百越

来自 吴语维基百科
蹦到: 导航搜寻

百越也可以写作百粤(越粤互通),指个是古代东亚大陆东南部个百越先民个总称。又畀称为越族、古越族、越人、古越人,是指住勒古代长江以南个古代部落。百越有弗少支系,譬如说于越(吴越、於越)、干越、扬越、东瓯、闽越、南越(南粤)、西瓯、驹越、骆越等十几支。搿点支系对今朝中国东南沿海个各个民系包括越南个民族个语言搭文化侪有交关大个影响。

历史[编辑]

根据史料个记载,勒嘞商、 周个辰光,就有畀称之为“越”个古民族(最初搿个字畀写作“戉”),生活勒今朝中国个东南搭南部地区。到之周代个辰光,百越各支就差弗多初步形成哉。 春秋晚期到战国前期,越族当中个于越(於越)曾经勒今朝江浙一带建立之强大个越国吴国(勾吴),其中越国共传八代,历经一百六十几年,跟搿许辰光个中原国家会盟,控制之江淮地区,号称“霸主”。《史记》浪记载“越王勾践世家”。不过,研究百越族个中国学者宋蜀华认为:“勾践的祖父夫镡以上至夏少康庶子无余,世系不清楚;夏少康经商至周敬王共六十余代,两者世系相差近一千年,把越王勾践说成是夏少康的后裔,实难信服”此外,宋蜀华也认为夏文化搭越文化完全弗同,因为夏人活动地区从朆发现过‘印纹陶文化’,不过‘印纹陶’流行地区也从朆发现过“二里头文化”。一般史学界认为勾践是夏少康后裔个说法弗可信。 根据目前考古学的证据,离今朝七千年前头个浙江“河姆渡文化”遗址,应该就是古越族所创造出来个文化。河姆渡遗址发现之稻谷、稻草搭稻壳个堆积,是搿许辰光世界浪发现个最早个稻作文化。此外,现在个考古学家也普遍认为,广泛分布勒中国南方各地个以几何印纹陶为主要特征个文化遗存,可能也是由古越族所创造出来个。最近数十年来的考古发掘表明:搿种以几何印纹陶为主要特征个文化遗存,勒辰光浪从四千多年前个新石器时代晚期开始,一直延续到商、周、秦、汉个辰光,勒空间浪遍布勒中国东南地区及岭南一带,也就是百越杂居个地区。 到之秦汉交替之际,百越又先后建立之南越,东越搭东瓯三个国家。搿个三个国家先后畀汉朝灭脱。之后勒嘞搿几个国家个土地浪设置之闽中、南海、苍梧、郁林、合浦、交趾、九真、日南等郡。前110年,杨仆领军对从合浦郡徐闻县渡海,占领之海南岛。汉朝拿俚设为儋耳、珠崖两郡,搭前面七郡一淘隶属于交州刺史部。

文化语言[编辑]

百越各支个语言侪是属于侗台语系个。其中,北面个于越(吴越)个语言受到之古楚语个影响。勒嘞春秋战国个辰光就开始使用鸟篆记录自家个语言哉。现在出土个吴国搭越国个文物包括越王勾践剑浪侪有鸟篆铭文。 百越个语言搭文化侪对今朝中国南方地区个语言文化产生影响,今朝个吴语,粤语等南方语言有弗少词汇搭语言现象侪来源于百越。 现在住勒中国南方属于侗台语系搭苗瑶语系个各个少数民族,弗关是勒语言浪,还是勒文化习俗浪,侪与古代个百越族有一定程度个关系。此外,也有种学者认为,勒现今个中南半岛浪个有种民族,譬如说泰国个泰族、老挝个佬族、缅甸个掸族、越南个京族搭芒族、甚至属于南岛民族个台湾原住民,也侪搭百越族有一定程度个关联。

参考资料[编辑]

1. 《社会诵诠》严复 2. 《试论百越和百濮的异同》黄现璠 3. 新浪新闻,南岛民族源于大陆百越,2008年06月13日