孙亮

孙亮（243－260），字子明，三国个辰光吴国第二位皇帝，公元252－258年在位。俚是吴大帝孙权搭潘皇后个第七个倪子，252年孙权死脱过后即位，258年畀权臣孙綝废为会稽王。

生平

孙亮是吴大帝孙权最小个倪子，所以一开始俚弗是太子。但不过，俚个长兄孙登、二兄孙虑老早就已经死脱哉，三哥孙和因为畀陷害而畀废脱之太子个位置，四哥孙霸因为图谋夺嫡畀赐死。最后孙权就立孙亮为太子，立俚个娘潘氏为皇后。 潘后勒252年畀宫女杀脱，同年孙权也死脱哉，孙亮继位，搿许辰光只有十岁。

孙亮即位个辰光，由太子太傅诸葛恪、太常滕胤、侍中武卫将军孙峻等人辅政。诸葛恪勒孙亮继位过后就出兵北伐，进攻魏国，但不过最后吴军战败，伤亡惨重，朝野侪对诸葛恪怨声载道。建兴二年（公元253年），孙峻勒得到之孙亮个同意之后，发动政变，杀脱之诸葛恪。之后孙峻做之丞相大将军。 孙峻个地位弗哪哼稳定。勒俚杀脱诸葛恪之后，有弗少人侪想暗杀孙峻，但最后侪失败哉，搿点人侪畀迫令自杀或处死。五凤二年（公元255年），孙峻带兵搭魏国勒淮河一带交战获胜，魏将文钦投降。第二年，孙峻派吕据等将领进攻魏国，但孙峻勒战争个辰光病杀脱哉，俚个从弟孙綝接掌权力。大司马吕岱也勒搿一年死脱。 引发之另外一次政变。骠骑将军吕据等人弗满孙綝个继任，要求封滕胤为丞相。孙綝呒没睬俚哚个要求，转封滕胤为大司马，吕据就搭滕胤密谋推翻孙綝，但不过最终失败畀杀脱。另外一位将领王惇也密谋杀脱孙綝，也因为事体失败畀杀脱。太平二年（公元257年），孙亮亲政，但施政一直畀孙綝牵制。孙亮对孙綝个独断专行相当弗满，暗中搭全公主、太常全尚、将军刘承谋划准备杀脱孙綝。 搿一年，魏国个诸葛诞勒寿春发动叛乱，拿倪子诸葛靓送到吴国做人质。孙綝派兵帮诸葛诞但不过最终失败。有种参战个将领因为怕畀孙綝杀脱而投降之魏国。

太平三年（公元258年），孙綝发现孙亮想杀脱自家，就领部曲拿全尚抓牢，派俚个兄弟孙恩杀脱之刘承，领军包围皇宫，废脱孙亮为会稽王，改立孙权六子琅琊王孙休为帝。又派中书郎李崇带兵进宫，夺取之印玺，逼孙亮夫妇离宫，由将军孙耿押送到会稽（今朝绍兴），搿一年只有16岁。永安三年（公元260年），孙亮个封地会稽传出谣言，说孙亮就要回到建业复辟；而孙亮个侍从也讲孙亮勒祭祀个辰光口出恶言。 孙亮再畀贬为候官侯（候官，今朝福建省闽侯县），再拿俚送回封地，孙亮之后就死勒路浪。根据相关记载，孙亮有可能是自杀，也可能是畀孙休派人毒杀脱个。搿一年只有17岁。

亲眷

后妃： 全惠解，全尚个囡鱼，253年畀立为皇后 据晋朝王嘉《拾遗记》，孙亮有四名爱姬：朝姝、丽居、洛珍、洁华 子女： 呒没记载