上海

来自维基百科
蹦到: 导航搜寻
上海市
Shanghai montage.png
從左上到右下:浦東陸家嘴、浦西外灘豫園、南京路、世博園
简称
别称 申城
China Shanghai.svg
上海市个地理位置
概览
国家 中华人民共和国 中华人民共和国
区划类别 直轄市
政府驻地 人民大道200號
现任市長 楊雄
现任市委書記 韓正
城市精神 海納百川 追求卓越 開明睿智 大氣謙和
方言 吳語太湖片蘇滬嘉小片上海言話
民族比例 漢族 - 98.8%
回族 - 0.35%
其它
时区 東八區
市树 白玉蘭
市花 白玉蘭
电话区号 +86 (0)21
车牌首号 滬A、B、D、E、F、G、H、J、K、L、M、N[1][2]
滬C(郊區)[3]
网站:上海市政府官方網站
查看模板及說明

上海上海言話[zãhe]),簡稱滬,別稱申,是中華人民共和國直轄市之一。勒拉中國東部長江沖積三角洲,瀕臨東海,勒浪長江入海口南岸。眼門前中國發展得頂快个城市,也是經濟頂發達个城市之一,伊撥認爲是中國个商業搭金融中心,是全世界公認个全中國頂大个城市。上海勒拉歷史是一個以吳越人爲主體,並接納交關世界各地人口个城市,勒拉1949年人口已經超過500萬。乃朝常駐人口超過兩千五百萬,箇當中,50%以上是從內陸湧入个其中安徽省湧入个超過300萬,排移民个習俗搭上海本土居民有蠻大个差別,已經引發替代搭扭曲本地文化个問題。

中華民國个辰光,上海是亞洲頂大个城市,也是東亞頂頂重要个工商業中心,撥公認爲東方巴黎。1990年起實行个浦東開發開放政策使得上海經濟發展迅速,並勒2005年成立國家綜合配套改革實驗區。

2005年上海年貨輸送量有得4.43億噸介多。2006年成爲世界高頭第三大集裝箱港口,輸送量有得2171萬標準集裝箱,勒拉新加坡香港个後頭。到了2008年,上海港有个各類碼頭1200多隻,萬噸級以上个生產性泊位137個,碼頭線總長毛115公里,每年輸送量有个58170萬噸,最大靠泊能力15萬噸級。至2010年,上海港已成爲世界最大个集裝箱港。

2006年上海个GDP爲2,972億美金,個人GDP已經達到了12,748美金。2010年,世界博覽會勒上海舉行。另外,2009/2010年上海个人類發展指數達到0.908,成爲大陸最高,也是唯一一個達到極高人類發展指數个中國城市。

上海是大陸个商業幫經濟中心,地區生產總值勒大中華區城市中排第一位。上海頂重要个產業是商貿流通、金融、資訊、製造等。上海也是中國个鐵路幫航空个樞紐,上海个港口是世界高頭最大个集裝箱港之一,已經成爲一個國際金融跟航運中心。

行政區劃[编辑]

時至2011年末,上海有17個區,共108個鎮,2個鄉,99個街道辦事處,3852個居民委員會搭1632個村民委員會。 [4]

2009年5月6號,原來个南匯區搭浦東新區並脫了。[5] 2011年7月26號,原來个盧灣區搭黃浦區畀並脫了。 [6] 2015年12月30號,原先个閘北區跟靜安區並脫了。 [7]


歷史[编辑]

詳情參見上海歷史上海近代史

建城搭發展[编辑]

勒拉公元751年(唐明皇天寶十年),設華亭縣。1277年(元朝至元十四年)拿華亭縣升級爲華亭府,第二年改叫松江府。到滿清人个辰光松江府轄有華亭、婁、上海、青浦、金山、奉賢、南匯7隻縣搭川沙撫民廳。蘇州河以北於1218年1月7日(南宋嘉定十年十二月初九日)設嘉定縣,後頭又從當中分出一部分作爲寶山縣。

