吳越歷史

吳越歷史，是指个吳越地區个歷史。

吳越地區，從舊石器時代起，歷經新石器時代个上山文化、小黃山文化、跨湖橋文化、馬家浜文化、崧澤文化、良渚文化、錢山漾文化、好川文化、馬橋文化等，先秦時期个勾吳、于越、甌越、楚國，秦朝，漢朝搭東甌國，六朝時期个東吳、兩晉、南朝，隋朝，唐朝，五代个南唐搭吳越國，兩宋，元朝，明朝，清朝，中華民國，中華人民共和國，箇中央還長期有越人部落个存在，搭各許政權等个統治。

遠古時代

吳越地區个地質歷史裡頭，有多種多樣个生物種類搭化石記錄。

在侏羅紀搭白堊紀，吳越个宕地有許特有个恐龍搭翼龍品種，打比方講，有浙江峨眉龍、舟山龍、南京龍、太倉龍等。

海門地區發現爻無數魚龍个化石，箇是一種生活在侏羅紀到白堊紀个海洋爬蟲類。

南京邊扗个灰岩溶洞中央，發現爻蠻多隻南京猿人个化石，是重要个早期人類化石。

上古時代

上古時代个吳越地區，是古文明个發祥地之一。

舊石器時代

古人類人牙化石「建德人」顯示，在距瑲五萬年光景，原始人類活動便在吳越个宕地出現。

新石器時代

西元前8000到6500年光景，來朞日个金衢盆地，出現爻一種有規劃特點搭聚落結構个新石器時代考古學文化，謳作上山文化，相關个遺跡裡向已經出土爻具有明顯馴化特徵个水稻植硅體。

前7000年光景，小黃山文化在嵊州出現，有承前啟後作用。

前6000到4000年光景，來湘湖南岸，跨湖橋文化出現。箇地方出土一隻獨木舟，畀望作航海傳統个體現。

前5000到4000年光景，杭州灣南岸平原出現爻河姆渡文化，以余姚河姆渡遺址為代表。來河姆渡相關文化遺址裡頭，發現爻大量幹闌式建築，說明爻當時个巢居習慣；佢侇已經開始喫人工栽種个水稻；佢手工藝術品老實精湛，以「雙鳥朝日」紋象牙雕頂頂有名。有學者認為，河姆渡人可能搭早期/先南島人有關。

前5000年到3350年光景，馬家浜文化出現來環太湖流域。佢侇採集、漁獵、畜牧搭稻作為食物來源，相關遺址出土个野生動物骨頭有梅花鹿、四弗像、野豬、獐、貉、蟹、蠔，各種鳥，草魚、黿、鯽魚許个水生動物，還有桃、杏梅搭菱角等。

前5300年到4000年光景，良渚文化來環太湖地區出現搭擴展佢个影響力，佢个政治體制是酋邦，也有學者認為已經是國家个雛形，是因之各个酋邦已經形成聯盟、有濃厚个神權色彩、能夠建造大型工程、社會成員地位分化等。佢个中心以良渚遺址邊扗个莫角山王城。良渚文化个頂重要个特點是玉器个運用搭陪葬，箇便包括大隻个玉琮、玉璧、玉鉞。玉琮是箇裡向工藝頂精、頂有權威个玉器，上頭有多種獸面紋，其中以全幅个神人獸面紋頂頂尊貴；玉鉞是軍權、王權个象徵。良渚文化中央，已經有文字个雛形，或者已經出現爻原始文字。基因研究還表明，長江出海口邊个良渚人裡向，存在高比例个單倍群O-M119（原O1a）基因，可能講明爻箇時節、南島人搭壯侗語族已經來在良渚交會。

