華東

華東或者華東地區，中國東部地區個簡稱（搭經濟浪東部地區弗完全一樣），中國地理大區之一。是东亚个中原大一统王朝立在长期发展后，到近代重新定义个一个概念。立在中华民国辰光经过推广深入人心。今朝講起來個華東地區就是所谓个「華東六省一市」，包括山東、江蘇、安徽、浙江、江西、福建搭上海。臺灣勒地理區域浪畀中國官方看成功華東地區（中華民國臺灣地區勒中華人民共和國地圖浪是臺灣省），但必過因為兩岸分治，中華人民共和國政府從來朆實際管轄控制過臺澎金馬（臺灣）。

文化

迭个地区立在中原帝国还嘸诞生个辰光，是百越搭东夷部落个领土，并创造出搭黄河流域文化差别蛮大个文明。弗过，立在中原帝国个一批批扩张殖民下头，乃朝所谓个华东地区，文化逐步开始分化。个当中，本身就属于中原个乃朝皖北、鲁西等地，立在春秋战国就开始北方化。东面老早个东夷人生活个胶东半岛，立在两汉辰光，也逐步同化。成为胶东文化个渊源。立在淮河南面长江北面个地区，文化到元末才通过战乱搭大移民开始定型，成为一种南北个过渡文化，也就是江淮文化。立在长江南面个地区，长期拥有一种从良渚搭河姆渡发源并发展个独特百越文化遗留，后势来，又吸取蛮多北方南窜贵族带来个文化特色，形成吴越文化。弗过，本身属于吴越文化圈个皖南交关地区，立在太平天国叛乱当中，人口毁灭，乃朝已经属于江淮文化哉。立在华东南面个福建，从五代十国开始同北面个吴越分开来，发展出更富有海洋性个闽文化。个当中，以闽南人顶顶有名，并深刻影响到台湾个文化基调。

饮食

迭个区域因为是强行划分个，所以，实际浪是嘸啥统一个饮食特点个。北面个山东沿海欢喜吃面食，南面个吴越人、闽南人等，欢喜吃海鲜。靠近内亚个皖北，欢喜重口味个胡辣汤。

语言

迭个地区个语言也是相当分散个，包括中原官话、胶辽官话、吴语、江淮官话、闽语侪有大批人群使用。弗过因为推普搭人口迁移个关系，乃朝，普通话是顶顶强势个语言，并立在江浙搭福建逐步大面积替代本地人个原有方言。另一方面，大量中原官话人口并嘸因自家迁入吴越就放弃中原官话，所以，也导致一些场化个实际方言已经发生替代，让本身个吴语成为边缘语言，中原官话成为实际意义浪该地个主要方言。