搭姚江沿岸。

宁波地貌形成于中生代时期侏罗纪燕山运动带来个强烈火山活动,使得宁波个地貌特征基本形成。白垩纪时期,东北方向断裂下陷,造成低洼地带堆积。喜马拉雅运动早期,陆地大幅抬升,盆地扩大,东部海岸线基本形成。后叟经多回个海侵搭海退,形成海积平原并发育形成新个陆地,压末形成该晌个地貌景观。

水文[编辑]

宁波境内河网密布,主要水系为甬江水系,占到流域面积个59%。主要入海河流有甬江、姚江搭仔奉化江。姚江搭奉化江来三江口合流后头讴甬江。甬江河口呈喇叭形,潮汐现象明显。姚江大闸建好仔,潮流量锐减,因而产生明显淤积,需要人工疏浚。姚江发源于四明山夏家岭,四明湖水库流过仔搭浙东运河汇合,从招宝山介汇入东海,是宁波历史上重要个航道。奉化江干流为剡江,发源于四明山大湾岗,此后东流出亭下水库至江口,依路搭东江还有鄞江汇合,顶压末向北至宁波三江口搭姚江汇合。整个宁波地区河网密布,灌溉、供水、航运、排涝交关便利。

宁波海岸线漫长,大陆海岸线起自余姚西三闸,终到宁海旗门港,总长788公里。甬江口以北岸线较为平直,多为泥质、沙质海岸。甬江口以南岸线较为曲折,多为岩岸、泥质岸相间。杭州湾位于市域北端,为钱塘江河口,呈扇形凸出。象山港位于大陆海岸线中部,穿山半岛搭象山半岛之间,为狭长半封闭海湾,生态条件优越,适宜海洋生物生存。三门湾位于市域南端,适宜海涂养殖,为浙东海防门户。沿海潮汐属非正规半日期潮型,甬江、象山港、三门湾个潮差自北向南介递增。

宁波境内大小岛屿亨末冷有得531只,面积524.07平方公里,当中绝大多数为面积小于0.5平方公里个小岛。南田岛为市域内顶大个岛屿,位于象山县,面积90平方公里。面积超过20平方公里个岛屿除脱南田岛还有高塘岛大榭岛梅山岛。重要个列岛有泗礁列岛韭山列岛渔山列岛三岳山列岛等。其中,位于渔山列岛个五虎礁为中国领海基点之一,韭山列岛部分区域为国家级自然保护区。

经济[编辑]

宁波是交关重要个经济中心搭港口城市。历史上头,七世纪开始宁波已经搭外国做贸易。宁波该晌是交关重要个出口港,出口个货物包括消费品,电子商品,纺织品,食品搭工业品等。

宁波-舟山港是该晌世界货物吞吐量顶大个港口,地位交关重要。

文化[编辑]

宁波一到里是中国传统文化发达之地。自宋代王安石任鄞县县令,发展文教以来,宁波历代产生一系列有影响个学派搭一批重要个大学者,来哲学、史学等方面颇有建树,并对日本等近邻国家产生一定个影响。闲话讲转,宁波文化也受到海洋文化搭仔长期经商传统个影响,该眼影响来民俗、饮食等方面表现勒比较明显。另外,五口通商、还有宁波商人搭西方个交流也使宁波文化受到西方文化个一定影响。

学派[编辑]

宁波个学术文化好追溯勒北宋庆历年间。该辰光,杨适、杜醇、楼郁、王致、王说五位大学者成为宁波学术文化顶早个代表,史称“四明庆历五先生”。王安石创立鄞县县学,邀请五先生讲学,宁波学术活动开始繁盛。南宋时,宁波人杨简、袁燮、舒璘、沈焕搭陆九渊个心学发展起来,并来月湖讲学,吸引大批门人,形成四明学派。该里向杨简对后世个学术影响顶大。杨简搭心学溯源勒孔孟,提出“吾心即道”、“永在人心”、“良知良能”、“公心为政”四说。

明代,余姚思想家王守仁(阳明)继承陆九渊“心即理”个讲法,提出“知行合一”、“致良知”以达到“万物一体”个境界。王阳明有姓名好考证个弟子有得3000多人,该里向余姚王学一传弟子32人,形成姚江学派。其后学对王学个发展奠定下日浙东学派个基础。王阳明个学说经过日本人中江藤树搭余姚人朱之瑜(舜水)个传播,形成日本个“阳明学”。

