龔品梅

良文
出自维基百科,自由个百科全书

龔品梅樞機His Eminence Cardinal Ignatius Kung Pin-Mei,1901年8月2號—2000年3月12號),又名龔天爵,聖名依納爵,生於松江府川沙撫民廳唐墓橋(今上海市浦東新區唐鎮)个一個天主敎家庭。曾任羅馬天主敎會司鐸級樞機,天主敎上海敎區正權主敎、南京總敎區搭蘇州敎區宗座署理。

生平[编辑]

求學經歷[编辑]

光緒二十七年(1901年8月2號)出生勒江蘇省松江府川沙撫民廳唐墓橋个一個天主敎家庭,童年時勒耶穌會創辦个聖依納爵公學讀書(今徐匯中學)。民國九年(1920年),19歲个辰光進入神學院研修。

司鐸時期[编辑]

民國十九年(1930年5月28號),廿九歲辰光,晉升爲一名司鐸(神父),從事敎育工作,先後擔任任多間天主敎小學、中學校長。

抗日戰爭結束後,由震旦大學附屬中學主任調任山東省膠州路金科中學校長。

晉牧[编辑]

1949年8月9號,敎廷任命爲天主敎蘇州敎區主敎,10月7號接受駐華敎廷公使黎培理總主敎、華理柱主敎个祝聖

1950年7月15號,龔品梅兼任上海、蘇州及南京三敎區主敎,主敎府設在上海四川南路洋涇浜聖若瑟堂(主敎座堂仍爲董家渡聖方濟各·沙勿略堂),爲上海敎區首任中國籍主敎。

1950年代初交中共當局對抗[编辑]

中華人民共和國成立後,1950年代羅馬敎廷對中國天主敎會个領導搭聯繫斷絕了,中共當局組織了一個愛國天主敎徒“群眾團體”中國天主敎敎友愛國會(後改稱中國天主敎愛國會)。

但龔品梅抵制中國政府對天主敎會个“改造”交“滲透”,讓敎徒繼續接受聖座个領導,拒絕勒敎會內部開展“反帝愛國運動”,伊組織並親自督導了“弗投降、弗退讓、弗出賣”个中華聖母軍支團,阻止聖母軍成員向政府登記搭退團,拒弗參加各級“愛國會”組織。

被捕搭判刑[编辑]

主文章:九八敎難

1955年9月8號,龔品梅搭范忠良金魯賢等30多名神父及300多名敎徒勒上海畀逮捕入獄。當局稱,上海市破獲个以龔品梅爲首个反革命集團,是帝國主義者有計劃地訓練搭組織起來个暗藏勒天主敎內个特務間諜集團。

1960年3月,上海市中級人民法院對所謂个“龔品梅反革命集團案進行公開審理;3月21日判處龔品梅無期徒刑,剝奪政治權利終身。判決書寫:“根據上列龔品梅反革命叛國集團所進行个一系列罪惡活動,本庭確認:以被告龔品梅爲首个反革命叛國集團,披著宗敎外衣,勾結帝國主義,背叛祖國,是帝國主義用以顛覆我國人民民主政權个重要工具,已構成嚴重个叛國罪行。”

軟禁[编辑]

龔品梅於1985年7月畀假釋,交由上海市天主敎愛國會系統軟禁看管。

留居美國[编辑]

1988年1月,中華人民共和國政府宣佈提前釋放龔品梅,恢復其人身自由。

1988年,龔品梅因心臟病畀獲准前往美國接受治療,其後一直居美。

離開中國後,龔品梅成立了以伊个名字命名个基金會,並一直呼籲中國大陸當局給予人民更大个宗敎信仰自由。

龔品梅因胃癌美國東部時間2000年3月12號上午三時零五分勒美國康涅狄格州斯坦福市去世,享年九十八周歲。

軼事[编辑]