前2700到3200年光景，錢山漾文化在湖州出現，相關遺址中央出土爻與良渚搭馬橋文化中弗同个器物，畀認為是種新个文化類群。

前2700到3200年光景，好川文化在麗水出現，其印紋陶畀認為是越人考古文化个代表物事。

前1900到1200年光景，馬橋文化在太湖流域出現，但出現返老還祖現象，文字比良渚簡單。相關遺跡出現爻小件青銅器。

古典時代

吳越時期

勾吳、于越初期

馬橋文化發展成爻吳國搭越國。吳國，貤作句吳、 工䱷、攻吾等；越國，貤作戉、于越、于粵、大越。對佢侇个起源有多種望法，《吳越春秋》搭《越絕書》兩書个作者認為吳越兩國地理相接，習俗相同，語音相通。根據考古證據，越人在語言習俗、歷史傳承、考古遺蹟許宕地搭中原有蠻多差別。佢侇被認為講是壯侗語系或南亞語系个古越語，漢朝劉向个《說苑·善說篇》裡頭所錄个《越人歌》便算是保存頂完全个越語資料。佢寫爻一个越人思慕王子个心聲：「濫兮抃草濫予？昌（桓）澤予？昌州州（湛）。州焉乎秦胥胥。縵予乎昭澶秦逾滲。惿隨河湖」（原譯文：今夕何夕兮，搴洲中流。今日何日兮，得與王子同舟。蒙羞被好兮，不訾後恥。心幾頑而不絕兮，得知王子。山有木兮木有枝，心悅君兮君不知；吳語譯文：朞日是何日子阿，我在乘舟漫遊。朞日是何日子阿，好搭王子同舟。承蒙王子望扗起，弗畀我在嫌憎。我心亂弗已啊，得著認得王子！）

因之吳越宕地水網密集，有許地方丘陵縱橫，吳越軍隊長在舟楫、步兵、短兵，箇宕地貤富有銅、錫，使得兩國鑄劍技術高超。吳越劍劍型有兩，一為獸面劍格，多有圓轂，一為一字劍格，劍身寬長，形制還要統一。 箇許劍中，以吳越王劍為頂精品。越王劍劍體个菱形暗格紋、劍首个同心圓搭複合劍體為人稱道。

吳越爭霸

《春秋》記載，吳越交兵至少有十，其是，閽刺吳王餘祭、吳滅巢與鍾離之戰、檇里之戰、柏舉之戰、越襲吳之戰（前505）、槜李之戰、夫椒之戰、越襲吳都之戰、笠澤之戰、滅吳之戰。

吳國在滅爻邗國後，搭楚國產生衝突。前506年，吳王閣閭在伍子胥搭孫武輔佐下頭，打進楚國，在柏舉之戰大敗楚國，吳軍攻入郢都，楚昭王出逃隨國，吳國雄霸東南。

自允常死，勾踐繼位。吳王闔閭攻越，大敗，後自家身死，兒夫差繼位。夫差為復仇，興兵伐越，勾踐忖要先發製人，便先攻吳。夫差在夫椒之戰敗越軍，圍困勾踐在會稽山。勾踐獻禮求和，最後夫差畀勾踐放轉越國。

