孙策
孙策(吴拼：Soeng--Tshak），字伯符，是富阳孙氏集团二代目，破虏将军、长沙太守孙坚场大儿子，孙权场阿哥。渠在阿伯死脱之后接班，武功邪气结棍，无几许年数便统一江东，是吴帝国个奠基人物。绰（chiak4）号小霸王。
生平[编辑]
孙策在汉灵帝熹平四年（175年）在吴郡（㬮朝苏州）出生。是孙坚场大儿子，阿母是吴夫人。孙策小辰光受著渠自爹（da1）个重视，当成嫡长子培养，文武全用心险。十几岁个辰光，搭家人一淘待(teng1)在寿春，伉淮南地区个名士结交起，兹当中，便包括周瑜，两个人碰头之后，关系好来邪，成为莫逆之交。
汉献帝初平二年（191年），黄祖杀脱孙坚，孙策接替自家爷，成为著二代目。为报仇雪恨，先投靠袁术，一家门迁到长江北向个江都。兴平二年（195年），孙策讲要帮袁术扩张领地，袁术答应担老早渠场爷个军队还畀渠。昰然，东渡长江，进攻起居歇江东个军阀，包括樊能、于糜，张英咾排。蛮快便担渠场击破。之后，孙策湴过长江，到曲阿，搭东汉王朝个扬州刺史刘繇决战（曲阿之战)，破脱刘繇。建安元年（196年）孙策湴过钱塘江，进攻会稽王朗，外加对待在吴郡个土著严白虎开战，全获著胜。建安二年（197年），袁术自称皇帝之后，孙策替袁术决裂。建安二年（197年）夏，曹操拉拢孙策，要渠讨伐袁术，任命渠当骑都尉，袭父爵乌程侯，会稽太守，之后，曹操貤赏孙策讨逆将军，并封为吴侯。建安五年（200年）4月，孙策准备北伐个当口，出现变故。渠在丹徒狩猎过程中碰著刺客，受伤，无几许辰光便死脱，年仅廿六岁。渠个阿弟孙权接班。三十年之后孙权称帝，追谥渠场阿哥孙策长沙桓王。
人品[编辑]
孙策作战能力邪气结棍，个人魅力也足，弗过因为是年轻人，比较气盛，得罪著弗少本地势力，兹也成为著渠遇刺个元因之一。陈寿讲孙策：[为人美姿颜，好笑语，性阔达听受，善于用人。是以士民见者，莫不尽心，乐为致死。][策英气杰济，猛锐冠世，览奇取异，志陵中夏。割据江东，策之基兆也。]《吴录》讲渠[孙将军为人，恶胜己者，若每问，当言不知，乃合意耳。如皆辨义，此必危殆。]