2024年马英九访问中国大陆

马英九乘坐中国南方航空CZ3088班机抵达深圳宝安国际机场

2024年（民国113年）4月1号到4月11号，中华民国前总统、中国国民党前主席马英九继旧年祭祖以後貤一趟访问中国大陆、祭祖搭仔文化交流活动。箇趟，马英九应邀，勒拉4月1号到11号带仔马英九文教基金会“大九学堂”青年学生仔一淘访问广东、陕西搭仔北京，乘枪势里参加祭拜轩辕黄帝陵个“甲辰（2024）年清明公祭轩辕黄帝典礼”。此外，伊勒拉北京人民大会堂同中国大陆领导人、中共中央总书记习近平会面，是马英九、习近平两人勒拉2015年新加坡头一趟會面以後个第二趟面对面交流。

背景

2024年3月25号，马英九文教基金会开新闻发布会，宣布马英九应中国大陆个邀請，会得勒拉4月1到到11号领拉帮“大九学堂”青年学生仔一淘访问广东、陕西搭北京。箇趟个重点是参加祭黃帝陵大典“甲辰（2024）年清明公祭轩辕黄帝典礼”。基金会执行长萧旭岑介紹，马英九一行人箇趟会得参观中华文化历史景点、优秀企业，还会得勒拉中山大学、北京大学进行两岸交流。

大九学堂是马英九基金会每年举办个青年营队，鼓励青年学生仔关心国家、政治、经济、文化等议题，通过交流讲座搭仔主题参访，一道思考国家问题可能个解决方法，计划对象是30岁以下国内大专院校在学个大学生或硕士生个中华民国国民。

2009年到2016年，为咾表达对中华传统文化尊宗敬祖个重视，马英九任期里向，伊勒拉清明六趟主祭“中枢遥祭黄帝陵”典礼。国民党高层譬如连战、吴伯雄、江丙坤、林丰正，新党主席郁慕明、亲民党主席宋楚瑜咾啥个侪曾去过大陆参加黄帝陵祭祀。

行程安排

2024年3月25号，马英九基金会首席执行官、总统府前副秘书长萧旭岑表示，箇趟访问个团员是马英九前总统、萧旭岑、王光慈（第十二、十三任总统办公室主任，总统府前专门委员）、邱坤玄（国立政治大学荣誉教授，国安会前咨询委员）搭仔一道出访个20名“大九学堂”学员。

马英九基金会访问搭交流行程

辰光	行程
4月1号	乘中國南方航空CZ3088班机从桃园飞到深圳 到深圳後参观大疆公司总部，接下来参观腾讯滨海大厦，夜快6点钟勒拉深圳五洲宾馆同中共中央台湾工作办公室主任宋涛交流 喫过夜饭，伊拉去人才公园看无人机表演
4月2号	参观比亚迪公司、孙中山故居、港珠澳大橋 夜到勒拉广州白天鹅宾馆同中共广东省委书记黄坤明交流
4月3号	上半天勒拉黄花岗七十二烈士墓园祭拜，参观黄埔军校旧址 下半天参观中山大学广州校区南校园，同師生进行交流 乘中国南方航空CZ3203航班从广州飞到西安
4月4号	上半天勒拉黄陵县黃帝陵参加祭黃帝大典 下半天参观隆基绿能总部，夜到勒拉陕西宾馆同中共陕西省委书记赵一德交流
4月5号	上半天参观咸阳杨陵区五泉镇马援祠搭仔杨凌智慧农业示范园，下半天去陕西扶风县马援墓搭仔法门寺 夜到头勒拉西安城墙浪散步
4月6号	上半天参观秦始皇兵马俑博物馆，下半天参观中国国家版本馆西安分馆，夜游大唐芙蓉园
4月7号	上半天参观陕西历史博物馆、西安大慈恩寺大雁塔，下半天乘高铁到北京去 勒拉北京参观国家大剧院，欣赏音乐会
4月8号	上半天参观卢沟桥、抗日战争纪念馆，下半天参观北京故宫博物院 夜到勒拉北京饭店18楼顶楼会议厅同中共北京市委书记尹力交流，参观国家速滑馆、国家体育场
4月9号	上半天登八达岭长城，下半天勒拉北京大学进行交流。
4月10号	上半天参观中国空间技术研究院，下半天3点钟勒拉人民大会堂“东大厅”同中共中央总书记习近平交流 夜到头，中共中央政治局常委王沪宁勒拉钓鱼台国宾馆宴请马英九
4月11号	乘中国国际航空CA185班机从北京飞回桃园