夫差北進中原爭霸。前482年，黃池會盟，勾踐再襲吳，佔領吳都，兩國議和罷兵。

前478年，吳國飢荒，越國再攻，笠澤之戰裡頭，兩國優勢逆轉。

前475年，越國再次興兵，吳國長年征戰，精疲力竭，退轉都城死守，越軍圍困三年，最終越滅吳。

勾踐並吳，徐州會盟，受封伯，稱霸王。

楚國

越國北進，伐田齊，受齊宣王勸，因之伐楚。楚懷王敗越軍，越國分崩，公族或臣楚，或另立。

東瓯

浙南有東甌部落，是百越一支，地處浙南个溫州、台州、麗水許宕地。有記載寫，佢開國君主是無疆伐楚失敗後，留落來个後裔次子歐陽蹄，但有爭議。

中古時代

秦漢時期

秦朝

秦滅楚後，降越君，置會稽，吳越宕地形式上頭成秦會稽郡个一塊，郡治在吳、越兩國故都吳縣。前211年，秦王政自稱始「始皇帝」，建立集權，征伐四方。

前209年，秦二世元年，天下反秦，六國舊部尋機復國。項羽襲殺會稽太守，領八千江東子弟起兵。秦王子嬰降劉邦，項羽軍殺子嬰，焚咸陽宮，秦亡國。

漢朝

前202年，劉邦敗項羽，建漢，仍置會稽郡，一度封吳國。

東甌國受漢廷冊封，成外諸侯國，後因之吳閩戰爭畀迫內附，亡國。

前157年，漢景用晁錯，削藩，吳國在內个七國以「清君側」反，兵敗。

東漢，會稽治所遷至山陰，吳縣成吳郡治所。

漢末孫吳

漢末

東漢末年，王朗和嚴白虎佔浙，後富春人孫堅搭佢兒孫策、孫權一統江東。孫策臨終，命二弟孫權執掌江東，一面鎮壓山越，一面貤三征黃祖。

208年，魯肅勸劉備與孫會盟，劉派諸葛亮會合孫權。在赤壁之戰，都督周瑜、程普率軍，以少勝多，黃蓋以火攻在江上大破曹軍，曹操北退，自此三國成鼎立之勢。

周瑜死後，孫權從魯肅建議，分荊南四郡畀劉備抗曹。劉備取蜀後，孫權索要荊州三郡畀拒，派呂蒙奪取。雙方最後恢復同盟。

219年，關羽北伐曹魏，水淹七軍；呂蒙提議奪取江陵、襄陽搭白帝城，白衣渡江，奪取江陵、零陵、武陵、宜都，襲殺關羽。

220年，曹操死，曹丕繼，孫權先向曹丕稱臣。

孫吳

222年，鎮西將軍陸遜大敗蜀軍，孫權因之面臨曹魏進攻，貤出使搭劉講和。劉隨後死於白帝城，諸葛亮遣鄧芝為使，吳蜀復孟。同年，孫權拒送兒孫登做人質，斷絕搭曹魏个同盟，立年號黃武。

229年，黃龍元年，孫權稱帝，國號吳，改元黃龍，是為吳大帝。

241年，孫登薨逝，孫權立孫和為太子，封孫霸為魯王，引發「南魯黨爭」，最後孫亮畀立太子，孫霸畀賜死，舉國分歧。

252年，孫亮即位，改元建興。諸葛恪、孫峻多次北伐，都嘸得果。

孫綝處決重臣，後改立孫休，孫亮、孫綝三族畀孫休殺爻。164年，孫休死，孫皓即位，一度開明，後又暴虐，使得民怨不絕，將領叛降。曹魏滅蜀後，司馬昭兒司馬炎代魏受禪稱帝，建晉。274年，陸抗病死。280年，司馬炎派兵攻吳，吳軍大敗，孫皓降。

越人部落

歷經秦漢帝國郡縣統治搭孫吳時期个編戶，一部分越人畀漢化爻。但在郡縣制嘸及宕地，尤是山地海濱，一向有大量个越人原住民部落在墶。

山越

孫吳時期，山越搭各地「宗部」便常年搭吳軍打仗。至晉後，「山越」一詞用法逐漸消失，但會以弗同形式个族群名稱出現。

兩晉南朝時期

在建康（建業）建都个南方六王朝，包括爻孫吳、東晉、劉宋、南朝齊、南朝梁、南朝陳，也畀謳作「六朝」。箇時期，六朝詩、六朝志怪盛行，儒教、佛教、玄學、道教蓬勃發展，成為社會文化个代表。

兩晉

吳降晉後，吳越宕地受晉國統治。318年，「五胡亂華」情勢下頭，晉室南遷到南京，大批中原貴族和士大夫隨之，主要居住在南京周圍搭太湖个西面，是為衣冠南渡。

隆安年間，因之對上層士族个門閥統治弗滿，五斗米道教主孫恩在會稽八郡起義。佢兵敗後同部眾投海，佢妹丈盧循後貤起兵，最終也兵敗投海。

南朝

418年，劉裕改立晉恭帝，並在兩年篡位建國劉宋，東晉亡，開始「南朝」時期。440年，北魏統一北方，搭劉宋南北對峙。

將軍蕭道成獨攬朝政，後在479年篡位建國南齊，劉宋亡。502年，蕭衍在太子蕭寶卷弟南康王蕭寶融轉京前篡位，建國南梁，南齊亡。

梁武帝用東魏降將侯景北伐東魏，武帝兄畀俘獲後佢打算用侯景交換，因之侯景反叛，圍攻建康，史稱「侯景之亂」。最後，城破，梁武帝畀肚瞎死。

551年，廣州刺史部个番禺郡太守，吳興人陳霸先搭湘東王蕭繹派遣个王僧辯聯合攻滅侯景，後陳霸先因立王問題殺王僧辯。557年篡位，佢建陳，史稱南陳，是陳武帝，南梁亡。

