2023年马英九访问中国大陆

2023年（民国112年）3月27号到4月7号，中华民国前总统、中国国民党前主席马英九访问中国大陆、祭祖搭仔文化交流活动箇桩事体。伊也变成功1949年台湾海峡两岸分治以后，中华民国现任或前任国家元首头一埭到访中国大陆。马英九想拉带仔马英九文教基金会“大九学堂”个箇帮青年学生仔一淘访问南京、武汉、长沙、重庆、上海等城市，还会得回到马英九伊个祖籍地湖南省湘潭县去看伊个老祖宗。

背景

马英九访问中国大陆搿消息一开始是《香港01》报道个，某一家马英九会得去个学堂里向，有工作人员向箇家媒体讲仔有关消息。

马英九个行程也同中华民国总统蔡英文搭表示参加2024年中华民国总统选举个郭台铭碰拉一淘。蔡英文个民主伙伴共荣之旅会得去中美洲邦交国伯利兹搭危地马拉，还会得经过美国，同美国众议院议长凯文·麦卡锡碰头；而郭台铭会得去拜访多家美国智库。箇三家头个行程侪勒拉3月底出发，预估侪勒拉4月7号回到台湾。

根据中华民国《国家机密保护法》第26条，马英九算涉密人员，总统卸任以后有出境管制，管制期到2021年5月19号结束。因为两岸关系逐渐紧张，有人批评伊前往大陆个行程。马英九则表示，勒拉伊三十多岁两岸关系开始破冰个辰光，伊就想过去大陆，但等仔三十六年才碰着箇趟机会。伊出发前勒拉机场讲，箇趟是伊头一埭去中国大陆，表示是私人基金会交流行程，主要是为咾祭祖搭教育交流。

行程安排

马英九基金会执行长萧旭岑明确表示，箇趟行程，马英九弗会同中共中央总书记习近平碰头个，也呒没想过会得碰着啥人，“客随主便”。

马英九基金会勒拉3月底公示个祭祖旅程预计行程

辰光	行程
3月27号	乘飞机到上海，慢慢交去南京
3月28号	拜谒中山陵，参观孙中山纪念馆、中国第二历史档案馆、南京总统府、孙中山故居、拉贝故居
3月29号	参观侵华日军南京大屠杀遇难同胞纪念馆
3月30号	到武汉参观辛亥革命武昌起义纪念馆、黄鹤楼、武汉市档案馆、湖北省博物馆，到武汉大学交流
3月31号	参观东湖绿道，到伊娘秦厚修个母校长沙周南中学交流
4月1号	到湖南省湘潭县白石镇祭祖，到伊爷马鹤凌个母校岳云中学交流；到衡阳，参观衡山里向个南岳忠烈祠
4月2号	参观岳麓书院、湖南大学、中国铁建重工总部、三一重工总部、湖南广播电视台
4月3号	参观重庆黄山抗战旧址群、重庆市规划展览馆
4月4号	参观重庆中央政治学堂旧址、张自忠烈士陵园、三峡博物馆
4月5号	去上海参观洋山港
4月6号	到复旦大学交流，参观四行仓库抗战纪念馆、和平饭店、城市会客厅，夜到头去外滩
4月7号	回到台湾

头一天：3月27号

箇天中午，马英九一帮子人到台湾桃园国际机场，乘中国国际航空CA196航班去上海。登机前，马英九表示，伊自家37岁个辰光勒拉政府里向负责处理两岸个事体，到36年以后个今朝才有机会到大陆去访问。伊还带了些台湾大学生一淘去大陆交流，希望双方年轻人个互动好改善两岸目前个状态，让和平更快更早个到来。独派团体908台湾国运动勒拉桃园机场第二航站楼抗议马英九出访中国大陆，同警察打起来哉。

