中秋节
中秋节是东亚民间一个节日头，年加年古历八月十五。中秋节不单单华人过，日本、越南、韩国搭朝鲜也过。另外，伊朗人也过。
照中国古历来讲，古历八月是秋天第二个月日，早世讲仲秋，民间也讲中秋、秋夕、八月节、八月半、月夕、月节；貤架箇日夜里月亮顶圆，象征团圆，也讲团圆节。
起源[编辑]
中秋箇词，顶早记录在《周礼》里向，《礼记•月令》里头讲：“仲秋之月养衰老，行糜粥饮食。”不过朆讲清爽，是八月哪日。
唐朝过后，中秋节日脚定牢。相传讲杨贵妃做眠梦游勒月宫，一首霓裳羽衣曲得来，民间中秋节嚇开过。一般人忖，中秋节宋朝辰光作兴起，到得明清辰光，中秋节便是中国一大传统节日爻。
中秋节个故事里向，嫦娥飞月个名气顶大。
嫦娥飞月[编辑]
嫦娥飞月在拉民间有蛮多版本，下向讲一个：
相传讲在拉远古辰光，天上十个日头。大力士后羿用弓畀九个日头射落来，第十个太阳𢞕爻，听讲险，准时上山落山，老百姓都有福气。
后首来，后羿寻嫦娥做新妇娘。
一个日，后羿一包弗死药得来，讲箇弗死药吃落去，便会做神仙。后羿转去畀箇弗死药交畀嫦娥。
哬晓得后羿个徒弟蓬蒙想偷来吃，佢趁后羿走出外头去，偷畔爬进嫦娥个间里，逼佢交出弗死药。嫦娥弗肯，畀弗死药吃爻，随底变做仙女，一脚飞在拉月宫(月亮)里向去哉。
过节习俗[编辑]
宁波、台州、温州地区个八月十六[编辑]
浙江东个宁波、台州搭温州人，过古历八月十六，算大月节头，要做羹饭畀过脱个屋里人吃。
韩国个中秋节[编辑]
韩国人个放假表里畀“秋夕”个英文传做感恩节（Thanksgiving Day），秋夕在韩国是一个大月节头，会连牢放假三日。早时交通弗方便个辰光，民间会得趁箇辰光转老屋里望亲人。便今朝碰着秋夕，早一日，韩国各个大公司都会打折，吸引老百姓买物事送人情。
越南个中秋节[编辑]
越南人古历八月半过中秋节，讲Tết Trung Thu(节中秋。“节”是喃字，“中秋”是汉越音) 。箇日夜里，小人要听阿贵个故事。越南小人在拉中秋夜里都要揢鲤鱼灯走出去嬉，有鲤鱼“蹿龙门”个意思。
日本个中秋节[编辑]
日本传统个中秋节十五夜，也讲中秋明月、芋明月、栗明月。玱朞个日本人，中秋节都不过哉。箇日大家人生活都不做，僵屋里啤酒吃吃，月亮也弗望，只电视望望。传统文化沒落爻，后生人都弗晓得月节头怎而来搭何物意思，听着放假，只晓得箇日班弗用上哉。
伊朗个中秋节[编辑]
伊朗个中秋节，名字讲Mehregān（波斯文： 或Jašn-e Mehr Mithra Festival）节，是琐罗亚斯德教个经典月节头，用来感谢yazata密特拉（波斯语：Mehr ），象征爱情、友好、光明之意。月份在伊朗历秋个7月份，也便是公历10月光景（塔吉克斯坦勒年加年10月8号过）。Mehrgān节在波斯帝国箇朞是庆祝隆重险。吤个辰光，道道国王带头办大仪式。后晚，在伊斯兰早个伊朗，过Mehrgān搭新年诺鲁孜节一样重要。后晚蒙古人打进伊朗爻，Mehrgān盛宴人气且凉落去爻。 箇玱，便只Yazd搭Kermān个琐罗亚斯德教徒还用奢华方式过箇Mehrgān节。另外，一许住在外国个伊朗人也会举行庆祝仪式过Mehregān节。
中秋诗词[编辑]
交关古代诗人写着歌颂中秋节个诗词。
明月几时有？把酒问青天。不知天上宫阙，今夕是何年。我欲乘风归去，又恐琼楼玉宇，高处不胜寒。起舞弄清影，何似在人间！ 转朱阁，低绮户，照无眠。不应有恨，何事长向别时圆？人有悲欢离合，月有阴晴圆缺，此事古难全。但愿人长久，千里共婵娟。
参考文献[编辑]
- 林之光，中秋个赏月天气，科技日报，2000-9-9（4）。
