苏州言话

良文
出自维基百科,自由个百科全书

苏州言话,流行于苏州地区。苏州言话属于吴语太湖片苏嘉沪小片

苏州言话长期以来一直拨看作是吴语太湖片个代表,也是汉语方言研究中顶早拨研究个方言之一。

苏州言话以“嗲”出名,所谓个“吴侬软语”(“”作人解)就是从迭个方面讲个。

昆曲搭仔评弹侪使用苏州言话,并且流行于整个吴语太湖片。

现代苏州言话有27个声母,43个韵母,7个声调,搿个声韵调系统也是吴语个一般性情况。

苏州言话也是一种文学语言,19世纪兴起个吴语文学比如讲《海上花列传》就是用苏州言话写成个。

分布[编辑]

泛泛个讲,苏州地级市境内个言话侪好叫苏州言话。不过一般性狭义个苏州言话,是指苏州市区搭附郭原吴县个言话。

历史[编辑]

苏州言话个历史悠久,从春秋辰光开始,就有了吴国。吴国里向个人使用个言话就是吴语,而苏州言话就是吴语个代表。

现状言[编辑]

自从二十世纪八十年代之后,因为强制个推普搭大规模个外来人口涌入,苏州言话立在苏州社会上个影响逐渐边缘化。乃朝年轻人大部分侪欢喜用普通言话交流。中学生,本地大学生弗晓得哪亨讲苏州言话个情形越来越普遍。苏州乃朝有超过700万外来人口,已经深刻改变当地个语言结构。立在十几年之后,苏州言话畀彻底从社会上挤出,也弗是危言耸听哉。

影响[编辑]

苏州个言话是覆盖苏南上海市浙江个中国第二大方言—吴语个代表言话。由于苏州与上海搭界,苏州言话勒上海个影响比较大。民国辰光,有蛮多个小说中有苏州言话个痕迹。

分类[编辑]

苏州言话个分类可以从好多个方面来看。从辰光浪看,分为老派苏州言话与新派苏州言话,主要个区别就是新派言话逐渐向普通闲话靠近,新派言话弗有老派个纯正。从场所浪看,有苏州城区与苏州周边(无锡常熟等)个口音区别。

音韵[编辑]

老派标准苏州言话侪好有28声母、49韵母搭8声调。现代苏州言话侪好有27声母、48韵母搭7声调,该个也是吴语个一般情况。

声母[编辑]

苏州言话侪好有27个声母,完整个保留中古浊音。包括鼻音、塞音、清音、浊音、塞擦音、边音等等。

韵母[编辑]

苏州言话侪好有48个韵母,该个与普通闲话有顶顶大个弗同,哀嗒48个包括部分自成音节个韵母。

声调[编辑]

苏州言话7声调:阴平、阴上、阴去、阴入、阳平、阳上、阳入。哀嗒个入声是北方官话所勿有个,入声分阴阳是江淮官话所勿有个。 苏州言话弗单单包括单字调,区别于普通言话的顶大一点就是有蛮多的连续变调。丰富个连续变调是苏州言话乃至吴语区别于汉语族里向其他语言个大特点。

方言搭仔派别[编辑]

苏州言话一直勒浪发展,语音也有所变化。该搭拿上世纪初以来个苏州言话分成三派,即老派、中派搭仔新派。

另外,特别拿评弹苏州言话拿出来,分析该个特殊个相对较为固定个艺术语言个特点。

老派[编辑]

该搭个老派以《苏州方言同音字汇》,也就是丁邦新《一百年前的苏州话》里向研究个苏州言话音系为准。

中派[编辑]

此地个中派苏州言话以《汉语方言概要》里向记录个苏州言话音系为准。

搭老派相比,音韵浪突出个特点是,中派弗再分平舌音搭仔翘舌音,“蛙”[uo]并到“丫”[o]里向,“晏”[ɛ]并到“爱”[ᴇ]里向。

新派[编辑]

该面搭讲个新派苏州言话以《当代吴语研究》里向记录个苏州言话音系为准。

评弹苏州言话[编辑]

主文章:苏白

评弹苏州言话是苏州评弹里向用个艺术化个言话。有星人拿渠看成是所谓“正宗”个苏州言话。俚弗像一般口头言话样能随便,是评弹演员个基本功,为之讲比较稳定,发展呒拨一般苏州人个口头言话来得快。

评弹苏州言话是比较老派个苏州言话,搭今朝个多数苏州人讲言话是弗一样个。凡是要说唱苏州评弹个人,头一个要学个就是评弹苏州言话。

登语音浪来讲,评弹苏州言话有几只比较突出个特点:

  • 带翘舌声母

今朝个苏州市区言话,已经呒拨翘舌音哉。勒拉民国初年个辰光,老派个苏州言话里向还有翘舌音。该歇只有登郊区搭仔评弹艺人个嘴里向还听得见翘舌音,市区个苏州言话已经呒拨哉。评弹苏州言话就保留着实梗一只老派苏州言话个特点。尚况因为已经呒拨群众基础哉,所以评弹艺人嘴里向个翘舌音也开始弗哪亨整足。实际浪向,评弹苏州言话个翘舌音个分布搭仔普通言话是两样个,据赵元任先生讲是搭天津言话差弗多。苏州言话个“翘舌音”搭仔普通言话个还是有一定区别个,苏州个“翘舌音”搭仔英语法语里头个一样,舌头是弗卷个。必过现在推广普通言话,为之讲也有人按照普通言话个分法来分。

评弹勒唱词里向,因为基本浪用个侪是古代官话白话个句子,为之讲文白异读比平常辰光讲张要来得多。交关平常辰光已经几乎弗用个文读,勒弹词里向还有。

再一个,对于像曹操啊刘备啊该种身份个人,俚笃讲言话侪要用所谓个“中州韵”,用个侪是苏州官话,所以文读就外加多哉,连调头也像唱戏里向个。

登用词造句浪来讲,评弹苏州言话交替用苏白私白)搭仔官白,来适应弗同个人物身份个需要。再一个呢评弹里向个说表也就是叙述描写个部分,一般性也侪是用苏白个。

语法[编辑]

词汇[编辑]

人称代词[编辑]

苏州言话个人称代词是:

第一人称 第二人称 第三人称
单数 /ŋoʊ31/
(奴 /noʊ31/
/nᴇ31/ /li55/
唔倷 /n̩31-13 nᴇ31-21/
(俚倷 /li55 nᴇ31-21/
复数 /ȵi31/ 唔篤 /n̩31-13 ·toʔ?-2/ 俚篤 /li55 ·toʔ?-2/

别样[编辑]

  • 名词
    • “宝货”:无能的人
    • “门腔”:舌头
    • “迷露”:雾
    • “跌失铺盖”:松松垮垮
    • “铜钿”:钱
    • “猪头三”:不识好歹的人
    • “汤吾子”:热水袋
    • “皮头”:被子
    • “赤佬”:鬼魂,或多别人的鄙称
    • “么事”:东西
  • 动词
    • “牵记”:牵挂
    • “钝卵”:意气用事
    • “勿碍”:无妨
    • “白相”:玩
    • “吃伤活”:打
    • “轧闹猛”:凑热闹
    • “两搡半”:用手吃
    • “搞百叶节”:乱搞
    • “相骂”:吵架
    • “钆闹猛”:凑热闹
    • “钆朋友”:谈恋爱
  • 形容词
    • “下作”:下流
    • “老茄”:少年老成
    • “热络”:亲热
    • “洋盘”:不识货
    • “难板”:难得
    • “破诸落蓑”:破破烂烂的
    • “贼吊呣咄”:猥琐的样子
    • “投五投六”:没目标
    • “摸老太”:形容做事情慢吞吞
    • “小毕扬子”:骂人的粗话
    • “结棍”:厉害
    • “筋筋拉拉”:肉中带筋咬不动
  • 副词
    • “齐巧”:恰巧
    • “纯(尽)光”:仅仅
    • “本生”:本来
    • “板要”:偏要
    • “特为”:故意
    • “刚巧”:刚才
  • 感叹词
    • “哦哟歪”:感叹词,表惊讶

另见[编辑]

相关参考文献[编辑]

  • 《苏州方言志》 叶祥苓 江苏教育出版社 1988
  • 《苏州方言词典》 李荣主编 江苏教育出版社 1998
  • 《苏州方言地图集》 叶详苓主编 龙溪书会 1981
  • 《江苏省志·方言志·吴语苏州方言篇》 鲍明炜主编 南京大学出版社 1998
  • 《苏州话音档》 叶详苓、盛毓青主编 上海教育出版社 1996
  • 《苏州方言语音研究》 汪平 武汉:华中理工大学出版社 1996
  • 《苏州方言语法研究》 李小凡 北京:北京大学出版社 1998

外部链接[编辑]

维基共享资源里向寻得着搭该篇文章搭界个多媒体资源: