评弹

吴语维基百科,自由个百科全书
跳到导航 跳到搜索

评弹,又叫称苏州评弹说书或者叫南词,是苏州评话搭弹词个总称。是一门古老、优美个说唱艺术。 评话通常一个人登台开讲,内容大部分侪是金戈铁马个历史演义搭叱咤风云个侠义豪杰。弹词一般两个人说唱,上手持三弦,下手抱琵琶,自弹自唱,内容大部分侪是儿女情长个传奇小说搭民间故事。 弹词侪用吴音演唱,抑扬顿挫,轻清柔缓,弦琶琮铮,非常悦耳。经过之历代艺人个创造发展,曲调流派纷呈,风格各异。搿个四十几年来,评弹从内容到形式侪推陈出新,传统书目得到之整理提高,反映现实生活个新编书目陆续涌现,中篇搭短篇等新个演出形式也日臻完善。 两零零六年五月廿号,苏州评弹经国务院批准列入第一批国家级非物质文化遗产名录。

历史[编辑]

评弹起源勒嘞山明水秀个江南水乡——苏州,流行于富饶漂亮个长江三角洲地区。勒四百多年前个明代,苏州地区已经有之说书活动哉。据吴县志记载:“明清两朝盛行弹词、评话,二者绝然不同,而总名皆曰说书,发源于吴中。”潘心伊勒《书坛话堕》一文当中介绍,清朝乾隆皇帝到苏州个辰光,曾经拿当地一个姓王个说书艺人召的来,弹唱一段《游龙传》。搿个人叫王周士,俚晚年创立之评弹历史浪第一个行会组织——光裕公所。 光裕社成立之后,评弹艺术得到之迅速个发展。勒清嘉庆、道光年间,出现之陈遇乾、俞秀山、毛菖佩、陆世珍搿几个前四大名家。前四大名家个高超技艺,提高之评弹艺术个总体水平,也扩大之评弹个影响。 到之清同治、光绪年间,评弹(搿许辰光又叫苏州说书)演出已经不局限于苏州地区。1846年,上海开阜以后,经济搭文化侪以交关快个速度发展起来,人口也日益膨胀。虽然说搿搭五方杂处,但不过苏南人最多,其中苏州地区个人所占比例特别高,一度上海出现“街头巷尾尽吴语”个情景。评弹进入上海以后,落地生根,勒艺术个深度、广度搭高度浪发展,受到之上海人个厚爱。 搿许辰光,勒苏沪地区又出现之以马如飞、姚时章、赵湘洲、王石泉组成个后四大名家为代表个一大批评弹艺术家,搿是评弹艺术成熟个标志,也为以后个大发展奠定之基础。从二十世纪初开始,评弹活动个中心,已经从苏州转移到之上海,再以上海为中心,往长江三角洲地区辐射,评弹几乎涵盖之整个江浙水乡,还远到北京、天津、武汉等地。以后个五十年,是评弹发展个全盛时期:名家辈出,流派纷呈,好节目层出不穷。名家像张云亭、朱耀庭、谢少泉、杨月槎、魏钰卿、黄兆麟、蒋如亭、汪云峰、周玉泉、许继祥、夏荷生、沈俭安、薛筱卿、徐云志、李伯康、朱介生、姚荫梅、 刘天韵、祁莲芳、张鸿声、张鉴庭、严雪亭、蒋月泉、杨振雄、朱慧珍、侯莉君、徐丽仙、何占春,王鹰等;好节目有:《杨乃武与小白菜》、《张文祥刺马》、《十美图》、《顾鼎臣》、《啼笑因缘》、《秋海棠》、《孟丽君》、《四进士》、《情探》、《秦香莲》、《武松》、《林冲》、《三笑》、《玉蜻蜓》、《描金凤》、《倭袍传》、《白蛇传》、《珍珠塔》、《筱丹桂之死》等。 五十年代初,上海市人民评弹工作团搭苏州市人民评弹团等专业演出团体相继成立,搿点团体集中之搿许辰光评弹界个弗少精英,俚哚编演之一大批轰动一时个好作品,进一步开拓之评弹市场,还拿搿门艺术个水准推向之新个高峰。以后,因为各种原因,评弹经历之艰难曲折,出现式微个征候。但不过勒二十世纪末,长江三角洲地区,还有几十只专业团体搭几百个演员,勒嘞演出。

流派[编辑]

大致可分三大流派,也就是陈(遇乾)调、马(如飞)调、俞(秀山)调。经过一百来年个发展,又弗断出现继承搿三个名家风格,又有创造发展自成一家个新流派。像"陈调"个继承人刘天韵、杨振雄;"俞调"个继承者夏荷生、朱慧珍,俚哚侪自成一家。其中“马调”对后世影响最大,几花继承并自成一派者,像薛(筱卿)调、沈(俭安)调、“琴调”(朱雪琴在“薛调”基础上的发展)。周(玉泉)调是勒“马调”基础浪个发展,而蒋(月泉)调又出自“周调”,搿浪发展繁衍形成之苏州评弹流派唱腔千姿百态个兴旺景象。

演出形式[编辑]

评弹用个语言是苏州吴语,有单档、双档、三个档、小组唱、表演唱、大合唱等多种形式,其中以双档最为常见。

表演分为说、噱、弹、唱、演五个方面。

说:演员通过语言来讲述故事、描述环境、制造气氛搭刻画人物 噱:书中个笑料,来引起听众对演出个兴趣 弹、唱:评弹个音乐部分 演:主要包括“手面”搭“起角色” 手面:手个动作运用搭面部表情 起角色:演员模仿书中人物个音容笑貌,让听众勒视觉上搭听觉浪,对书中角色有一个具体生动个印象

类型[编辑]

  • 长篇评弹
  • 中篇评弹
  • 短篇评弹
  • 评弹选回

参考文献[编辑]

  1. 杨振雄简介 .中国评弹网 [引用日期2012-10-22] 。
  2. 苏州评弹·中国最美的声音 .中国评弹网 [引用日期2012-10-13] 。
  3. 曲起苏州六百年 .苏州新闻网 .2012-06-29 [引用日期2012-10-21] 。
  4. 长篇弹词《筱丹桂之死》说红二十年 .中安在线 .2004-08-20 [引用日期2012-10-22] 。
  5. 陈云与评弹界交往纪事(上) .中央文献研究室官网 [引用日期2012-10-21] 。
  6. 吴宗锡:评弹精华五十年流失七成 .网易 .2009-06-16 [引用日期2012-10-25] 。
  7. 徐云志的情趣琐事 .网易 .2011-08-02 [引用日期2012-10-12] 。