陳武帝安撫僑姓世族搭吳姓世族，先擊潰王琳北齊聯軍，再據守巴丘阻當北周，穩定國勢，之後復甦江南經濟。

577年，北周南征兩淮，陳軍慘敗。581年，楊堅建立隋朝。陳宣帝死後，太子叔寶繼位，是陳後主。588年，隋文帝派楊廣滅陳。

隋唐時期

隋朝

隋文帝去除郡級，鞏固集權，廢除選官，設立科舉，控管江南大族。

在佢在位期間，為轉運江南物資鞏固開支，也為南北航運，修建爻大運河。

604年，佢兒楊廣宮變繼位，繼續興建運河，大修宮殿，四處征討，拓展版圖。掘河民伕死傷慘重。

佢四征高句麗，死傷百萬。來第四次時，將領叛變，民變四起，隨之群雄割據，隋廷土崩瓦解。

唐朝

617年，李淵在太原起兵，618年，迫使恭帝讓位，建唐。619年，李子通攻克江都，建國號吳，後畀杜伏威个將領輔公祏擊敗。輔公祏降唐，後貤反唐，兵敗被殺。

唐太宗時期，三省六部搭科舉選士制度形成。貞觀元年（627）開始，太湖流域个糧食物產開始畀徵調到北方去支援戰爭。

高宗中期後，皇后武氏協政，後帝後共治。佢因之搭唐中宗不合，另立四子，最後自立皇帝，改國號為周，即武周。晚年，中宗貤復辟唐，是神龍革命。

玄宗時期，府兵崩潰，設置九節度使。755年，安祿山以討伐楊國忠為名叛變，後兵敗，史稱安史之亂。箇後，唐失關東，江南在賦稅佔比迅速上升。

758年，唐設鎮東軍節度使，即浙江東道觀察使，治所在越州，下轄越州、睦州、衢州、婺州、溫州、台州、明州、處州。770年，廢為浙東觀察使。779年，搭浙西觀察合併，780年，兩浙貤分割。781年，兩浙合併成節度使，787年，兩浙分割，浙東長轄越州、衢州、婺州、溫州、台州、明州、處州，相當於衢江流域、浦陽江流域東面。中和之後，建號義勝軍（883年）、威勝軍（887年）、鎮東軍（896年），乾寧時，浙西个錢鏐來畀許兼併爻。

中唐時期，唐國內憂外患，820年，憲宗在大明宮畀宦官毒著死，唐失河北三鎮。

宣宗死後，懿宗與僖宗越發無道，政局混亂，經濟命脈江南畀破壞。875年，黃巢在冤句起兵相應王仙芝，後南下掠奪南方，大肆屠殺，入長安後稱帝，號稱大齊，史稱黃巢之亂，在昭宗時才結束。箇時候，唐帝已然成為藩鎮角力个戰利品。904年，朱全忠弒帝，另立昭宗子李柷，隔年，殺昭宗年長九子，史稱白馬驛之禍，之後，佢建國後梁，唐亡，五代十國開始。

吳越國

唐末

唐末大亂時，為抗王郢搭盜賊，杭州宕地地方武裝組織民圖，以石鏡都鎮將董昌是為總指揮。

879年，錢鏐率石鏡鎮兵阻擋黃巢軍，保全杭州。董昌後後奪取杭州，任錢鏐是都指揮使，將杭州八都。882年，浙東節度使劉漢宏畀八都兵大敗。886年，錢鏐擊破劉漢宏軍，佢走去台州，後台州守將杜雄畀佢獻畀錢鏐。893年，錢鏐被唐封作鎮海軍節度使。

895年，董昌在越州自立為帝，國號「大越羅平」，年號「順天」，錢鏐勸佢去號，但佢弗肯。後董昌聯合淮南楊行密襲蘇杭，錢鏐得著唐令，領八都兵伐董昌，攻克越州。

吳越國

907年，錢鏐畀封作吳越王。923年3月12日，佢畀後梁封作爻吳越國王，建國吳越。

947年，吳越國出兵援助福州軍閥李仁達抵抗南唐。戰後，李仁達以福州歸附。自此，吳越國轄一軍十三州：杭州（首都）、越州（東府）、湖州、溫州、台州、明州、處州、衢州、婺州、睦州、秀州、蘇州、福州搭安國衣錦軍。

兩宋時期

北宋

978年，北宋大軍壓境，吳越國君臣商議過後，獻土降宋。宋國在吳越國搭南唐東部設立兩浙路。

近世·近代

晚清時期

中西接觸

實際上，近世中西接觸之前，「中國熱」在歐已風行百年。倒賣公司撐扗盆滿缽滿，但通商爆發衝突依然弗斷。

中國有長期个自視是天朝上國，搭畀外國視為蠻夷或者藩屬个傳統，因之，清廷自認洋人來華是傾心慕化搭納貢稱臣。當時節，英國人相信假使搭乾隆建立良好溝通，佢會命使地方官員改革，增開口岸。1787年，英國遣查斯·愛倫·卡斯卡特使團訪華，但佢來路中央便死爻。