下半天4点21分，箇部航班顺利到上海浦东国际机场，中共中央台湾工作办公室副主任陈元丰、中国共产党上海市委员会常委兼秘书长张为、上海市台办主任钟晓敏、上海市台办副主任李骁东勒拉现场接伊。伊是1949年（民国38年）中华民国政府迁台以来，头一個到中国大陆个中华民国前总统。马英九下仔飞机末，同当地接机小组握手打招呼，慢慢交乘上中巴，去虹桥火车站乘夜到头7点钟个G28次高铁去南京。必过，记者车队曾跟来跟去拿部中巴跟唻呒脱。

第二天：3月28号

马英九一行人进中山陵祭堂，向孙中山坐像敬献花环

箇天上半天，马英九勒拉南京中山陵拜谒国父孙中山，还进陵寝致意，题下“和平奋斗，振兴中华”箇几個字，落款民国纪年“百十二”。参观孙中山纪念馆个辰光，伊快哭出来哉，表示甲午战争伊块展览板高头应该讲到台湾畀割让脱。园区用个是闭园接待个方法，故咾勒拉现场等个人弗高兴。参访以后，马英九对外发表头一埭讲话，必过讲到中华民国个内容侪呒没出现拉中国中央电视台个新闻里向。伊对大陆表示问候，还强调两岸中国人一定要一淘努力、避免战争，争取国家复兴，重申两岸和平个重要性。

下半天，渠拉参观南京总统府。马英九一眼认出五色旗箇面中华民国创立初期个国旗，指出伊“五族共和”个意思。还去仔拉贝故居，勒拉约翰·拉贝个雕像前，马英九勉励一淘来个台湾学生仔，希望渠拉学习拉贝个勇气搭精神，弗向侵略者屈服。夜到头，中国共产党江苏省委员会书记信长星勒拉金陵饭店同马英九会谈。会浪，马英九表示箇趟南京旅行加深伊对中国发展个认识，感谢江苏政府对台商个照顾，对箇趟旅行个帮助同安排。后些来，马英九去秦淮河边浪个乌衣巷、夫子庙、中国科举博物馆等景点观光。

箇天夜到头，伊住拉南京东郊国宾馆里向头。

第三天：3月29号

马英九一行人祭奠南京大屠杀遇难同胞

马英九上半天参观侵华日军南京大屠杀遇难同胞纪念馆，现场南京市民弗少。伊献花祭奠遇难同胞、鞠躬哀悼，表示箇个纪念馆畀伊带来邪气深刻个震撼，伊一生也呒没碰着过介震撼个事体，勒拉留言簿浪留言“历史绝不可遗忘”。伊表示两岸要避免战争、谋求和平，互相应该晓得战争个后果是呒没办法弥补个。国台办副主任陈元丰、中共南京市委书记韩立明等陪伊一淘祭奠。

伊下半天从南京南站乘G1721次列车去武汉。出仔火车么，伊同中共湖北省委书记王蒙徽勒拉东湖宾馆噶讪胡。有讲马英九也会得住拉东湖宾馆。

夜到头，马英九一行人乘船游长江，远望武汉长江二桥。

第四天：3月30号

马英九一行人参观抗疫专题展以后接受媒体采访，右面是跟拉个前金银潭医院院长张定宇

早上，马英九勒拉东湖宾馆晨跑。箇天，马英九同团员个第一個行程是参观辛亥革命武昌起义纪念馆，伊用孙中山个口音喊出“三民主义！五权宪法！”等言语，后些来去参观黄鹤楼。

箇天，伊个行程有所变化，改去武汉市档案馆看抗击新冠疫情个介绍，提早去武汉大学进行学生交流会，接下来同国台办主任宋涛碰头。勒拉武汉市档案馆，有前金银潭医院院长张定宇陪咾参观，当中马英九对张定宇讲：“不好意思，我们政府给你们造成困扰”，可能讲个是伊个辰光政府阻挠包机。后些来个媒体采访里向，伊高度表扬初期武汉个疫情防控措施，箇阻止病毒大面积扩散。