1985年,龔品梅敎從獄中獲釋之前嘸沒幾許辰光,菲律賓馬尼拉个辛樞機到上海做友好訪問,龔品梅主敎獲准參加由上海當局爲歡迎辛樞機而主辦个晚宴。箇是龔品梅主敎自入獄以來,第一趟見著普世敎會來訪問个主敎。辛樞機搭龔品梅主敎坐勒檯子个兩頭,當中隔開廿幾名中共黨員,兩家頭嘸沒機會私下交談。勒晏宴當中,辛樞機建議每個人唱一首歌來表示慶祝。輪到龔品梅主敎唱个辰光,伊當牢政府官員搭愛國會主敎个面,雙眼注視著辛樞機,然後唱“儂是伯多祿,勒箇磐石我要建立我个敎會”(Tu es Petrus et super hanc Petram aedificabo Ecclesiam meam)。迭首聖歌,是表明伊承認敎宗个至上權威。龔品梅主敎向辛樞機傳達仔一个訊息:勒伊撥監禁个迭眼年數,伊始終忠於天主、忠於敎會、忠於敎宗。

晏宴結束後,中國天主敎愛國會 (自選自聖) 个上海主敎金魯賢斥責龔品梅主敎:“儂想做啥?表示儂个立場啊?”龔品梅主敎平靜个回答:“我弗需要表示我个立場。我个立場改變歇。”

辛樞機隔手就擔龔品梅主敎个口信轉達撥敎宗,並向世人宣佈:“迭位天主个人,儘管遭受仔難以想像个苦難與隔離,但伊對敎會或對伊子民个愛,卻從未動搖過。”

1991年6月28號,敎宗若望保祿二世梵蒂岡个樞機主敎全體會議浪,授畀龔品梅主敎樞機頭銜,迭位已高齡九十个主敎,從輪椅立起來,擔手杖放到一旁,走上臺階,跪勒敎宗腳前。敎宗顯然深受感動,擔伊扶了起來,授撥伊樞機个紅帽,然後耐心个立勒一旁,看著龔品梅樞機勒九千名來賓个起立歡呼聲中走回輪椅,歡呼聲足足長達七分鐘,是前所未見个熱烈。

宗敎事務[编辑]

  • 敎宗若望·保祿二世1979年6月秘密冊封仍關勒牢監裏个龔品梅爲司鐸級樞機,接替前任于斌个職務,1989年赴羅馬敎廷交敎宗會面。1991年6月29號,敎宗勒馬接見仔龔品梅主敎,並授予樞機紅冠。按照「默存心中」个規例計算,龔品梅樞機畀列爲第三位中國籍樞機。
  • 天主敎輔仁大學於1989年(中華民國七十八年)11月頒贈龔品梅主敎榮譽博士學位。

言論[编辑]

  • “我從來都弗會背叛我个信仰,搭儂信仰共產主義一樣,弗會改變……”
  • “我從事敎職已經交關年數了,我從來嘸沒反對過共產黨个政策。”
  • “我如然也弗能接受伊拉講个進化論,箇是對上主个侮辱。”
  • “共產黨扶助貧窮个人,是好个,我伲敎會也是有幫助貧窮人个做法,但是……”

其它事件[编辑]

  • 1998年6月,97歲个龔品梅擔伊个《中華人民共和國護照》拿到中國駐紐約總領事館辦理延期時,總領事館擔伊个護照吊銷。
  • 據三藩市灣區波羅阿多个Rayman V. Dunn神父所話,龔品梅勒遺囑中要求:當中國弗再由共產黨當權時,擔伊个遺體重新安葬勒故鄉上海

繼承[编辑]

2000年,聖座任命地下敎會范忠良繼任天主敎上海敎區个正權主敎,及天主敎南京敎區署理主敎,外加是地下敎會个天主敎中國大陸主敎團團長。但是未獲中國政府承認、並且常年受到監視。中國政府承認个上海敎區个正權主敎是金魯賢,起初是自選自聖產生,弗畀敎廷承認,後來經伊本人申請,獲得與羅馬敎宗个共融,但是衹畀承認是上海敎區助理主敎

評價[编辑]

  • 天主敎保定敎區爲龔品梅主敎誕辰个賀詞:“一品寒梅雪中傲立,獨擋風霜春撒人間”
  • 美國天主敎主敎團華人牧民中心主任江綏蒙席話,雖然龔樞機畀拘禁了將近三十三年,但勒迭段辰光,龔品梅主敎成爲中國基督信徒个效法典範,弗愧爲耶穌信徒。
  • 中華民國籍樞機主敎單國璽曾話歇:龔品梅生前受盡磨難,死後北京當局又話伊是分裂國家民族个罪犯,但是歷史將會還伊一個公道,伊是“真正有是非之心个人”,將受後世敎會及人民景仰。

外部連結[编辑]

參見[编辑]