上海市區原先是蘇州河下游个一隻漁村,至唐宋逐漸成爲繁榮个港口。南宋辰光(1265-1274年)建上海鎮,因勒拉黃浦江西面个上海浦得名。到明朝辰光,上海已經成爲江南有名个貿易中心,老縣城中央修造豫園城隍廟書隱樓等建築物。明朝末年,西方个耶穌會傳教士利瑪竇搭上海人徐光啟合作,翻譯《幾何原本》,也拿天主教傳播到上海哉。

近代遠東第一城[编辑]

清朝之後,上海繼續發展,到嘉慶辰光,已經成爲全帝國頂大个貿易港口之一。由於優越个地理位置,也吸引到西方文明國家个注意。來勒1842年南京條約簽署後,上海成爲帝國對世界開放个第一批口岸,大英帝國勒箇𡍲開闢租界地。法蘭西之後幾年也勒洋涇浜以南開闢租界。上海近代个城市景觀開始形成。

1930个上海 遠東第一城市

1927年設立上海特別市,1930年5月改叫上海市。迭個辰光,上海个發展已經搭國際接軌,外灘向修造交關西洋折中風格个銀行建築物。形成著名个“萬國建築博覽會”。勒南京路高頭,四大百貨公司開始修造新个百貨商場,大小弗亞於紐約搭倫敦。南京西路到靜安寺一帶成爲有鈔票个資本家修造大莊園个場所。來勒法租界霞飛路,中產階級个新式里弄一片片被房地產開發商規劃。1917年之後逃難來个白俄,開始逐漸融入上海个生活,伊拉居住个岳陽路地區,現在還有一尊普希金銅像,作爲迭個辰光个見證。

國民黨爲了搭租界裏向迭個國際化、文明化个上海相抗衡,大力開發江灣地區个建設,準備拿江灣地區修造成弗亞於市區个上海特別市。勒拉1929-1937年,國民黨政府先後修造了江灣體育場上海特別市政府上海特別市博物館上海特別市圖書館等建築物,展現明顯个中國宮殿風格。

勒拉虹口地區,日本人從一戰之後就弗斷擴充實力,勒拉現在个四川北路地區,修造了自家个神社、本願寺,一副東瀛情調。多倫路高頭个內山書店,也體現出迭個辰光日本人來勒虹口地區个巨大影響力。

1840年以後,上海老早是畀逼勒開放个港口。結果來了交關外國人,勒浪上海開租界。渠拉有自家个法律搭仔行政機構。還有交關猶太人逃到此地,勒浪上海開店鋪,扒仔木老老鈔票,變成功富翁,還勒浪上海造仔交關多个房子。哈同、沙遜就是其中鼎鼎有名个猶太人。1949年以後,伊拉儕跑脫哉。

1941年太平洋戰爭爆發之後,日本搭當時辰光个汪精衛政府簽署條約,來勒日本佔領區廢脫老早个租界,隨後英美等國也搭當時來勒重慶个蔣介石政府簽署條約,宣佈廢脫租界。告咾,到1945年二戰結束个辰光,保持一百多年自治个上海近代社會體系也宣告解體哉。

來勒國共內戰辰光,上海充當國民黨政權个經濟中心,不過因爲糟糕个財政搭飛漲个軍費,國民黨老快就碰到用鈔票个問題。到1948年,金融狀況一塌糊塗,又因爲國民黨來勒軍事高頭个無能。到1949年5月,上海畀共產黨佔領。國民黨來勒離開上海之前,拿上海金庫內交關黃金運到臺灣。

計劃經濟下个轉型[编辑]

1949年之後,上海徹底切斷自家搭世界其他市場个聯繫。金融市場畀取締,銀行業搭私有經濟被強制轉軌。老早喧囂个外灘,徹底改變用途,上海發展个重點,畀歸納到工業中心高頭。來勒之後交關年數,上海製造成爲中國名牌个同義詞。來勒同一個辰光,上海个城市規模也繼續擴大,老早認爲个租借地區已經弗好容納介多人口,告咾市區向東北搭西面擴展。徐家匯田林新村曹楊新村儕來勒迭個一段辰光開始形成。上海人个職業,徹底圍繞工業進行發展。大部分上海人成爲各種各樣个工人。