下半天，马英九带拉台湾青年学生仔参观武汉大学，勒拉武汉大学图书馆开座谈会。武汉大学校长张平文表示热烈欢迎马英九一行。会后张平文向马英九一行赠送武汉大学早期建筑画册搭《古音汇纂》《故训汇纂》等书。马英九勒拉座谈里向拿法国、德国两個努力化解世仇个国家打比方，表示两岸同根同种更加可以和平结束对立，呼吁年轻人多互相交流增进了解，还向武汉大学送仔份《中华语文大辞典》。

夜到头，宋涛同马英九碰头，前者向马英九转达中共中央总书记习近平个问候，欢迎马英九先生回家”。马英九对“九二共识”表示认同，并表示两岸领导者必须尽一切可能避免战争冲突。

第五天：3月31号

马英九同宋涛一淘乘G79次列车从武汉去长沙

3月31号下半天，马英九同宋涛等人乘G79次列车从武汉站去长沙南站。箇趟去湘潭白石镇马家堰扫墓个马家人有17個，已经提早一两天分批到仔长沙哉。箇四批家属分别来自台湾、美国、大陆等地方，勒拉3月31号同马英九碰头。

到仔长沙，马英九先同伊四位姊妹到伊娘秦厚修个母校长沙周南实验中学（原来叫周南女校）参观。伊娘秦厚修生前曾连拉六十多年担任周南中学台湾校友会会长，故咾校内也有交关关于秦厚修个资料，箇让马英九同伊姊妹淘里蛮感动个。虽然是弗公开行程，但伊勒拉学校参观个辰光，人拥拉学堂附近，到处侪是长沙民众个热烈欢迎。吃夜饭个辰光，当地接待还点仔弗少个湖南菜。

第六天：4月1号

马英九勒拉马家祖坟前祭拜祖父马立安，用湘潭言话宣读祭文

4月1号上半天8点多钟，马英九等人从九所宾馆出发去勒拉湖南省湘潭市湘潭县茶恩寺镇双阳村个祖坟扫墓。回乡个路浪，当地群众邪气热情个向马英九问候“欢迎回家”，伊用湘潭言话回复“湘潭伢子回来了”。

据报导，为咯方便扫墓，马家祖坟周边进行交通管理，路也拓宽哉。祭祖仪式上，马英九用湘潭言话阅读祭文，当中好几埭哭得唻发弗出声音，经常揩眼泪水，表示箇趟祭祖实现伊多年来个想法。伊勒拉家族祭文里向，向阿爸马立安报告，自家已经“两次当选中华民国总统”，伊段辰光专门推动两岸和平发展。扫好墓，伊来到阿爸马立安生前创办个鸿兴福锅厂搭资助造个寺门前义渡参观。

下半天，马英九等人去衡阳市，到衡山南岳忠烈祠勒拉抗日战争里向牺牲个国民革命军将士。马英九以中国国民党前主席个身份向阵牺牲个将士敬献花圈。伊还去伊爷马鹤凌个母校岳云中学交流参观。

夜头，马英九勒拉长沙市九所宾馆会见中共湖南省委书记沈晓明。开场致词个辰光，沈晓明表示马英九访问大陆获得介广泛个关注，“是不折不扣的网红”，又表示马英九讲个长沙言话介好，畀伊同省长毛伟明两家头邪气大个压力，会得更努力学习湖湘文化。马英九勒拉致词里向祝贺沈晓明书记履新，表示沈晓明2011年勒拉上海任职个辰光也曾来过台湾，箇趟会面对双方侪有一种熟悉个感觉。

第七天：4月2号

马英九参访湖南大学个辰光同学生仔交流座谈

马英九今朝领仔箇批学生仔去湖南大学，参观勒拉校内个第二次世界大战中国战区第四受降区受降仪式旧址）。后些来，伊勒拉国家超级计算长沙中心个会议室同学生仔做交流。伊表示：“我们国家分了两个部分，一个是台湾地区，一个是大陆地区，都是我们中华民国，都是中国。”又讲：“大陆1982年的宪法前言里，也有提到‘台湾是中国不可分割的一部分’，‘这是事实很清楚’。”伊貤拿德国法国个关系打比方，表示两個百年世仇，弗同文弗同种，都可以一淘成立欧盟，同文同种并且坚持一個中国个利益立场个台湾地区同大陆地区当然可以和平发展，努力减少不必要个隔阂，让双方真诚交流。

