基督教

来自Wikipedia
蹦到: 导航搜寻

基督教,英文Christianity,信仰耶稣基督个宗教,是乃朝世界浪信徒人数顶顶多个宗教。

历史[编辑]

早期历史[编辑]

迭个宗教立在2000年之前立在乃朝个巴勒斯坦地区发源。立在开始辰光是犹太教内部个一个小团体。到圣保禄改革之后,成为面向各个族群个普世宗教。到公元2世纪,已经传遍整个东地中海。公元3世纪后半阶段。基督教吸纳交关知识分子替罗马上层进入,也引发罗马帝国皇帝戴克里先对基督教个迫害。到312年,君士坦丁大帝开始拥护基督教。到4世纪后半段,基督教成为罗马国教。同时,因为内部对三位一体解释弗同,开始出现顶早个分裂。乃朝个东方亚述教会亚美尼亚教会就是迭个阶段形成个。

东西对立 =[编辑]

公元5世纪,西罗马帝国灭亡,罗马主教依靠教会,立在西欧开始掌握实际个基层控制权。立在帝国东部个君士坦丁堡,教会更加本地化,希腊化。君士坦丁堡替罗马之间个对立从此开始。公元7世纪,罗马教宗改革教会,建立修道院,教阶制度。同时定居西欧个日耳曼人逐渐抛弃异端,接受罗马教宗个领导。东方个拜占庭帝国南部领土畀回教侵略占领。导致拜占庭帝国进一步希腊化。罗马教宗开始不服从拜占庭皇帝个指示。到9世纪,罗马教宗加冕法兰克王国国王查理曼为皇帝。又过100年不到,加冕东法兰克国王奥托神圣罗马帝国皇帝。替拜占庭分庭抗礼。1054年,罗马替拜占庭相互绝罚对方个最高宗教领袖。东西教会正式分裂。

立在迭个阶段,尽管存在对立替回教徒个侵略,但基督教个传播一直嘸停歇。立在东面,亚述教会拿基督教传播到中华帝国个核心地区,乃朝西安还有亚述教会(立在中国畀称为景教)个碑文。立在北欧,横行抢劫个维京人立在9-10世纪大部分侪皈依基督教。立在东欧,斯拉夫人替本来属于游牧民族个马扎尔人保加尔人侪皈依基督教。基辅罗斯大公弗拉基米尔立在10世纪末期带领罗斯人接受拜占庭个洗礼。

中世纪替十字军[编辑]

进入11世纪,基督宗教立在西欧建立全面个统治地位。因为个辰光西欧流行封建领主制度,城市流行自治制度。所以,只有教会成为涵盖各个地区,提供交关服务个组织性机构。教会立在中世纪欧洲发挥邪气巨大个影响,医院、大学、乃至军事组织当中,侪有教会个身影,各国君主加冕也需要教会出面才好算成功。这也让罗马教会积累交关财富。一些老罗马贵族家庭立在7世纪就开始拿小孩送入教会,乃朝罗马成为权贵个聚集地区。教会个腐败现象开始滋生。一些修士对迭个现象邪气弗满意,伊拉成立自家个苦修组织。倡导回到基督教个本源。个当中,西多会方济各会影响顶大。教会对这些修士以礼相待,支持伊拉个举动,弗过,对反抗教会权威个异端,则利用贵族替自家个军事组织加以消灭。例如法国南部普罗旺斯个异端,就畀罗马派遣个十字军灭脱。

11世纪,东罗马帝国立在小亚细亚惨败,突厥回回开始涌入小亚细亚,拜占庭帝国无力防守东方穆斯林个侵略,所以恳请西方基督教会出力帮忙。1099年,教宗号召十字军东征开始。十字军势如破竹,到1100年就占领耶路撒冷,解放当地个基督徒。并且立在地中海东岸,建立交关替拜占庭保持合作关系个基督教王国(例如邪气有名个耶路撒冷王国)。十字军个成功立在西欧掀起宗教狂热。此后为保护圣地个基督教王国,先后又发动交关趟十字军东征,弗过动机有好有坏,比方第四趟十字军东征就是针对拜占庭帝国个,酿成灾难性后果。到13世纪末,因为欧洲宗教热情个减退,十字军王国逐渐畀消灭。

十字军东征树立教会个权威,但到14世纪开始,反而成为教会个包袱。大量回到欧洲个十字军成为当地一霸,最终只好靠秘密方式进行处决(圣殿骑士团畀灭脱)。到14世纪,天主教本身发生教宗对立,西欧国家分为两派,一部分拥护罗马教宗,一部分拥护阿维尼翁教宗。此时,东方个东正教陷入水深火热当中。突厥人开始大规模进入巴尔干,立在1389年击败塞尔维亚之后,成为巴尔干个主宰势力。同时,北面个罗斯地区,立在13世纪畀内亚个蒙古帝国征服。到15世纪才彻底独立。拜占庭个东正教立在回教个阴影下,交关希腊人替中东基督徒皈依回教

内部连接[编辑]

Commons-logo.svg
维基共享资源里向寻得着搭该篇文章搭界个多媒体资源: