中国

中國是歷史上頭一隻名詞，老早用來指代黃河流域个中原地區，到三國辰光，吳越豪强孫權還話「若以吳越之衆抗衡中國」。昰隻概念，在明帝國辰光開始，伴隨帝國在長江流域搭雲貴高原个殖民，逐眼擴張指代所謂个漢地十八省。到清帝國後期，因爲西方文明个傳播，一點文人有樣學樣，擔整個清帝國个版圖指代成所謂个中國。昰然，就讓本生屬於東北亞个滿洲、屬於內亞个蒙古、屬於中亞个新疆全因爲版圖關係，歸類到中國當中哉。乃朝，中國成爲著一隻政治意味邪氣強个概念，自家認爲「中華人民共和國」个版圖、「中華民國」自由地區、香港、澳門全屬於中國。「中國」是一套世界觀，交關華人全認爲但凡使用漢字，受著中華文明影響个地區，全該應屬於中國。

範圍

中國个範圍內有交關文化存在，因爲歷史丄大一統帝國个殖民替之壓迫咾，交關本地文化全畀滅慝著，昰當中，便包括两千多年前頭个齊文化；以長江中游爲根據地个楚文化咾啥。還有因得人口滅絕咾消失个古蜀文化。乃朝，中國認爲自家是所謂漢文化个發源地，外加一直宣傳是世界丄向頂頂古老个文明之一（實質丄自家受到中亞、內亞影響大來邪）。對周邊國家、民族个文化有得深遠影響，形成功漢字文化圈。不過，因爲文革搭周邊國家民族主義、國族主義个影響，乃朝漢字在越南搭之朝鮮已經廢慝爻，來在日本个使用也受著衝擊。就是中華人民共和國自家，也通過推廣「簡化字」，讓漢字传承產生著改变。

爭議

來在1949年中華人民共和國建立，中華民國搬遷到臺北之後，中國國民當伉中國共產當控制个兩隻政懸就因啥人再好代表中國產生著諸多矛盾，1950年爆發个韓國戰爭讓中華民國作爲中國个唯一代表繼續在交關國際組織當中代表整個中國存在。中華人民共和國因得加入爻蘇聯陣營，受到著交關社會主義國家个承認。雙方爲著合法性展開爻對決。昰隻局面僵著蠻長辰光，一直到1970年代，中華人民共和國支持个非洲國家在渠援助下頭，在聯合國鼓動投票，讓中華人民共和國取代中華民國成爲中國在聯合國當中个聯合國安理會常任理事國。後首來，1972年，美国總統尼克送訪問北京，替之中國共產黨領導人毛澤東碰頭，昰然，中華人民共和國搭之行情西方世界國家建立著外交關係，中華民國个外交空間進一步壓縮著。到1990年代後，因爲中華人民共和國國力增長替臺灣本土意識推廣，中華民國隻概念已經弗大有人話起，貤加無臺灣儂認爲自家是代表中國。乃朝，反倒是中華人民共和國嘗怕臺灣拒絕承認自家是中国，真正獨立出去。爲此，1992年，雙方有過所謂九二共識。但中華人民共和國一直弗承認所謂一中各表个話法，實質丄是強迫臺灣要承認自家屬於中華人民共和國隻政懸，而弗單單是屬於中國隻概念。

伉大中華个區分

一般來話，中國隻概念替歷史丄向个中原王朝有得繼承關係，多數是政治丄个攷量詞彙，大中華是泛指所有有得華人住在許个、或者大量聚集个亞洲周邊地區（主要是南洋）。蓋咾，一般也有得擔中華人民共和國大陸地區謳作中國个講法。擔包括香港、臺灣、澳門、新加坡乃至馬來、印尼咾排華人占著顯著比例个國家或者地區擺在一淘，叫大中華地區。一眼跨國企業習慣擔包括港澳臺替之大陸个地區擺在一淘，去成立一隻大中華區部門。