第一天：4月1号

登机前，马英九表示，伊希望勒拉眼门前两岸情势紧张个辰光，传递台湾人民爱好和平，希望两岸交流弗要打仗个想法，是和平之旅也是友谊之旅。独派团体908台湾国运动抗议，弗过箇趟用个是举布条而弗是跟上趟子一样貤打起来。下半天14点6分，中国南方航空CZ3088班机到深圳宝安国际机场，中共中央台办联络局局长杨毅、中共中央台办副主任潘贤掌、广东省台办主任锺挥等人勒拉现场迎接。

马英九参观大疆创新科技有限公司

到深圳以後，马英九第一站就是去大疆公司。公司总裁、生拉台湾，同马英九是国立台湾大学校友个罗镇华亲自接待，中共中央台办副主任潘贤掌、中共深圳市委常委兼统战部部长王强等地方官员陪同；後头伊去腾讯总部参观，总裁马化腾亲自迎接，陪同参访。

中共中央台办主任宋涛勒拉五洲宾馆会见马英九

马英九同学生仔勒拉深圳人才公园看无人机表演

夜快6点钟，中共中央台办主任宋涛勒拉五洲宾馆会见马英九。宋涛强调，两岸侪是一家人、侪是中国人，“两岸同胞家和万事兴”，应一道承担起振兴民族个责任。宋涛表示，交关台湾青年朋友头一次到大陆来，希望勒拉接下来个行程当中好用心感悟历史变迁搭仔民族进步，用心体会大陆经济社会发展个成就，用心去感受做一個中国人搭仔民族复兴个自豪感咾啥个。马英九表示，伊任期里向，两岸坚持“九二共识、反对台独”个共同政治基础；两岸关系要和平稳定，纔好确保两岸人民个福祉。伊亦感谢宋涛勒拉2023年个招待，让伊感受到两岸“血浓于水，同气连枝”，特别感谢陆方个诚意搭仔善意。喫过夜饭，马英九同学生仔一道去人才公园看无人机表演。

第二天：4月2号

马英九参观孙中山故居

马英九参观港珠澳大桥

2号早浪向，马英九等人勒拉中共中央台办主任宋涛个陪同下头参观全球电动车巨头比亚迪个坪山总部参访，公司副总裁王杰接待。马英九对比亚迪邪气感兴趣，问仔交关问题，解说员一一帮伊解释。

下半天，参访团跑到中山市参访翠亨村孙中山故居。勒拉纪念馆里向，马英九讲“中山先生对两岸而言，都是影响千秋万世的伟人”，希望两岸人民侪好记起国父留下来个遗训“和平，奋斗，救中国”，深切期望两岸共同合作，避免打仗，致力和平、奋斗、振兴中华，一道创造和平繁荣。场外弗少群众围观，有来自香港个小学、中学考察团、在粤台胞咾啥个。後头，参访团参观港珠澳大桥。

黄昏头，马英九一行人到广州，勒拉白天鹅宾馆同中共中央政治局委员、中共广东省委书记黄坤明交流，参加伊拉组织个晚宴。马英九致词讲，广东是引领中国20、21世纪发展个经济大省，还提到广东是“国父”孙中山个故乡，也是革命个起点，希望两岸一道努力，追求和平，弗要打仗，致力于振兴中华。广东省委书记黄坤明提到清明节香港人北上个热潮，表示箇种旅游热潮“体现了我们中华民族，我们香港，包括台湾、澳门，大家共同的文化基因，慎终追远、敬重祖宗，更好的复兴中华、振兴中华。”。

第三天：4月3号

3号早浪向，参访团参访黄花岗七十二烈士墓园。马英九个致词先简短关怀台灣地震，希望大家一切平安。勒拉发表感言个辰光，马英九一度激动得唻哽牢。马英九表示“国父孙中山先生领导同盟会在黄花岗起义，英勇牺牲的七十二位烈士，抛头颅、洒热血、慷慨就义，感动了无数人”，更特别指出有两位来自台湾个烈士。伊表扬大陆方面拿黄花岗维护唻邪气好，变成功一座纪念公园，让一般老百姓好来运动，一方面追思，一方面也让箇些历史同生活紧紧地结合拉一道，让伊觉得，黄花岗精神生生弗息。伊期盼“黄花岗精神”弗断传承，让后代子孙，两岸个中国人，侪好永远记得箇些先圣先贤为阿拉个牺牲搭仔奉献。接下来，马英九参访黄埔军校旧址，参观军校校舍，观看展览。