城市規劃方面,老早个石庫門房子撥拆脫比較少,衹有來勒市中心老早个哈同花園撥拆脫,修造蘇聯斯大林風格个上海展覽館。上海人口來勒迭段辰光增長比較快,不過儕是自然增長,所以家家戶戶个用房儕比較緊張。來勒老城廂搭南京路等地段。上海三代同堂,蹲勒一間房間裏過夜是平常事體,箇也讓上海人來勒租界辰光形成个“門檻精明”个形象進一步加深。

來勒50年代到70年代,上海个外來人口流動也因爲戶籍政策徹底停滯,整整一代上海人開始來勒純粹个上海言話環境當中成長,迭種環境也讓三十年代來上海个淮揚地區移民搭四十年代末个南下幹部子女,接受海派文化,對上海當代文化个形成,起到交關大个作用。來勒六十年代,有老多个上海工廠搬遷到內地,作爲支援大三線个舉動。又有交關上海年輕人上山下鄉,伊些舉動,儕是計劃經濟辰光个特有產物,不過,箇代人个青春也嗷著荒廢脫哉。

開放後个動盪[编辑]

1978年之後,上海也開始慢慢改革開放,不過來勒八十年代,主體面膜還是沒啥大个更改,上海依然是以工業爲主个城市,上海人依然是各行各業个基礎,不過七十年代開始个計劃生育已經讓上海个人口增長開始減慢。到1990年代,上海个浦東地區來勒中央个政策下開始開發,上海重新發展起老早撥取締个金融市場。不過上海老早文化中心个地位,已經弗可能恢復哉。

2000年代後,上海外來人口流入猛增,外來人口个規模,從2000年个一百多萬人,猛增到2012年个一千八百多萬人,來勒絕對數量高頭已經超過本地戶籍居民。加上外來人口絕大多數是青年人,告咾對上海各个方面儕帶來邪氣大个衝擊。現在來勒上海碰到講河南話人个概率已經超過碰到講上海言話年輕人个概率,長此以往,上海个面貌必定將發生顛覆性个變化。

方言[编辑]

上海閒話,一般指上海个市區裏向个閒話,屬於吳語太湖片个蘇滬嘉小片(也有得另外一種講法,就是上海市區閒話應該從蘇滬嘉小片當中獨立出來),也有眼人拿上海言話叫作“滬語”。迭個講法雖然行情行市个人勒許用,但是弗是最準確个。上海閒話屬於吳語迭一點是邪氣肯定个,尤其近吳語个地位受到城市化搭仔普通閒話个威脅。

上海閒話个歷史[编辑]

上海老早屬松江府,曾隸屬嘉興轄下頭,語言也以嘉興閒話爲主。松江府成立之後,松江地區閒話勒嘉興閒話个基礎上獨立發展,形成吳語中發展相對滯後个松江閒話。根據老早《松江府志》个記載:明代是“府城視上海爲輕,視嘉興爲重”个。而到清朝變成功“府城視上海爲輕,視蘇州爲重”。蘇州閒話因其權威性搭之邪氣豐富个文學形式(吳語小說、傳奇、彈詞搭民歌等)對上海話也有過交關重要个影響。

上海開埠後移民行情行市个湧入,各路移民个裏向个閒話對上海閒話个形成造成了一番影響,特別是寧波閒話。因爲寧波人數量大、搭之有社會地位,現在上海話个第一人稱複數“阿拉”就是從寧波閒話伊面搭來个.。箇形成以上海本地閒話(松江閒話)爲主,多種吳語方言(蘇州、寧波閒話爲主)个共存、混雜搭融合个新上海閒話。新上海閒話繼承了老上海話个基本特色,有北部吳語个主流特徵,一記頭成之太湖片吳語區發展頂快个方言,也替代傳統个蘇州閒話成之爲最有影響力个吳語方言,搭蘇州話一淘成之當代吳語个代表方言。

解放前頭个30年代真真叫之上海言話个黃金期間。出現了交關吳語文學作品、其中大多數是張愛玲迭個上海本土作家創作出來个。伊个辰光个上海人發明了交關新个漢語詞彙,箇一批詞語有從英文來个,譬如講“水門汀”(cement),又從廣東閒話來个,譬如講“夯麼啷當”,當然,也有一大批上海人自家發明个詞彙,撥拉普通言話吸收得去了。當時个上海,上海言話是絕對个主流,弗管啥地方个外地人儕要學上海言話个,就算是外國人也勒該學。上海个交通大學需要資料證明,也是用上海言話來授課个,像聖約翰大學、同濟醫學院箇鼐。

