侯景之乱

吴语维基百科,自由个百科全书
跳到导航 跳到搜索

侯景之乱(吴拼:Gheu-King--Tsy Loe),是中古南北朝后半段个一场大型动乱。具体是北齐叛将羯族侯景南朝梁武帝萧衍发动个军事攻击行为。昰桩事体带来著江东士族个动荡搭大规模消失,梁帝国也在动乱当中灭脱;之后土著陈霸先摆平所有势力,担北方干涉力量赶脱,在建康建立著六朝当中阿末一个朝代陈朝

背景[编辑]

公元六世纪三十年代,北魏帝国畀高欢宇文泰两只大军头分割,形成东西对峙个局面。高欢担渠自麾下个大将侯景派到黄河南许,成为著此地个实际军阀。侯景对高欢还算服帖,弗过,搭高欢个儿子高澄关系邪气推板。还话:[王(高欢)在,吾不敢有异;王无,吾不能与鲜卑小儿(高澄)共事!]。547年,高欢死脱,侯景怕渠自畀高欢场儿子杀脱,便公开叛乱。开初渠隑著西魏,弗过关陇贵族弗出兵相帮,衹畀渠一眼空头支票(封太傅河南道行台上谷郡公)。昰然,侯景便貤派人到建康梁武帝求救。梁武帝居歇已经八十几岁著,事干妆弗灵清,因为渠自做梦话中原有大将投奔,个记觉著应景,就接纳渠。

经过[编辑]

矛盾迭起[编辑]

梁武帝接纳侯景,是忖著河南地个土地面积大,挨牢著中原;弗过,块油肉一歇歇便在东魏搭西魏个夹击当中消失脱著。东魏派出慕容绍宗攻击侯景,西魏也派著军队接收侯景个土地。侯景两头全打弗过,便喊梁武帝派人帮衬渠。梁武帝派渠场侄子萧渊明来相帮,弗曾忖,畀著东魏击破,萧渊明也畀渠场捉牢当著俘(fu1)虏。开年一月,慕容绍宗彻底担侯景击溃。侯景带著百横里个人跑到淮南梁帝国境内,河南地彻底畀东魏收复著。梁武帝如意算盘落空,心里对侯景也开始冷落起。侯景在南朝,也根本融入弗在南窜门阀个规则里向去。开年,东魏让俘虏萧渊明写信畀萧衍话,好和谈。侯景担心渠自成为两只帝国当中个炮灰搭筹码,便极力劝梁武帝弗要相信东魏;却情,梁武帝全科弗听。

撦破面孔[编辑]

侯景居歇辰光惶惶弗可终日,觉著渠自命弗久矣。渠为著试探梁武帝,便派人冒充东魏来信,讲好用侯景个人头调萧渊明。梁武帝担著兹封假信之后,话咾全盘接受。还讲[萧渊明早丄转来,我黄昏便担侯景送转去]。侯景听著著,决定叛乱。

居歇侯景个军队在淮南。渠废脱田赋,吸引两淮个流窜人口编在军队当中来,充当渠自个炮灰。貤搭梁帝国有二心个宗室勾结;另外一头,对外宣称为著防卫须要,问梁武帝讨粮草讨军饷。别人全眙出来有问题,萧衍弗听,一味姑息。548年十月(梁帝国太清元年),侯景在淮南叛乱,侯景之乱开始。

东南涂炭[编辑]

一开始梁武帝根本弗担侯景当桩事体,还讲[是何能为,吾以折棰笞之!]。派出蛮多宗室搭将军围剿侯景。梁帝国个军队,多年弗曾进行大规模战争,战斗能力低落,侯景声东击西,用游牧人顶欢喜个流窜思路,弗畀梁帝国军队捉牢,一直在淮南地区荡来荡去。梁武帝貤派萧正德当总帅,都督京师军队,到丹阳去镇守。弗曾忖,萧正德老早搭侯景暗通款曲,担侯景军队暗渡到江东。侯景军队过江,大部分梁帝国个贵族全弗曾忖著,无何应对个办法。梁武帝渠自也大惊失色,让渠场太子萧纲负责建康防卫,派羊侃协助防卫。

侯景十一月开始围攻建康,靠萧正德内应,月底便攻破外城,扶持萧正德当皇帝。侯景自封丞相。居歇,梁帝国个藩王也派军队或者亲自来勤王。弗过,除脱著邵陵王萧纶带来一定威胁,别个军队全作壁上观,十二月,侯景貤担地方官个勤王军队击破。549年三月,侯景攻克台城,话渠自是清君侧,担渠自弗中意个人统杀脱,五月,担梁武帝饿死,胁迫太子萧纲即位(梁简文帝),自以为好当皇帝个萧正德一场空梦,想杀脱侯景,事发,侯景派人担渠绞死。

之后,侯景派军队对吴越地区开始三光形态劫掠。本地士族全造碉堡反抗。侯景暴怒,命令凡是占领个场许,老百姓要统统杀脱。兹当中,吴兴损失顶大;到年底,吴越地区全畀渠控制。渠便自封宇宙大将军

梁军反攻[编辑]

550年,侯景开始对西向用兵,本生热衷内斗个梁帝国藩王也开始为著自保,对渠直接开战。其中,湘东王萧绎个军队对侯景打击顶大,渠个大将王僧辩在巴陵击破侯景助力,到夏天,瘟疫流行,侯景开始撤退,王僧辩会同其余部队,一路追击,秋天收复九江。同一辰光,交州刺史陈霸先(后势来个陈武帝)从南康北伐,一路击破侯景个部队,八月搭王僧辩联合击破侯景主力。侯景气急败坏,转去建康之后,担梁简文帝废脱,扶持梁武帝个曾孙,囡细萧栋当傀儡皇帝。三个月之后,貤让渠禅位畀自家,自立大汉帝国,自称大汉皇帝

缪丑覆灭[编辑]

552年,陈霸先搭王僧辩个部队开始对侯景进行讨伐,在当涂担侯景主力击破,月底进入秦淮河。侯景命令从石头城上向担石头全厾在河浜里向去,渠自跑到台城固守。弗过昰排全是雕虫小技哉,王僧辩直接猛攻石头城,攻克来快险;台城里向个军队也开始翻盘。侯景走投无路,带领几百心腹望东流窜到苏州。戡乱军队追击,侯景跑到长江北向;四月,畀渠自部将杀脱,尸体送到建康,王僧辩暴其尸于市,军民争相食用,侯景之乱算是大体平定哉。

影响[编辑]

侯景之乱对南朝有毁灭个打击。本生个士族势力灭脱,经济大面积萧条,人口急剧减少。弗过,另外一方面,侯景作孽个建康地区,主要是南窜士族个大本营。吴姓士族搭南方土著虽然也挨著渠个屠杀,弗过损失终究小著一眼。加上吴越土著陈霸先个发家大本营是百越人集聚个交州,侯景之乱个结果,让遭受压迫几百年个南方土著扬眉吐气,重新成为著东南地区个主人。