1792年，馬卡尼訪華，帶有各科專家，先進物事，意在彰顯文明。等佢見著皇帝，佢侇因之跪拜禮節上頭意見不一，引乾隆不懌。弗過，佢最終妥協，接著呈送國書。乾隆見著國禮，因之佢實際上蠻通西方地理，當時中西也有所交集，覺扗是平常物事；馬卡尼也因之清廷皇宮个華麗驚嘆。之後，佢在書面列出請求，要清國廣開口岸、列明關稅、允英商暫時居留，但畀敕諭全部駁回爻。乾隆強調天朝物產豐盈，無所弗有，認為弗該開箇例外。

打道轉府時節，佢由軍機大臣搭兩廣總督伴送，取道運河，來到吳越地區，經過杭州、到廣州轉英。在華五月，見聞頗多，佢在日記中記載爻清國各地个社會實情，感嘆清國个人民知識淺陋、生活困苦，國家武備廢弛，官員貪污腐敗，繁華虛有其表。

1816年，嘉慶廿一年，維也納和平背景下頭，英國再遷阿每士德使團到爻天津，貤碰著跪叩禮節問題。阿每士德畀帶到宮門口，還是拒絕行三跪九叩禮，最終畀驅逐。

第一次清英戰爭搭南京條約个簽署

關係官方化

1832年，道光十二年，英國取消東印度公司个貿易壟斷，任命上議院議員、海軍將官律勞卑（William J. Napier）作駐華商務總監，箇事干標誌爻中英關係个官方化。

1834年，佢抵到馬交，致信兩廣總督盧坤要求平等外交關係，弗等奏明，便先到廣州商館，投遞公函，嘸人願收。盧坤搭佢爭執不落，最終盧坤發令包圍英國商館，對佢斷糧。律勞卑隨即駛到黃埔，炮打虎門炮台，但盧坤離間英國商人搭佢个關係，佢感覺畀出賣爻，便撤出，在轉馬交弗就便病死爻。

之後，巴麥尊重掌外部，茄斯·義律(Charles Elliot)貤投遞書信畀拒，同年，英人貤在星加坡救起中國水手，期望以箇促進「和平與友好的關係」，通知兩廣總督鄧廷楨，但佢依舊認為「蕞爾小邦」弗配搭「天朝上國」並論。

禁煙斷糧

同時，在1729年（雍正七年），雍正便頒布爻禁煙令，但是弗但中國人需求大煙，英國商人也好撐鈔票，箇中央大量銀錢外流，引起朝廷關切。清廷屢屢再發令禁煙，但效果弗好，還滋生爻地方官員个監守自盜，朝廷裡頭，「弛禁」搭「嚴禁」吵个弗停。箇中，以黃爵滋為激進，佢認為要嚴懲中國煙民，湖廣總督林則徐表示贊成。

林則徐隨後提出六點方案，並在佢轄區裡頭實施。道光蠻滿意，遷林則徐到廣州查辦海口事件，史稱虎門銷煙。佢要求外商三日之內交出大煙，要弗便要收貨殺頭，每交一箱好賠畀商人五箱茶葉，但弗賠鈔票。洋商扣開始認為佢是行事敷衍，直到佢逮捕顛地，以畀公行總商殺頭威脅佢自首，才謳義律來處理。義律到後，林則徐包圍商館，軟禁商人搭佢六个禮拜，義律畀迫屈服。

1839年，林維喜案發生，林則徐要求義律交出水兵殺頭，但義律堅持依照英國法律程序審判爻六人。隨後，林則徐封鎖馬交，斷英人糧，兩日後，驅逐佢侇。義律帶兵船要求買糧，未果，兩國交火。

10月25號，林則徐對弗從佢命个船下令，三日內必須入港或者返程，要弗便縱火燒船。11月3號早界，關天培發兵船開向英艦，英國開砲，穿鼻之戰爆發。隨後，佢奉道光命全面封鎖，畀英人斷水斷糧。

