孙权

来自维基百科
蹦到: 导航搜寻
孫權

吴大帝孙权(182年-252年农历四月),字仲谋,吴郡富春(㬮朝浙江富阳)人,三国辰光大吴帝国个开国君主,尊号大帝。渠在222年称吴王,建立吴国;229年称帝,建立吴,即东吴

身世[编辑]

富阳军阀[编辑]

孙权机关吴郡富春,生在东汉光和五年。渠出生个家族是东汉阿末阶段冒出个富阳孙氏。渠场阿伯孙坚搭阿哥孙策,在东汉末年个局面当中,建立孙家个军阀势力,外加慢慢然担渠自个故乡吴越扩充到自个控制范围里向。建安五年(200年),孙策死脱,十八岁个孙权即位,成为江东事实丄个统治者。

定鼎江东[编辑]

建安十三年(208年),孙权面对吞脱荆州曹操,拣择搭流窜军头刘备结盟,让渠自个大将周瑜担任大都督,在赤壁之战当中击破北方军队,奠定三国鼎立局面。之后,孙权担首都迁在建业(㬮朝南京)。居个也是南京正式建立大城市个开始。建安廿四年,孙权派吴越民族英雄吕蒙,击败赖在荆州个山西人关羽,吞并荆楚,从此把牢东南全境,领土大险。毛一年后,渠麾下另一位吴越豪杰陆逊貤在夷陵之战灭著刘备个军队,从此,东吴疆域稳固。

称王称帝[编辑]

公元222年,魏国册封孙权当吴王,孙吴事实独立,并开始使用自个年号黄武。七年之后,孙权正式称帝独立,年号改成功黄龙。孙权称帝后,执行搭蜀汉接近,拉拢蛮夷,对付魏国个策略,让魏国弗好南侵。同时,为扩大渠自个直辖编户齐民,渠也妆起剿抚山越个策略。同时,派人到海外捉百越人当渠自个人力,黄龙两年(公元230年),渠个臣子卫温诸葛直便走台湾,捉著交关百越人当奴隶。

继承风波[编辑]

孙权寿命长险,活著七十几岁,然也造成渠自在继承人问题丄有反复,引发臣子内斗,朝政混乱。太元元年,孙权死在建业,享年七十一岁。渠在位三十年,谥号大帝,庙号太祖。坟头在南京老城东面梅花山上向。

贡献[编辑]

孙权确立对江东实际统治个同时,北许个曹操率领大军南落,吴越人江东存亡受到威胁。孙权手下个大将周瑜赤壁曹操个主力部队灭脱,彻底让曹操统一帝国个幻想破灭,保存著吴越独立性,为之后江东个发展奠定著基础,影响邪气深远。

评价[编辑]

孙权对吴越个贡献,搭渠自个人格魅力,让渠受著交关好评,司马光赞许渠【大帝承父兄之烈,师友忠贤,以成前志,赤壁之役,决策定虑,以摧大敌,非明而有勇能如是乎?奄有荆扬,薄于南海,传祚累世,宜矣】。却情,渠自个一眼缺陷,也畀后人直言弗讳然指出,《三国志》个作者陈寿便讲渠晏年反复无常,埋落祸根。[1]


前任:
孙策
大皇帝
229年252年
继任:
孙亮
Commons-logo.svg
维基共享资源里向寻得着搭该篇文章搭界个多媒体资源:
  1. 陈寿. 三国志 吴书二. 国学原典.