上海闲话

上海閒話
	Zaon he ghe gho
母语戶蕩	中国大陆; 臺灣; 香港; 美利坚合众国; 澳大利亚; 加拿大; 日本; 英国
使用戶蕩	上海市搭交關境外华人区
族群	中國汉族-吳越人，老上海租界个外國人
幾許人講	約莫1000多萬（日期不详）
語系	漢藏語系漢語族吳語太湖片苏沪嘉小片上海閒話; ; ; ; ;
文字	漢字、拉丁字
官方地位
官方言話	嘸沒
管理机构	嘸沒
言話代碼
ISO 639-3	–
ISO 639-6	suji
语言学家列表	wuu-sha
Glottolog	None

该文章包括国际音标符号。如果呒不合适个字母搭符号支持，相关字符可能显示为问号、方块或者其他个符号，而非Unicode 字符。

用上海閒話講「維基百科，自由个百科全書」

上海闲话，国际音标：[z̥ɑ̃²² he̞⁵⁵ ɦe̞³³ ɦo²¹]，是吴语太湖片苏沪嘉小片个一种闲话，还是吴语里向拉近代交关有影响力个一种语言。乃朝上海闲话畀推广普通闲话挤占空间，外加上海人出生率下降，出国移民搭外地移民大量涌入，另外最重要个是现在上海学堂里向勿许侬讲上海闲话，弄得来上海閒話垃拉上海使用率豪𢜶下降，传承已经变成了严重个危机。

狭义浪个上海闲话一般性指个是上海市区人讲个闲话。

分布[编辑]

上海闲话分布拉上海市区，包括黄浦、静安、虹口、杨浦、徐汇、普陀以及上海郊区搭国外个交关多地方。八十年代后，上海市中心拆迁加剧，交关上海人畀迁到郊区，所以上海闲话现在开始往郊区扩散。弗过市中心一些地方因为外来人口个关系，实际上已经成为上海闲话个空白区了。

历史[编辑]

上海闲话个基础是松江片吴语，原生因为来拉海边，发展交关慢，来北部吴语里向算是顶滞后个一道里个。开埠仔，各个场化个移民特别是江浙吴语区移民出现来当地，再加现代化个进程，上海地区吴语个面貌开始以前所未有个高速发展。上海闲话是适合近代语音个吴语，消灭脱大部分中古汉语遗留，拥有快速、明了个特点。音韵也相当便当，曾经拉70年代前后成为长三角地区通用闲话。^[1]

演化[编辑]

錢乃榮講上海閒話有四隻演化階段。^[2]

第一段[编辑]

1853到1899年，箇段辰光大多數資料儕是西方語言學家寫成功个。

/dz/韻消失脫
咸山攝鼻音落脫
/n//ŋ/（前後鼻音）弗分
入聲全部併進/ʔ/
濁上歸去

第二段[编辑]

1900到1939年辰光，就是「老派」。

雙唇擦音變成功唇齒音
軟顎音搭/n/顎化
/uo/搭有點/ɔ/合併進/o/
咸山攝合口呼變成功/ø/
/œʔ/搭/eʔ/併成/aʔ/，/ʌʔ/變成功/ɑʔ/

第三段[编辑]

1940到1969年，「中派」。

氣聲發聲態落脫
/f h v ɦ/分別更加叫明顯
高元音前頭/s z/併進/ɕ ʑ/
雷來蘭弗分
/ie/韻慢慢叫併到/i/裡向
/ɿ ʮ/合併
/iəŋ//iŋ/合併
/ioŋ//ioʔ/分割出/yəŋ//yɪʔ/
/ɔʔ//iəʔ/分別併進/oʔ//iɪʔ/
陰上陰去合併

第四段[编辑]

1970到1999，箇个階段結束就代表新派个開始。

/dʑ/因為普化出現
有點人疑母變成功/ɦ/
普通閒話/f/影響到上海閒話本身讀/h ɦ/个字
瞎胡調个清化
咸山攝雙元音變單元音
/ã//ɑ̃/弗分，鼻化也有辰光讀成鼻音/ŋ/
/aʔ/搭/oʔ/併進/əʔ/，/iaʔ/併進/iɪʔ/
/ioŋ//ioʔ/普化成/yŋ//yɪʔ/
/e/有辰光普化成/ei/
/ɤ/讀成[ɤɯ]
/o//u/弗分

新新派[编辑]

推廣普通話之後，上海閒話進入新个階段，實梗浪个音系因人而異。特徵譬如講清濁弗分、/ɦ//ʔ/落脫，音系豪𢜶往普通閒話靠近。

音韵[编辑]

根据好考个资料，一般根据音韵浪个两样，拿上海闲话分成功老派、中派搭仔新派三种。

连读变调[编辑]

中派上海闲话

代碼	調式	單字調	二字調	三字調	四字調	五字調
1.	陰平式	53	55＋21	55＋33＋21	55＋33＋33＋21	55＋33＋33＋33＋21
5.	去声式	34	33＋44^[1]	33＋55＋21	33＋55＋33＋21	33＋55＋33＋33＋21
6.	去声式	23	22＋44	22＋55＋21	22＋55＋33＋21	22＋55＋33＋33＋21
7.	陰入式	55	33＋44	33＋55＋21	33＋55＋33＋21	33＋55＋33＋33＋21
8.	陽入式	12	11＋23	11＋22＋23	11＋22＋22＋23 22＋55＋33＋21	22＋55＋33＋33＋21