马英九等人访问湖南广播电视台，同《声生不息·宝岛季》节目连线，勒拉现场同台湾青年搭所有观众一淘唱《月亮代表我的心》

下半天，马英九箇批人参观中国铁建重工同三一重工总部。听三一重工介绍个辰光，尤其是勒拉讲到台湾八八风灾个辰光协助救人搭参加机场建设个辰光鼓掌两埭。后些来马英九等人访问湖南广播电视台。当中马英九现场看个本人扫墓个画面一度眼泪水要出来，后些来同《声生不息·宝岛季》节目连线，接受主持人何炅采访。勒拉现场同台湾青年搭所有观众一淘唱《月亮代表我的心》。

夜头7点半左右，勒拉保安个保护下头，马英九亲自逛长沙个夜市，同当地民众近距离接触，人一度拥满太平老街。

第八天：4月3号

马英九一行人到重庆，参观重庆中国三峡博物馆

上半天，马英九乘中国南方航空飞机去重庆。下半天，伊拉参观重庆市规划展览馆搭重庆中国三峡博物馆。本来伊箇天个行程安排是去参观重庆抗战遗址博物馆，人员也已经准备哉，后些来突然之间改脱行程。必过箇天礼拜一，箇两個场馆侪勒拉休息，故咾特别开放畀伊参观。勒拉聆听展馆讲解个辰光，马英九关心重庆个工业发展情况。参观好重庆城市规划馆，伊还送畀讲解员家训书签。勒拉重庆中国三峡博物馆，马英九像是看展品看来太认真哉，头敲拉展示柜个玻璃浪。几百名重庆市民也出现拉博物馆门口欢迎马英九，高呼“马先生好”、“马先生欢迎来重庆”，马英九回应“台北也欢迎你们”，交流亲切。

后头，马英九一行人同中共中央政治局委员、中共重庆市委书记袁家军碰头交流。袁家军强调，马英九来大陆反复强调坚持九二共识、反对台独，坚持推动两岸交流合作、共赢发展，让伊邪气感动。马英九还表扬重庆个城市规划，让伊邪气讶异。阿末马英九还提到个人经历，表示重庆对伊意义重大。接下来伊参加袁家军个宴请，当中袁家军拿马英九爷马鹤凌、娘秦厚修勒拉重庆个老照片等旧资料，搭仔一些书信送畀马英九作纪念。箇天夜头，马英九住拉渝州宾馆。

第九天：4月4号

马英九勒拉张自忠将军墓前默哀，绕墓一圈，敬献花圈

马英九一行人参观重庆赛力斯两江智慧工厂

上半天，马英九参观祭奠张自忠将军烈士陵园，追寻抗日战争个历史痕迹。祭奠个辰光，伊貤一趟哭出来。张自忠二级上将个孙子张庆成也陪同接待。马英九对伊讲张自忠受仔忒惭过哉；貤表扬伊壮烈殉国，邪气了弗起，邪气让人佩服。

后些来，马英九参观重庆小康工业集团旗下赛力斯汽车个两江电动SUV全自动化制造工厂，勒拉箇面试乘赛力斯同华为合作个问界M5 EV展示车，试下来表示邪气适意。

下半天，马英九参观重庆黄山抗战旧址群。当讲解员提到重庆大轰炸炸死脱交关平民老百姓个辰光，他表示日本人忒恶劣忒戳气哉，专门打平民炸平民，表示后来日本也喫报应哉，弗只是那两颗原子弹，之前所有轰炸厾个侪是燃烧弹，日本伊面弗是竹头就是木头个房子，箇咾日本人喫报应哉。慢慢交，伊去重庆中央政治学堂旧址，寻伊爷娘当年学习、生活、谈朋友个痕迹。校方特为拿伊爷娘马鹤凌同秦厚修当年个结婚照搭仔后些来故地重游个照片放大裱拉墙浪，马英九开心个同照片合影。