解放以後,全中國開始推廣普通言話。不過上海人還是歡喜講自家个上海言話,上海人勒勒上海是老少講普通言話个。伊个辰光全國實行老嚴格个戶口制度,外地人移民到上海个是邪氣少。箇能之就算政府勒勒強行推廣普通言話,上海言話登勒上海還是相當个強勢个。

上海閒話个現狀[编辑]

九十年代浦東開發以後,外地人搭仔鄉下人開始源源不斷个到之上海來。幫解放前頭个移民潮弗一樣个是,箇趟子个移民是來自全國弗同地方个,是弗會,也弗願意得講吳語个。再加上上海人經過學堂裏个強行教育,儕會得講一口嘮流利个普通言話,葛嘮新个上海人搭之老个上海人開始用普通言話交流了。辰光一長,勒了上海个交關公共場合就衹聽得到普通言話了,上海言話講个人已經越來越少了。同時,政府推廣普通言話个立升是邪氣嚇人。學堂裏个老師弗好講上海言話,學生子勒拉課間休息个辰光也勿好講上海言話,電視臺个上海言話節目撥拉紛紛取消,交關老優秀个上海言話電視劇也弗撥拉放,廣播台个上海言話節目也撥關脫了,吳語个報刊雜誌就更加嘸沒哉。箇能仔一來,上海言話已經到了要受保護个田地了。

進入廿一世紀以來,上海出現了一批本土學者,伊拉對於上海言話个逐漸消亡是邪氣擔心。紛紛提出保護、傳承上海言話个方案幫仔行動。眼門前,上海言話已經撥拉越來越多个上海人所重視了。交關年輕个上海小人又發明了邪氣多个新詞彙,上海言話正勒勒復興个過程當中。上海言話搭仔其他吳語地區个方言个融合也了拉慢慢交進行。

現代个上海年輕人使用上海話聊天也是司空見慣。至今,上海人還是喜歡使用當地語言,但也讓老多外地人感覺到上海人排外个心理,但實際上箇是上海市民保護老祖宗遺留下來个口頭遺產个最好个形式。

語音[编辑]

上海閒話內部有分歧,主要以年(擬)齡區別老派、中派搭之新派。

老派:聲母27隻,韻母51隻,聲調6隻(陰平、陰上、陰去、陽去、陰入、陽入) 中派:聲母28隻(增加[ʑ]),韻母43隻,聲調5隻(陰平、陰去、陽去、陰入、陽入) 新派:聲母28隻,韻母32隻,聲調5隻(陰平、陰去、陽去、陰入、陽入) 下頭是關於語音个具體描寫以中派上海閒話爲基此(基礎)。

聲母[编辑]

搭多數吳語方言一淘,上海閒話有一整套个濁塞音、不送氣清塞音搭送氣清塞音个對立。而且,還有一套對立个清擦音交濁擦音。

參考中文維基百科个表格[1]

韻母[编辑]

中古漢語个[-m]韻尾搭 [-n]鼻韻尾嘞該上海閒話中合流變成功鼻化,並最後落脫之,一淘併入了陰聲韻。一些中古漢語个[-ŋ]韻尾也變成了鼻化音。中古漢語个[-p -t -k] 勒上海話中已經都變成了喉塞音[-ʔ]。

了一些變體裏,[u]个發音實質郞是不圓唇个[ɯ]。

聲調[编辑]

上海閒話音調向重音化方向演變,聲調從8隻合併功成5隻,實際浪衹挺下來一隻降調(陰平)搭一隻平升調,變得邪氣簡單。箇讓上海人讀聲調个辰光,自由个變體可以相當寬泛,譬如講降調調值讀成功“53”、“51”、“552”儕不影響聽感,平升調讀成平降升調也不會影響理解。語音搭詞彙語法詞雙音節連調成之主流後,上海閒話在吳語中最快進化到“延伸式”連調,後字都失去了獨立个聲調而弱化粘著,重又向屈折語變化。