马英九一行人到访中山大学

下半天，马英九一行人去仔中山大学广州校区南校园。中山大学党委书记陈春声同校长高松个陪同马英九一行人参观学堂里向个孙中山纪念馆，还勒拉怀士堂（小礼堂）同中山大学学生座谈交流。马英九表示，到访中山大学，伊感觉邪气开心，格外亲切，因为勒拉台湾高雄也有一所中山大学，两所学堂是姊妹学堂。伊表示两岸个学生仔言话相通、年龄相仿，交流起来“浑然天成、欲罢不能”。马英九亦强调，推动两岸学生交流，是伊箇趟顶重要个想法，也是未来努力个目标。伊邀请中山大学个师生回访台湾，承诺到辰光会得亲自陪咾大家一道去台湾各地走一走，体验台湾个风土民情。

中山大学个交流结束以後，马英九一行人赶去广州白云机场乘中国南方航空CZ3203航班，勒拉当天夜到头7点24分到达西安咸阳国际机场。

第四天：4月4号

马英九出席清明公祭轩辕黄帝典礼

4号早浪向，马英九等人来勒陕西省黄陵县黄帝陵参加“甲辰（2024）年清明公祭轩辕黄帝典礼”。箇是伊头一趟实地祭拜中华人文个祖宗。祭典前，马英九等人参观黄帝陵，上香、种树，参观传说中个黄帝亲手种个柏树。致词个辰光，伊讲到日军侵台，搭仔阿末炎黄子孙个辰光，忒过激动，哽咽两𡍲。

马英九参观隆基绿能

下半天，马英九同仇开明一行人参观西安巿太阳能光伏企业隆基绿能，对太阳能个发电量、企业来勒新疆、沙漠地区个光电效益咾啥有兴趣，同隆基绿能董事长锺宝申亲切交流。

夜到头，马英九同中共陕西省委书记赵一德进行交流。赵一德上来就先慰问台湾地震]当中受灾个同胞。马英九则来勒後头个发言当中讲到，伊箇趟来陕西马援祠寻根“难掩我心中的激动”，箇趟寻根对伊来讲意义重大，两岸个未来任重道远。

第五天：4月5号

马英九参观杨凌示范区

5号上半天，参访团来到咸阳市杨陵区个马援祠。为咾迎接马英九个前来，马援祠半個号头前开始翻新，包括红颜色个柱头、大门丄个彩色装饰图案咾啥个；村民等勒边丄向，想看看交马英九个真人。参访团后些来转场杨凌智慧农业示范园，西北农林科技大学教授邹志荣负责解说。执政个辰光也力推农业政策个马英九，弗断向邹志荣询问上合组织本身搭仔箇個组织来勒农业合作丄向个效果。

下半天，马英九去陕西扶风县马援墓祭拜，同伊爷马鹤凌亲手种个树合影。接下来，一行人参观陕西宝鸡市个法门寺搭仔博物馆，现场並呒没清场。庙里向破例带参访团参观寺庙里向平常性弗轻易对外展示个珍贵文物。马英九表示出高度兴趣，甚至来勒听香囊解说个辰光，从西装袋袋里向掏出便签纸写笔记。马英九来勒释迦牟尼佛前祈祷“两岸关系和平稳定”，住持也回伊“身体健康”。

晚上，吃过夜饭，马英九同学生团游览西安城墙。

第六天：4月6号

马英九参观秦始皇兵马俑博物馆

6号上半天，马英九等人参观特谓为伊拉清场个秦始皇帝陵博物院兵马俑博物馆，秦始皇帝陵博物院党委书记、院长李岗为伊拉解说。一行人先后参观一号坑、三号坑、二号坑。马英九弗仅对兵器、战车个演变邪气感兴趣，对弗同兵种造型个观察也邪气入微。

下半天，马英九等人参访西安国家版本馆，中国国家版本馆馆长刘成勇亲自接待导览。馆方展示《永乐大典》，还邀请马英九一道看明朝嘉靖13年（公元1534年）出版个《使琉球录》，介绍箇是全球最早有关钓鱼岛个描述。马英九表示，这是研究钓鱼岛个人一定要读个资料，从古籍里向证明钓鱼台弗是琉球个。马英九发表演讲个辰光，表示中华文明是世界丄唯一呒没中断个古文明，几千年前个字，阿拉后人现在也读得懂，称赞版本馆保存古籍个生活做唻邪气好，对中华文明个传播有数弗清爽个贡献。