夜到头，马英九一行人到重庆南岸区弹子石老街、两江四岸核心区（长江、嘉陵江交汇处个朝天门—解放碑片区、江北嘴片区、弹子石—龙门浩片区）夜游。有弗少重庆民众跟拉屁股后头，还有人突破公安防线请马英九签名。马英九现场欣赏传统川剧演出，同台下群众互动。阿末，马英九勒拉中共中央台办副主任潘贤掌、中共重庆市委常委卢红个陪同下，领拉“大九学堂”同学到“长江汇”欣赏嘉陵江、长江交汇个夜景。

第十天：4月5号

上半天8点多，马英九乘中国国际航空CA4575班机从重庆江北国际机场飞去上海，11点多到达上海浦东机场。中共中央台办副主任陈元丰、中共上海市委常委兼秘书长张为、中共上海市委台办主任钟晓敏搭仔副主任李骁东前来接机。马英九同伊拉握手致意，乘上上海方面安排个车辆，进行接下来个行程。

中午，马英九参观世界顶顶大个智慧码头——洋山港，邪气赞许洋山港无人码头高度智慧化个运作模式。

后些来，勒拉中共中央台办副主任陈元丰、中共上海市委常委兼统战部长陈通个陪同下头，马英九参观上海浦东新区城市运行综合管理中心还听取简报。参观个辰光，马英九表示伊对浦东发展搭管理个模式印象邪气深刻，问啊是有其他城市来学。必过，马英九也有些衰瘏，跟咾个学生仔有直接闭浪眼睛休息个。

傍晚，马英九勒拉上海北外滩“世界会客厅”同中共中央政治局委员、中共上海市委书记陈吉宁会晤。伊重申九二共识，还表示勒拉伊任浪，两岸签了只ECFA，用闽南语讲就是“会搁发”，意思是还会再发达个意思。他引民调数据，强调维持两岸关系和平稳定发展，是台湾社会主流看法，希望大陆个朋友也好注意到箇一点。箇咾，陈吉宁引中共中央总书记习近平个言语：“两岸一家亲”，伊对马英九回到湖南祭祖邪气感动，认为要秉持两一家亲个理念，应积极努力应对两岸交流，弗断增进两岸同胞个情谊搭扶持，共同推进中华民族伟大复兴。

夜到头，马英九接受中共中央政治局委员、上海市委书记陈吉宁个宴请，互相送礼。陈吉宁送仔簿写拉台湾历史个《台湾府志》珍本，让马营救邪气感动。慢慢交，伊带拉访问团去上海音乐厅欣赏上海民族乐团《两岸一家亲，民乐咏中华》个演出。表演快结束个辰光，乐团特别加演一曲台湾民谣《望春风》。

第十一天：4月6号

马英九走出复旦大学光华楼

上半天，马英九领仔帮台湾学生仔去复旦大学同大陆学生仔交流。致词个辰光，马英九表示，大陆电视台为伊做个祭祖视频播放量破仔1亿，伊认为箇是邪气正面个现象，好让两岸一淘感受到一样个家国情怀。伊貤表示，箇趟旅行顶重要个初衷，是因为箇些年来两岸因政治纷争同疫情个关系，交流断仔好几些年。年轻一代箇些年勒拉网络上越来越隔阂。伊希望伊箇趟旅行好踏出头一步，让两岸年轻人好互相交流了解，相互多一分接触，两岸多一份情谊，友谊越深厚，两岸之间冲突发生个几率就越低。