眼門前,上海閒話語个流當中,相對穩定个音位有兩種,一種是聲母,一種是前字聲調,迭兩中爲主个音位對上海閒話語音嘞嘞起著重要个穩定作用。(錢乃榮《上海語言發展史》)

由於人口融合帶來个快速蛻變,加郞中、新派語音越來越受到普通閒話个影響,音節搭聲調儕趨於簡化,已經越來越失去吳語个代表性及特性。所以講,某種程度郞廂上海話已成爲一種“有聲沒調”,衹有音高重音个獨特漢語方言。

文化教育[编辑]

上海老早是全中國頭一個接觸外國人个場化。葛咾交關英文單詞儕是以上海个發音來音譯个。譬方講,水門汀、席夢思咾啥。不過現在上海已經嘸無箇能界个機會哉。外加現在上海交關小人講上海言話已經勿大靈光哉。

解放前,上海个電影是全中國頭一位。1949年以後,上海勒浪文化方面逐漸失去著伊个領先地位。但是,伊獨特个海派文化始終搭仔京派文化屬於兩種不同个中國文化,上海个海派文化始終是一種真正个傳統搭仔外來文化最好个融合,也是國際上承認个一種高雅个中國文化。文化大革命前頭,上海曾經拍過勿少根據滑稽戲改編个電影,譬方講,1963年个《如此爹娘》搭《七十二家房客》,箇眼電影用个語言包括交關勿同場化个吳語方言搭仔帶山東腔、江北腔還有廣東腔个上海言話,舞臺劇味道邪氣濃。九十年代,上海自家拍仔一部完全用上海言話講个電視劇,是描寫都市生活个正劇,叫《孽債》,幾化討人歡喜,不過後首來重播个辰光撥改成功普通言話哉。接下來上海還拍仔一部用上海言話講个正劇叫《何須再回首》,箇趟朆通過審查,乃末勿來事衹好呼改成功普通言話播出。現在上海螢屏高頭个上海話節目衹有號稱地方曲藝滑稽戲个情景喜劇,比如講《老娘舅》搭仔《開心公寓》。節目个品質整體浪來講,水準弗高,內容庸俗,低級趣味,頂重要个是交關辰光一眼也勿好笑。滑稽節目口碑勿佳,不過收視率倒是老高个,側面反映了上海人對滬語節目个需求。上海人要求中央政府放寬對方言影視作品管制个呼聲也勿低。

上海老裏八早个廣播電臺是有上海言話个廣播个。不過現在已經嘸無啥哉。東方廣播電臺有一檔《阿拉上海人》个節目,部分內容是用上海言話播出个,交關受聽眾歡迎。兩個主持人沈蕾搭曉林儕老贊个。現在每個禮拜下半天五點鐘望裏,上海人民廣播電臺戲劇曲藝頻率有一檔叫《笑笑樂翻天》个節目,專門播放點老滑稽。有興趣个聽眾也好去聽聽看。

上海个教育事業邪氣發達。有勿少全國一流个大學。譬如1949年以前个國立交通大學國立同濟大學聖約翰大學震旦大學咾啥。而且箇歇辰光个交通大學全世界高頭也好數數个。解放以後到現在,比較有名个大學有上海交通大學復旦大學華東師範大學同濟大學

經濟[编辑]

做爲幾百年來中國經濟頂發達个地區,來勒江南中心位置个上海從清朝辰光開始就有雄厚个經濟實力。到近代之後,經濟發展更日新月異,成爲遠東頂大哥金融中心搭交易市場。上海个工業,來勒19世紀末發展起來,到20世紀大部分年數裏向,儕保持全國第一個地位。租界辰光个上海沒有帝國統治个約束,發展極爲繁榮,到1927年之後,則逐漸受到中央權力越來越大个影響。

總體情況[编辑]

上海是中國各經濟中心,生產總值占到4%,是所有城市當中頂高个,2013年,上海个生產總值達到21,602.12億元,來勒世界高頭排名第11位,其中第三產業个比例超過百分之六十。一半以上个經濟增長是私營經濟企業貢獻个。上海頂重要个產業依次是:商貿流通業、金融業、資訊產業、房地產業、成套設備製造業、汽車製造業,此六大支柱產業貢獻全部生產總值个一半。上海市民人均生產總值達到達到90,700元(14,756美元)