4月6号夜到头，马英九参观大唐芙蓉园

夜到头，参访团乘景区观光车游览大唐芙蓉园，马英九向群众挥手示意。

第七天：4月7号

上半天，参访团参观陕西历史博物馆。马英九表示，陕西箇趟旅行让伊拉实际见证中华文化五千年个礼乐文明。伊呼吁，努力保存箇些典籍文物是两岸人民共同个任务，也是两岸一道享有个经验，证实两岸文化交流个重要性。后些来，马英九参拜大慈恩寺大雁塔；碰巧碰着高雄来个台湾游客，对方高喊“马总统”、“总统好”，马英九亲切同伊拉互动握手，互报家门。

中午12点多，交警开道，马英九等人开进西安北站[66]，乘G872次高铁去北京。下半天4点32分，伊拉到达北京西站，中共中央台办副主任潘贤掌、北京市副市长夏林茂、北京市台办主任霍光峰来勒现场迎接伊拉。马英九登上停勒站台丄个大巴，开进伊拉住个中国大饭店。

夜到头，马英九参观国家大剧院，欣赏国家大剧院管弦乐团、国家大剧院合唱团个表演。伊还参加一台晚宴，是中共中央台办主任宋涛做东个。

第八天：4月8号

马英九参观中国人民抗日战争纪念馆

早丄向，一行人参观中国人民抗日战争纪念馆。马英九来勒参观前向来迎接个博物馆馆长表示台湾人呒没缺席过抗战，参观个辰光也特别向馆方人员提到，抗战胜利六十周年（2005年）个辰光，伊个辰光个中共中央总书记胡锦涛曾指出“正面战场是国民党，敌后战场是共产党”，认为迭一段蛮精彩个。

马英九参观卢沟桥，同七七事变亲历者郑福来交流

接下来，参访团参观卢沟桥。大陆特谓邀请七七事变个亲历人、乃朝已经93岁个郑福来向马英九等一行人分享伊伊个辰光个逃难回忆。马英九来勒卢沟桥致词个辰光，表示战争是呒没赢家个，而和平是呒没输家个。战争个错有些好原谅，必过历史个真相弗好忘记脱；伊亦指出“历史是一面镜子”，要中华民族个后辈“记取教训，自立自强，振兴中华。”。伊呼吁后辈：“纪念七七事变、纪念抗战胜利与台湾光复的目的在于感念先烈先贤的奉献牺牲；我们后辈必须牢记，历史的错误不可再犯，身为炎黄子孙，我们必须学会和平解决争端，为人类谋幸福，求和平。”

下半天，参访团参观故宫博物院，北京故宫博物院院长王旭东亲自为伊拉讲解。马英九等人弗仅安排勒闭馆伊天游览，车队更好直接从西华门开进去，是高规格个待遇。马英九讲，故宫象征中华民族，展现出中华文化个底蕴搭仔历代个气象，也指出台北故宫个文物也侪是从北京紫禁城出来个，是华夏文化个珍宝，两岸故宫间个交流同合作有重要意义。伊直讲“去中国化”哪能侪弗会得成功个。

夜到头，马英九来勒北京饭店18楼顶楼会议厅会见中共中央政治局委员、中共北京市委书记尹力。尹力致词个辰光先讲到台湾地震，对受灾个同胞表示慰问，表示北京市愿意提供必要个帮助；还提到马英九反对台独，推动两岸关系和平发展，深化两岸交流交往个重要贡献。马英九致词个辰光强调，“过去两岸有“九二共识”作为共同政治基础，坚决反对“台独”，才能搁置争议、拥有互信、共创双赢。在他任内，两岸签署了23个协议，实现三通直航，让两岸人民都受惠。”表示两岸人民来勒经贸、生活丄个实际需要是政治切弗开个。

喫过夜饭，参访团参观国家体育场搭仔国家速滑馆。来勒“冰丝带”，馆方邀请他倒进一瓶水，箇些水会得循环流进制冰个地方，成为滑冰场个一部分；来勒“鸟巢”，大家看夜景打卡。行程结束以後，马英九向候勒场馆外头个大批民众高声问好，欢迎伊拉去台湾孛相。