清代,余姚学者黄宗羲受到老师刘宗周个王学影响,进而摆脱王学,形成“盈天地皆气”个哲学思想。黄宗羲个著作《明夷待访录》来政治、经济、法律、军事、教育等方面多有论述,体现“民本”个思想。另外,黄宗羲来天文、地理、数学、艺术、宗教等方面也有一定个研究。54岁以后,黄宗羲来浙江各城市讲学,该里向,来宁波讲学影响顶大,亨末冷有得从学者百余人,该其中高足18名。该让宁波成为浙东学派个发祥地,著名后学有万斯大万斯同全祖望等人。

民间故事[编辑]

宁波是中国著名民间故事梁祝传说个发源地之一。根据唐代张读《宣室志》记载个梁祝故事,梁山伯曾任鄮县县令,亡于任上。祝英台出嫁辰光途经梁墓,痛哭以至地陷,遂合葬,称“义妇冢”。梁山伯庙搭墓位于今海曙区高桥镇,据民国《鄞县通志》载,庙建于晋代,宋、明、清、民国曾多次修缮。民间有“若要夫妻同到老,梁山伯庙到一到”个俗语,并形成每年三月初一、八月十六赛会搭八月初七坐夜香会个习俗,同时形成梁山伯护佑康王赵构、梁祝结发等相关传说。1999年,以梁山伯庙为中心个梁祝文化公园建成,成为一𡍲爱情主题公园。

除脱梁祝传说,历代宁波人也创作出各种各样个民间故事,涵盖人物、地理、风速、土特产等各个方面。该里向个徐福东渡传说搭布袋和尚传说,搭梁祝传说聚队畀列进中国国家级非物质文化遗产名录。

戏曲曲艺[编辑]

宁波个地方剧种有得甬剧、姚剧、平调该眼,外来主要剧种有得越剧、京剧、绍剧该眼。甬剧是宁波本土戏剧,形成勒清乾隆年间,来田头山歌、唱新闻个基础高头吸收马灯调等民间曲调形成。顶早是只为消闲个清唱,后受到别样剧种影响加上表演搭伴奏,逐步形成自身个表演风格。传统作品有《半把剪刀》、《天要落雨娘要嫁》、《借妻》等。艺术特点为形式自由,表演细腻,贴近生活,民间词汇丰富。宁波市甬剧团为市内主要表演团体。越剧前身“的笃班”于1906年传勒宁波。此后,越剧在宁波受到了极大个欢迎。宁波市越剧团为市内重要个越剧表演团体,曾多次承担对外演出任务。

宁波地方曲艺主要有四明南词、宁波走书、唱新闻等,顶早多为农闲娱乐,后成为卖艺人谋生技艺。演唱材料多为改编后个社会新闻搭民间故事,经过艺人不断完善形成。四明南词由民间唱曲发展而成,辞章华丽,曲调高雅,多来喜庆场合演唱。宁波走书由一唱一和式个田头山歌发展而来,多以四弦琴伴奏,因表演时动作幅度较大而得名。唱新闻由唱“朝报”(官方新闻)演变而来,后来成为盲人来航船上演唱个曲艺形式,箇晌已停唱。

畀列入国家级非物质文化遗产名录个宁波戏曲、曲艺有甬剧、姚剧、宁海平调、四明南词、宁波走书。

名人[编辑]

交关多个名人是宁波介出来个,还有蛮多人祖宗个屋落宁波来的。

景点[编辑]

Commons-logo.svg
维基共享资源里向寻得着搭该篇文章搭界个多媒体资源:
  • 天一阁,宁波顶有名个景点, 天一阁藏书馆 (每日天亮8:00到下半日4:30开放; 门票30块,驮学生证老年证好免费), 来勒湖西河个旁边。天一阁是1516年造好个,是东亚该晌还来当个顶早个图书馆。明朝个范钦有收藏交关多版制书,手抄儒家经典,还有眼历史书,辰光好追溯勒11世纪。该晌侬可以来勒藏书楼外头个花园搭外屋参观。还可以看见交关多有名个石刻。景点里向还有麻将博物馆。
  • 保国寺
  • 天封塔
  • 阿育王庙
  • 天童庙
  • 蒋介石屋落
  • 天一广场
Template:吴越 Template:浙江