歷史

主文章：中国历史

所爲中國个概念，自然是帝國文人根據大一統歷史觀念編出來个。具體內容是距離乃朝四千多年前頭，以臨近內亞个中原地區爲中心開始出現聚落組織，後頭在內亞个影響下頭，形成功擔戰車作爲單位个大型軍隊，並對周邊原住民族進行殖民屠殺。來在春秋戰國之後，來自內亞个秦國靠總體戰吞併爻所有別个中原國家，外加勢力擴張到著珠江流域。後首，到著漢朝，開始用儒學立國，並廢慝著封建制。卻情，新一代个地方勢力在東漢辰光發源，到著魏晉南北朝，形成功著新貴族，並掌握爻權力。6世紀，內亞上來个關隴貴族先後擊敗著山東士族伉江南士族，貤建立爻大一統帝國。之後，開始實行科舉，解構貴族制度。到著宋朝，因得內亞傳得來个檯子替之矮凳个普及搭正坐个消失，乃朝所謂个中華文明開始出現爻一隻底層。靖康之變搭蒙古入寇讓中原地區貤有著一輪新个內亞化。到著明帝國，開始對雲貴高原進行強行殖民，外加通過人口置換替之戶籍捆綁，管轄帝國老百姓。總體講起來，其實是一直在君主政體个專制集權大一統統治下底，衹不過朝代更替。辛亥革命之後，孫中山排儂爲著自家个政治利益攷慮，放棄爻老早个漢民族主義，外加弗再話啥中國等同漢地十八省，反過來學習渠場自家推翻慝个清朝，開始吹捧五族共和，話啥中國个範圍包括從帕米爾高原一直到臺灣。1920年代，梁啓超咾排儂發明著「中華民族」，構建著國族隻概念，一批來自伲吳越个文人鼓吹「國語」，推廣北京白話爲基礎个行文。到1950年代後，昰眼做法在中華人民共和國搭中華民國全得到爻强制推廣普及。今朝，行都臺北个中華民國替建都北京个中華人民共和國，全話自家代表整個中國。(弗個因得近年臺灣新一代儂本土意識个增長，覺著中華民國代表老早秋海棠版圖个小青年已經寥寥無幾哉）。

文化

中國个傳統藝術形式有得國樂、戲曲、書法、國畫、陶瓷咾啥，傳統娛樂活動有得圍棋、象棋搭麻將咾啥。茶、酒、菜、筷是中國个特色飲食文化。春節、元宵、清明、端午、七夕、中秋、重阳、冬至是傳統節日。中國傳統丄崇尚儒學，以夏歷爲歷法，以五倫爲道德準則。傳統中國人有得強烈个父系宗族觀念，蓋咾擔代表家庭个姓擺在名字前頭。另外，大一統帝國个集權政府歷朝歷代全有史官，對官僚集團內部鬥爭，統治集團个陰謀活動咾啥个內容，全有邪氣詳盡个歷史資料，譬方《二十四史》《資治通鑑》咾啥。但對老百姓个日腳，戰爭个準備研究還有使用技術方面，記載零散雜亂。故所以再會得有文人士大夫用三國演義當兵書打仗種滑稽事體。

漢字

中國个書寫系統是一種從甲骨文演化過來个象形文字，屬於伉埃及方尖碑上頭文字一式樣个寫法。傍中東西方个書寫系統，交關抽象、難學。卻情，由於地理隔絕个原因，行情東亞邦國全在歷史丄受過漢字个影響。比方話韓國日本越南咾啥。漢字在歷史丄產生過海海會會字體，外加有得寫法丄向个演變。不過，從東晉到1950年代之前，要緊个碑文文件丄个漢字形態便基本固定落來。中華人民共和國成立後，照拉丁化个指導，先後兩趟進行著對漢字个所謂「簡化」，造成著乃朝在中華人民共和國境內用个漢字，搭香港澳門臺灣个大推扳，同時，一點周邊國家，也演化出自家个字替乃至拼音，擔漢字廢慝著。乃朝有眼文人還歡喜講漢字文化圈。不過，想恢復類似个圈子，基本也是黄粱一夢哉。

書法

在漢字个基礎丄向，因得文人文化个發展，六朝之後，中原大一統帝國个文人開始出現講究漢字美感个文化氛圍。到東晋許歇，開始出現爻第一批書法家。个當中，以南竄士族後代王羲之頂爲有名。到隋唐辰光，書法藝術繼續發展，出現著柳公權、顏真卿咾排有名个書法家。進入宋帝國之後，書法呈現出個人化色彩，交關有名人物全自家創造書法字體，比方講，黄庭坚就自家創造黄體，宋徽宗趙佶也創造著獨特个瘦金體。蒙古人侵略之後，書法字體慢慢然定型落來。後首來个文人全歡喜模倣前人个字體，同時，文人主宰个興起也讓字體向潦草个方向發展。到清帝國辰光，乾嘉學派个文人邪氣歡喜用小篆咾啥个古代碑刻字體薄相復古審美。書法來在中國社會裏向畀當成功一隻身份象徵，有書法能力个，人家會得刮目相看。