第九天：4月9号

马英九同青年学子一道来勒八达岭长城唱抗战歌曲《长城谣》

9号上半天，一行人𨂝八达岭长城，来勒长城丄高唱抗战歌曲《长城谣》。马英九𨂝长城受到民众个欢迎，有游客喊出“两岸一家亲！”个口号欢迎伊。台湾青年接受采访个辰光表示，伊最大个收获是认祖归宗，表示箇趟是来寻根个。

马英九同随行个台湾青年学生到访北京大学

下半天，马英九来勒北京大学进行交流活动，北大党委书记郝平、校长龚旗煌、大陆奥运“乒乓球女王”丁宁陪同参观校园，碰着台湾来个北大学生仔邀请马英九打太极拳，伊脱脱西装外套体验，觉着伊武功有所进步。後些来马英九领勒“大九学堂”学员同北大学生开展座谈会。马英九表扬北大水平邪气高，因为伊自家个名字个“英”字，只有北大是写对个。伊还表示，“北大是戊戌变法产物、中华民族救亡图存、兴学图强结果”，伊希望两岸年轻人未来好延续箇份精神，和平奋斗，振兴中华。後些来双方进行闭门座谈、互相送礼物。马箇趟只有致词，并呒没进行公开演讲。马英九本次带“大九学堂”青年来北大交流，是实现旧年个约定。伊個辰光，北大前校长郝平领仔帮大陆学生仔访台，两人约好下次碰头，故咾今朝个安排也是好友再度重逢相聚。马英九也当场再邀请北大师生回访台湾，表示他也会得亲自陪咾大家。

第十天：4月10号

下半天四点钟，中共中央总书记习近平来勒人民大会堂东大厅会见马英九一行。习近平慰问花莲地震台湾遇难人，接下来双方轮流致词，开仔一個多钟头个闭门会议。

夜到，王沪宁来勒钓鱼台国宾馆摆酒水为马英九饯行。晚宴结束个辰光，习近平同马英九讲：“欢迎你以后常常来。”马英九回酒店下车个辰光有人搀牢，赛过老酒喫多哉。

第十一天：4月11号

上半天7点钟左右，马英九同中国大饭店工作人员握手拍集体照。接下来车队开去北京首都国际机场，直接送到停机坪。大陆送机个人有中共中央台办副主任潘贤掌、北京市副市长夏林茂、北京市台办主任霍光峰、中共中央台办联络局局长杨毅咾啥个。箇趟回台湾乘个是中国国际航空CA185次早班班机，先上飞机个“大九学堂”学生仔来勒上机前同大陆方面个人拥抱道别，阿末是马英九上机，正式结束近11天个访问。飞机表定8点35分起飞，阿末是8点42分起飞个。

中午，飞机到桃园机场，马英九发表简短谈话，表示访问大陆11天让台湾年轻人深刻了解到中华历史文化，认识到即使同大陆政治制度弗一样，生活观、价值观也弗一样，但毕竟侪是炎黄子孙，“同属中华民国”，又讲“同属中华民族”。马英九还希望台湾个后生抛开意识形态，认识到台湾同大陆个历史联系、文化连结，並弗是政治好切断个，更重要个是，两岸个中国人，好用和平方式解决争端，只要有共同个政治基础九二共识，两岸就好继续对话。马英九还提到，习近平认真听取台湾年轻人个意见，诚恳个一一回复，表达出大陆推动和平发展、共创两岸福祉个决心，对两岸交流是邪气正面个消息。

各方个反应

 中华人民共和国

中華民國

争议

参访美国黑名单企业

4月1号，马英九同“大九学堂”学生仔参访大疆创新、腾讯、比亚迪咾啥个科技企业以後，民进党立委陈冠廷认为，箇弗仅对台湾个国家利益产生负面影响，还向外界传递台湾支持中国大陆企业个错误讯息。马英九基金会执行长萧旭岑反驳，表示箇隻说法邪气离谱，呼吁年轻人弗要有闭关锁国、故步自封个做法。

接待规格

4月2号，民进党团干事长吴思瑶接受采访个辰光认为马英九从接机个辰光就畀人降格、矮化（比方讲大陆方面只派中共中央台办副主任接机，机场亦呒没红地毯），参访美国黑名单企业更加成为中国统战道具，对11天行程呒啥期待。

4月2号夜到头，大陆方面邀请马英九到白天鹅宾馆同广东省委书记黄坤明进行会面，中评社认为箇证明大陆方面畀马英九一行最高礼遇。

参见

• 第二次习马会
• 2023年马英九访问中国大陆