遠征報復

儘管國內有弗同聲音，英國內閣議會決定派先遣部隊待命，準備進行報復（reprisal）。經過下議會辯論，最終批准遠征。

戰前，清朝全國上下認爲英軍實力遠遜清軍。7月，依照英國个北上訓令，英艦搭清艦在舟山開戰，英軍9分鐘便打垮全部清艦，登陸佔領定海。之後，英軍繼續北上，直逼大沽口，道光最後妥協，琦善搭一律在大沽口談判。琦善搭道光意見弗合，談判最終嘸果。義律失去耐心，英軍炮轟虎門砲台，大勝後繼續推進。兩國再次談判，但義律已經對琦善个態度生疑。英軍總攻虎門，清軍潰敗。義律要求停戰談判，遣船掛白旗，但遭襲擊。英軍報復進攻，最後佔領廣州。

楊芳、怡良、林則徐三人表面同意談判，但朝朝廷瞞報，道光發現疑點，因之繼續禁止通商。英軍再次進攻，三日後，廣州城投降，廣州知府在朝廷弗識个情況下簽《廣州和約》賠款，之後，英國撤軍。

北上入浙

英國方面，巴麥尊弗滿義律私擬个《穿鼻草約》，派砵甸乍任新个全權駐華代表。英軍第二次北上，閩浙戰爭爆發，英軍貤一次攻陷定海，後貤佔領鎮海過冬。赫，貤打落來寧波个威遠城池，佔領縣城。為之報復，道光殺爻大部分之後在臺灣擱淺畀清軍抓牢个英國戰俘。

1842年，在英國佔領下頭，舟山搭香港畀變作自由港。同年，揚威將軍奕經發兵反攻，四个鐘頭便打敗爻。英國也反攻，3月10號，寧波戰役爆發，15號，英軍佔領慈溪，清軍退到紹興、杭州。道光帝派人「先剿後撫」，但貤對佢遣个耆英「羈縻」弗滿。英軍繼續進攻，揚子江大戰爆發，英軍攻陷清國重兵把守个乍浦。

英軍繼續北上，進攻吳淞口，佔領上海，之後貤撤出，封鎖吳淞口，直逼鎮江。期間，上海畀撤退个清旗人、英兵搭當地平民洗劫。7月21號，英國進攻鎮江，切斷爻大運河漕運，打擊爻帝國个糧食調度。8月9號，英軍兵鋒逼到江寧城下，城內官員統一談判。

兩國簽約

8月21號，道光在英國堅持下頭授權簽約。8月29號，在英國軍艦康華麗號（HMS Cornwallis）上頭，大英帝國搭大清帝國代表簽署《南京條約》，戰爭結束。條約規定爻要再開四隻口岸，外國商人得著自由貿易權，英國領事得著搭地方官个溝通權，關稅由兩國協定，清廷搭英國支付戰爭搭大煙賠款，放走全部戰俘，赦免搭英人合作个臣民，英國在第一期賠款到賬後，會撤出軍隊，弗干涉中國貿易，但會留在鼓浪嶼搭招寶山（寧波），直到賠款全部解清。同時，香港作為直轄殖民地，畀清國永世割畀維多利亞女王。

中華民國時期

浙江東南島嶼戰爭

1949年，長江江防畀解放軍突破爻，國軍失去東南各省，退到沿海島嶼上頭。

1950年5月，浙江省政府機構搭人員隨國軍撤到台灣，省政府搭浙南行署撤銷。

弃守舟山之後，中華民國僅有在浙江東南个大陳列島（台州列島）、一江山、披山、頭門山、漁山、南麂等島，撤到島頭个縣政府包括爻溫嶺、臨海、黃岩、平陽、三門、樂清、玉環七隻。

1951年9月，蔣中正派胡宗南到大陳島建立江浙總部，還重设浙江省政府，搭解放軍繼續打仗。

1952年，浙江省政府七縣合併成溫嶺、臨海、平陽、玉環四縣，三門縣畀改成漁山管理局，還設爻竹嶼管理局，佢侇原來是搭大陸直接貿易个特區，赫一年後便裁爻。

1953年，蔣中正改成守勢，浙江省政府遷到台灣，當地再設爻一隻大陳地區行政督察專員公署。

1955年1月20日，解放軍攻陷一江山島，美國第七艦隊保護下頭，中華民國政府畀大陳島上頭个軍隊搭居民撤到台灣，隨後撤出南麂，浙江全境易手。