思想

中國个哲學在春秋戰國辰光發端，主要代表思想有法家搭儒家。法家重視官僚集權帝國个榨取能力，儒家鼓吹復古，要求恢復到三代之治。到著漢朝之後，形成功表面儒家，實質法家个結構，儒家成爲著思想丄个主宰——昰个思想，歷來重視官僚法術搭私人道德，儒家學說對此提到行情內容，對形而上或者抽象概念論述交關少。在六朝，先後接受著玄學搭佛學个影響，傳統儒學遭到衝擊，造成功唐朝佛道思維个興起，到著五代十國之後，因爲科舉制度普及，造成爻寒門士大夫權利膨脹，釀造末腳程朱理學个出現，門學問在創新丄無啥貢獻，尤其世界觀還要參攷佛教搭道教个內容，但不過，因得好自圓其說，邪氣好滿足大一統帝國統治集團个需求，蓋咾也成爲爻所謂國學搭科舉攷試个正統出題內容，並形成著道德規範，左右帝國所有居民交關年數。明清辰光，歐洲航海家來到廣東咾排場許，傳播西方文明，不過因爲文人士大夫个抵制搭之閉關鎖國，除慝覺著人家是奇技淫巧以外，並無幾許接納。18世紀在末阶段，文人士大夫開始窮兇窮惡然食鴉片菸，外加擔昰樣物事用中國傳統思想解釋，美其名曰「福壽膏」。

中國哲學家

孔子：春秋阿末階段个哲學家，鲁国儂，生在低級貴族，創設儒家，鼓吹復古思維，畀後首來歷朝歷代統治集團推崇，擔渠加封爲大成至聖先師文宣王。
孟子：儒學代表人物之一，關注更多現實社會問題。歡喜鼓吹理想主義，辯論來事。後頭也受到尊崇，人家尊渠爲亞聖。
老子：道家創造人，身世成謎，一般性認爲是在淮河流域生长个楚國人。著《道德經》，後首畀尊崇爲道教創始人，號太上老君。
莊子：道家思維个發散人物，楚國人，著《莊子》，倡導「超然物外」个認知，伉孟子在儒家當中个地位差大弗多，後來畀道教尊爲南華真君。
韓非子：法家思維个要緊人物，出身戰國阿末階段个韓國貴族家庭，鼓吹法術政治，對後首个歷史影響邪氣深遠。
荀子

宗敎

在上古辰光，黄河流域个居民相信上帝，外加發展出一套在宗法制度丄向个祭祀天地系統。不過，許歇，在乃朝所謂个中國之內，有得交交關關種族羣自家个信仰。該辰光个代表信仰書籍是周易搭山海經。到戰國在末階段，儒家文人替方士開始對各種神話咾信仰進行改造，發展出黃老爲基準个概念。不過，一徑到漢帝國辰光，也無系統个形而上概念，更加無覺著有來世、輪迴咾排个忖法。到著東漢，佛敎開始傳入，外加催生本土信仰个興起，在東漢末腳，張道陵擔交關神話捏在一淘，慢慢然形成功後首來道敎个雛形。到五胡亂華之後，各類宗敎飛速發展，在後頭四五百年，佛敎搭道敎在社會丄向成爲著基層組織替之寒門晉升个一種通道，宗敎門派弗斷然創立，宗敎大師也接連出現。到著中唐之後，因爲寒門个興起搭科舉普及，宗敎个地位衰落，到宋朝之後，已經喪失爻在高層个影響力，到明朝之後，貤加衰落，搭民間信仰結合，成爲所謂个傳統信仰。昰就是所謂个三敎合一。

儒敎

在宋朝之後，因得程朱理學興旺搭科舉制度普及，交關帝国个讀書儂，文化儂實際丄相信个是儒家思想，該思想，因爲国家推崇，蓋咾基本有得國敎个地位。因此，也畀一眼儂叫作儒敎。明清兩代个讀書儂，根據儒敎个妝法，開始推崇文昌帝君、關帝咾排神明，眼神明搭本地文化無啥搭界，多數是靠帝國打激各地淫祀之後，强制推廣个產物。同样性質个，還有朱元璋分封个各種城隍。昰點民間神，搭大成至聖先師文宣王孔丘个崇拜處——文庙一淘，構成著帝國高層統治集團吹捧个信仰形式。清朝建立之後，全盤接受昰隻弄法，昰个局面也成爲著中國个信仰代表之一，儒敎个信仰是完全讀書儂化个，因爲基本無組織力咾，對统治集团个威胁小；同時，內容丄大量加入各種神秘主義搭之愚忠愚孝个糟粕，對東亞海會場許全產生爻惡劣影響。