中華人民共和國成立到1990年開始个辰光,上海每年上繳个財政收入占到全部中央財政个20%以上。1990年代,中央啟動浦東開發開放政策,上海財政上繳个比重稍許減脫一點,但仍有12~15%比例,大規模个財政上繳讓上海本地投資資金緊張,造成土地財政並且引發高房價等問題。近年來,由於上海將大量地方財政收入亦上繳中央,讓上海本地投資減弱,來勒相當程度高頭拖累上海經濟个發展

交通[编辑]

上海到周圍大城市个航班時間
往莘莊个上海軌道交通一號線已經在人民廣場站到達。


城市交通[编辑]

上海个交通也勒海發生交關大个變化。箇辰光个上海已經有得16條地鐵哉。勒浪龍陽路地鐵站邊浪向還有磁懸浮火車,去浦東國際機場則要8分鐘辰光。不過呢上海个地面交通交關軋,想開車子去上班或者白相是勿大來三个。

上海个大巴士四通八達,指示牌、報站清晰,高峰時期5分鐘間隔。效率頗高。上海額公車一般性都有个英文報站,外國朋友了還此地白相乘公車阿弗會个有啥困難个。現在所有个公車儕增加仔上海閒話个報站。

全面細緻个城市交通軌道,請望:http://www.myliving.cn/metro/index.htm 。但上海軌道交通除脫16號線有得上海閒話報站其他儕嘸沒,問其原因花頭精邪透,甚至出技術方面做勿到个藉口,上海市民紛紛向地鐵公司呼籲仔交關趟還是無回音。另外,地鐵站充值點个工作人員對伊拉講上海閒話還是回普通話。

航班[编辑]

上海擁有兩個國際機場,一隻是虹橋機場,一隻是浦東機場。浦東機場比起虹橋來講是新造个,各種物事儕老好个,也是上海个標誌之一。

鐵路交通[编辑]

上海來拉1987年以前,一直是使用天目路伊面个老北站,後首來由於老北站人忒多了,所以來許現在个位置造了新个上海站。普通市民歡喜叫渠新客站,來搭老北站區別開來。2007年,又勒拉徐匯區建成功上海南站。2010年又建成功虹橋火車站

公路交通[编辑]

勒拉每個區裏向儕有至少一個大个長途客運站。之外還有上海旅遊客運中心,勒拉上海體育場

高速道路[编辑]

勒拉上海市裏向有三條環線,分別是內環中環外環。之外還有S1S2S3S4S5S6S7七條省級高架公路,G2G42G40G50G60幾條國內高速公路搭S32S12兩條省級高速公路。

參攷文獻[编辑]

外部連結[编辑]

Commons-logo.svg
维基共享资源里向寻得着搭该篇文章搭界个多媒体资源:
上海市行政区划 Zanheshiodupio.JPG
市辖区 黄浦区 | 卢湾区 | 徐汇区 | 长宁区 | 静安区 | 普陀区 | 闸北区 | 虹口区 | 杨浦区
宝山区 | 闵行区 | 嘉定区 | 松江区 | 金山区 | 青浦区 | 奉贤区 | 浦东新区(含原南汇区) | 崇明区
中华人民共和国省级行政区划 Flag of the People's Republic of China.svg
直辖市 北京市 | 天津市 | 上海市 | 重庆市
黑龙江省 | 吉林省 | 辽宁省 | 山东省 | 河北省 | 山西省
陕西省 | 甘肃省 | 青海省 | 江苏省 | 安徽省 | 河南省 | 湖北省
浙江省 | 江西省 | 湖南省 | 四川省 | 福建省 | 广东省 | 贵州省
云南省 | 海南省 | 台湾省(弗勒实际统治,参见台湾问题
自治区 新疆维吾尔自治区 | 内蒙古自治区 | 宁夏回族自治区
西藏自治区 | 广西壮族自治区
特别行政区 香港特别行政区 | 澳门特别行政区