表记[编辑]

在上海开埠个初期，出现着上海土音字。是套系统是由美国传教士高第丕发明个，起头是用来到上海传教。后首有侬运用渠发明个土音字，出版着土音字版个《伊娑菩个比方》。乃朝澳大利亚国家图书馆有一本收藏在许。

词汇[编辑]

上海开埠仔，作为中国现代化个桥头堡，接触现代个物事也来中国领先。该个也反映来上海闲话里向。归个辰光个上海闲话吸收交关外国词汇，甚至形成所谓个“洋泾浜”英文。上海闲话本身也造出交关新词新语，乃末再扩散到吴语区搭中国别个场化。

人称代词[编辑]

老派上海闲话个人称代词是：

	第一人称	第二人称	第三人称
单数	我 /ŋu¹³/	侬 /noŋ¹³/	渠（俗作佢、伊，下同） /ɦ̥i¹³/
复数	伲 /ȵi¹³/ 我伲 /ŋu^13-11 ȵi^13-55/	㑚 /nɑ¹³/	渠拉 /ɦ̥i^13-11 lɑ^13-55/

中派、新派上海闲话个人称代词是：

	第一人称	第二人称	第三人称
单数	我 /ŋu²³, ɦ̥u²³/	侬 /noŋ²³/	渠/ɦ̥i²³/
复数	阿拉 /ᴀʔ^5-33 lᴀ(ʔ)^23-44/	㑚 /nᴀ²³/	渠拉 /ɦ̥i^23-22 lᴀ(ʔ)^23-44/

第一人称复数到“阿拉”个变化明显是受宁波话个影响。
所有格通过拉代词或名词后添加“个” /gəʔ/ 而构成。

现状[编辑]

参见：保衛上海閒話

上海闲话搭其他方言差弗多，侪处垃消亡过程当中。外来人口个涌入加上强行推广官方语言。让上海闲话来勒上海个市中心成为次等语言。来勒郊区情况还要叫严重。外来人口聚集个闵行、宝山郊区，已经形成了大片中原官话方言岛。上海家长对于上海闲话也没多少清醒认识，多数家长，尤其是老年人，热衷教伊拉后辈普通话，现在上海闲话来勒00后里基本消失。语言发展方面，因为推广讲普通闲话，上海闲话造词能力已经邪气低，基本浪向侪是普通闲话借词。

2013年，上海地铁16号线搭更加新个郊区线路，还有交关公交车侪有得上海闲话报站听。

2017年，iOS 11系统里向增加仔上海闲话听写功能。

2021年，上海闲话电影《爱情神话》上映。

2022年，iOS 16系统里向增加仔上海闲话TTS（语音转文字）語音包「南南」。

2022年，动画《阳光咖啡厅之新友纪》上海闲话版垃bilibili高头开播。

2023年往後，各色各樣AI个發展迅速，電子化變了好叫便當，網絡高頭也有越來越多用上海閒話虛擬歌姬（Vocaloid）調教出个歌。^[3]

“沪语”[编辑]

「沪语」是近来喇勒媒体当中兴趣个对上海市区话个称呼。

沪语爱好者根据语言学定义，认为沪语是一种独立于中文个语言。

就好像苏州人覺著吴语就是指苏州閒話一样，上海市民覺著沪语就是上海闲话。当然，交关多个上海人对语言问题非常重视，有老许多社会团体搭机构多次要求政府保护沪语。所以垃拉媒体当中，对使用“沪语”一词並嘸沒啥个顾虑。

“优越感”[编辑]

箇歇有点外地人觉着上海人垃上海公共场合讲上海闲话就是弗尊重、歧视外地人，搞得唻上海人弗敢对服务行业个人讲自家母语。^[4]

别样[编辑]

嘉兴闲话

参考[编辑]

↑ 汪平. 普通话和苏州话在苏州的消长研究. 语言教学与研究 2003年第1期. 34. 2003年 [2018-05-20]. （原始内容存档于2018-05-20）.
↑ 錢乃榮（2003年）《上海语言发展史》，上海人民出版社
↑ https://www.bilibili.com/video/BV1DP4y197FQ 首个上海话虚拟歌姬唱上海！【心上华海】晴霖_上海话UTAU COVER
↑ 张星云. 上海：12场并非大受欢迎的方言讲座. 《三联生活周刊》. 2020年12月21日, 1118 (51) [2021-10-06]. （原始内容存档于2021-07-01）.

外部链接[编辑]

吴语协会
上海语言文化资源网络展示平台檔案，存勒Wayback Machine當中。（2017年2月15號）

[1] 汪平. 普通话和苏州话在苏州的消长研究. 语言教学与研究 2003年第1期. 34. 2003年 [2018-05-20]. （原始内容存档于2018-05-20）.

[2] 錢乃榮（2003年）《上海语言发展史》，上海人民出版社

[3] ttps://www.bilibili.com/video/BV1DP4y197FQ 首个上海话虚拟歌姬唱上海！【心上华海】晴霖_上海话UTAU COVER

[4] 张星云. 上海：12场并非大受欢迎的方言讲座. 《三联生活周刊》. 2020年12月21日, 1118 (51) [2021-10-06]. （原始内容存档于2021-07-01）.

[1]

[2]

[3]

[4]