陈霸先

吴语维基百科,自由个百科全书
跳到导航 跳到搜索
陈武帝

陈霸先 (吴拼:Jing--Po-Siae)(503-559)兴国小字法生吴越吴兴郡长城县(今浙江长兴)下若里人,是南北朝辰光南朝陈个开国皇帝,史称陈武帝,志度弘遠,恭儉勤勞。终结衣冠南渡后北方流亡士族把持国家个历史,是南朝唯一个吴越人皇帝。在吴越历史上向具有邪气重要个地位。557年-559年在位。登基之前,渠是南朝梁个名将。

身世[编辑]

陈霸先在梁帝国天监二年在吴兴出生,渠自家庭条件弗大灵光,从小欢喜舞枪弄棒,肌肉发达,在乡里是一条好汉。大同年,梁帝国宗室萧暎担当吴兴太守辰光,担渠提拔,之后带到岭南交州地面,当亲兵头领。许歇岭南土豪蛮多反抗梁帝国个,陈霸先拉拢本地其余土著势力,胡萝卜配大棒,担渠场一一消灭平定,个能,就奠定自家个名声搭威望。萧暎死脱之后,渠接替位置,成为交州司马,大同十一年,担交州彻底平定,548年,成为岭南事实意义浪个大军阀。

侯景之乱发生之后,陈霸先准备带病勤王。弗过,蹲在广州个梁帝国宗室萧勃无心相去讨伐侯景,陈霸先就到湘东王萧绎个江陵幕府效力。之后,陈霸先搭王僧辩在江西会师,一道攻破侯景,552年,担侯景之乱平定。之后,萧绎称帝,陈霸先在京口驻扎。个辰光渠弗曾有称帝个想法。弗过局面一歇歇就彻底变化。554年,西魏攻破江陵,杀脱梁元帝。之后北齐开始干涉梁帝国朝政,扶持老早被渠场俘虏个萧渊明做北齐个傀儡皇帝。陈霸先弗允许,王僧辩倒是赞同,个能,陈霸先搭王僧辩决裂,担王击杀,之后北齐大军南侵,陈霸先又担萧勃搭北齐干涉军队全击破,让吴越地区获得安宁,个辰光,梁帝国个王室已经是陈霸先自家个傀儡,渠也就顺水推舟,担弗作兴个梁末帝废脱,自家在557年十月称帝,成为陈帝国个开国皇帝。

559年六月,陈霸先生毛病,在建康驾崩,享年五十七岁,侄儿子陈蒨即位,八月,上谥号武皇帝,庙号高祖。同月,在万安陵下葬。

评价[编辑]

  • 《陈书》:[倜傥大度,志度弘远,不理家产,明达果断,为当时所推服,][及长,涉猎史籍,好读兵书,明纬候、孤虚、遁甲之术,多武艺。]
  • 姚思廉:[高祖智以绥物,武以宁乱,英谋独运,人皆莫及,故能征伐四克,静难夷凶。至升大麓之日,居阿衡之任,恒崇宽政,爱育为本。有须发调军储,皆出于事不可息。加以俭素自率,常膳不过数品,私飨曲宴,皆瓦器蚌盘,肴核庶羞,裁令充足而已,不为虚费。初平侯景,及立绍泰,子女玉帛,皆班将士。其充闱房者,衣不重彩,饰无金翠,哥钟女乐,不列于前。及乎践祚,弥厉恭俭。故隆功茂德,光有天下焉。]

族群[编辑]

陈霸先出生土著寒门家庭,在重视门第个南朝社会,是邪气无地位个。盖咾,虽然渠在现实当中一直使用大量土著土豪作为高官,但表面上向又要装点门面,讲自家是何颍川陈氏个后裔。认汉帝国个太丘长陈蹇做自家祖宗。

纪念[编辑]