中午，马英九勒拉上海和平饭店同台商座谈交流，一淘吃中饭。中饭吃好，饭店个老年爵士乐团特谓为马英九演奏“夜来香”等三首歌。

马英九一行人参观四行仓库抗战纪念馆

马英九一行人参观上海城市规划展示馆

下半天，马英九领仔帮台湾学生仔参观上海四行仓库抗战旧址。马英九勒拉听到杨惠敏护送中华民国国旗个讲解后当场鼓掌拍手。后些来参观上海城市规划展示馆，对上海的城市规划搭仔现代化表示出兴趣，对“老上海”老建筑保护、高层建筑个修建搭管理也咾关心个。

晚到头，中共中央台办主任宋涛为马英九一行人饯行。宋涛表示，马英九先生箇趟出来对促进两岸同胞交流往来、推动两岸关系和平发展具有积极意义。伊希望两岸同胞多交流、常来往，大陆会得为伊创造条件、提供便利个。宋涛貤指出，两岸同胞侪是中国人，故咾要坚持一个中国原则同‘九二共识’，屋里向个事体商量拉办，绝对弗好让外头人插手；故咾绝对弗好容忍‘台独’行为，勾连外部势力搞‘台独’必定会失败。

喫过夜饭，马英九同“大九学堂”学生仔勒拉白莲泾旅游码头，乘浪“申城之光”号游轮，游览黄浦江外滩个景色。上海市台办更特别准备特殊庆典版个江边灯光秀，背景音乐是为马英九特别创作个《浦江追梦》。游览结束以后，中共中央台办、国台办主任宋涛拿伊拉做个，有箇十几天个照片个相册，作为礼物送畀马英九。

第十二天：4月7号

上半天11点15分，马英九同随行人员乘中国国际航空CA195号班机从上海浦东机场回到台北。中共中央台办副主任陈元丰、中共上海市委常委兼秘书长张为、中共上海市委台办主任锺晓敏、中共上海市委台办副主任李骁东到机场送机。马英九走上舷梯，勒拉机舱门口转身向民众挥手再会。

下半天12点46分，飞机到桃园机场。国民党立委费鸿泰、李贵敏等人现场接机。马英九下仔飞机，表示伊箇趟旅行最重要个一点，就是感觉九二共识貤活过来哉，坚持九二共识才顶符合台湾民众个利益。马英九说伊现在邪气担心现在的样子，吓执政者拿台湾带进战争箇条沟里向。伊会得勒拉民间继续努力，让台湾有真正个和平。

各方个反应

 中华人民共和国

• 中共中央台湾工作办公室发言人马晓光对马英九率团到中国大陆祭祖、交流表示欢迎，亦表示愿意为箇趟行程提供必要个协助。
• 4月12号，国台办发言人朱凤莲勒拉例行新闻发布会上表示，马英九箇趟大陆之行充分体现两岸同胞侪是中国人、是一家人，有咾共同个血脉、共同个文化、共同个历史、共同个愿景，反映出两岸同胞要和平、要发展、要交流、要合作个共同心声，又一趟证明仔“九二共识”是两岸关系和平发展个定海神针。朱凤莲还拿伊同同一辰光个蔡英文访美行程进行比较，表扬马英九用行动证明“九二共识”个有效性，促进两岸交流，化解敌意。

中華民國

• 中华民国总统府表示，基于马前总统出境管制期限结束，总统府尊重马前总统祭祖个规划，勒拉了解相关安排以后，通知相关单位，就马前总统此箇趟行程个安全等事体，给予必要个协助。还期待伊好向大陆同世界展现符合国家利益、国民情感个行为，台湾民主自由个价值同两岸交流对等尊严个立场。
• 中华民国大陆委员会表示，希望行程好充分反映台湾民意坚持民主自由、捍卫国家主权个坚定立场，共同维护台湾最大利益。对马英九勒拉第7天表示台湾、大陆勒拉宪法上侪是一個中国，陆委会表示马英九个讲法呼应中共个一贯主张，矮化台湾，伤害国家主权搭尊严，同台湾民众认知完全弗一样。

参见

• 2024年马英九访问中国大陆

外部链接

• 百度跟进—— 马英九赴大陆祭祖
• 菱傳媒網路民調—— 31.8%民眾滿意馬英九訪中祭祖