基層敎條

在官方搭文人个敎條之外，大部分中國境內个地區，在明朝開始个幾百年裏，是隑在宗族體制下底个儒敎基層敎條隻排頭來維持个。昰排敎條，一般通過當地識字个文人（一般因爲科舉失敗咾無法遷居大城市或者當官），編纂一眼童謠或者打油詩，擔敎條灌輸到人心裏向。个當中，有種是針對家庭个，有種是針對女性个，不過更多是針對在私塾裏上課、將來想參加科舉考試个小青年个。在幾百年裏向，基層敎條發展慅來邪，產生著《百家姓》《千字文》《千家詩》《唐詩三百首》《弟子規》《孝女傳》《顏氏家訓》咾排書籍，昰眼書，有種弗是明朝後出現个，但真正个傳播，確實是在茲後。點敎條之外，大部分中國南方族羣全有自家个家譜。家譜記載家庭个傳承（一般確切內容弗超過宋朝），除慝告訴後代自家个來歷之外，還有一套家訓，告誡自家後代啥事体好做、啥事体弗好做。昰眼內容，替民間信仰一淘，構成著一般中國境內居民个道德取向伉判斷基礎。

族羣

根據中華人民共和國个官方話法，中國乃朝有五十六隻民族，裏向比較大个民族包括:

漢族，分佈在中華人民共和國統治个所有地區，在絕大部分地區全是優勢人口民族。
僮族，分佈在廣西、雲南。
苗族, 分佈蓋阿湖南搭貴州。
回族，無自家語言，衹單單因得相信回教就劃分出來个民族。主要在宁夏、青海、甘肃聚居，在華北地區也有交關勢力。
滿族，自家語言基本消失，根據老底子八旗制度劃分出來个民族，主要在原滿洲地區搭北京市聚居。
藏族，分佈在青藏高原。
維吾爾族, 古代稱呼回鶻，在新疆有得分佈，講突厥語系維吾爾語。人口增长邪快，行情人參加伊斯蘭國。

漢族个争论

不過，漢族个劃分，本生也是一隻相當牽強个概念。是根據文人士大夫自家對漢地十八省个延伸弄出來个概念。實際丄，從文化語言飲食信仰咾角度，全好相出昰隻概念內部个矛盾。在所謂漢族內部，有然介幾隻大型族羣：

吳越人，分佈在長江下游个吳越地區，使用吳語，人口在7000萬朝上。因得文化繁荣咾著名。
閩越人（包括閩南人)，廣泛分佈在東亞搭東南亞地區，使用閩南語、閩東語咾言話，以蛇當作圖騰。
廣府人，分佈在廣東、廣西搭東南亞地區，來在香港澳门占主導地位，使用粤語。
江右人，分佈在江西省个中北部搭湖南省東部邊境个族羣，來自唐帝国辰光个中原人口南下，使用赣語。
湖湘人，分佈在湖南，少量在廣西，使用湘語，歡喜食辣椒，擔鳳凰作爲圖騰。
客家人，根據渠場自家話法，是古代中原漢人南下形成。不過在習俗搭語言丄，全替畲族邪氣類似，歷史丄搭南方別个族羣基本全有過矛盾。乃朝在廣東東部，福建西部，江西南部集中居住，在東南亞也有渠場个存在。
江淮人，包括淮扬人搭之淮西人。使用江淮官話，人口望3000萬，居住在淮河流域搭皖南地區，属于吳越人話个「江北人」。

中華民族个争论

主條目：中華民族

所謂中華民族，是一隻梁启超發明出來貤推廣出去个概念，大致是參攷法国咾排國家个國族主義弄出來个。根據昰个講法，衹要是在清朝阿末階段仍舊來在清帝國版圖內个族羣，全好叫中華民族。種做法，暗地裏意思便是要擔還無漢化个族羣統統強制同化，構建一隻新國族。實際丄，類似个做法朱元璋老早就在明帝國許辰光做過歇。並照昰个妝法，塑造之後所謂个漢族認同。蓋咾好講中華民族是漢族隻概念个放大。1949年後，中華民族概念搭五十六隻民族一淘畀中國官方認可，形成爻古怪个矛盾性——一方面自稱是單一个「中華民族」，貤同时畀自家認可个「少數民族」交關优惠。昰也造成功一點自認是漢族个羣體感到弗開心，導致著近年皇漢等思維个傳播。