跳转到内容

浦东鸡

出自维基百科,自由个百科全书
上海小绍兴酒家个招牌白斩鸡,传统浪用个就是浦东鸡[1]

浦东鸡又叫三黄鸡九斤黄,是上海浦东沿海地区个家鸡品种。叫“九斤黄”是因为成年个公鸡好长到9斤重。叫“三黄鸡”是因为伊个嘴巴、脚、毛侪是黄颜色个 [2]。1840年代开始,出口欧洲搭仔北美以后,浦东鸡勒拉全世界侪蛮行个,对西方个家禽养殖行业产生仔深远个影响 [3] [4]

历史[编辑]

浦东鸡(九斤黄)顶顶早勒拉明朝就畀记录下来。江阴文人李诩勒拉伊个《戒庵老人漫笔》当中提到过:“嘉定南翔罗店出三黄鸡,嘴、足、皮毛纯者佳,重数斤,能治疾。”崇祯十五年(1642年)勒拉《太仓州志》高头也有写道:“鸡出嘉定,曰黄脚鸡,味极肥嫩。”

清朝开始,有“九斤黄”之叫法。勒拉《丰暇笔谈》里向,提到过“鸡之绝大者名九斤王,亦曰九斤黄。王者雄长之称,黄则色至秋肥而焕彩也。出嘉定太仓间”。

根据高头个文献,九斤黄最初个产地应该勒拉上海西北面个嘉定、南翔等地方 [2][5]

清朝个辰光,九斤黄个产地转到浦东,箇末有仔“浦东鸡”个名字。勒拉雍正八年(1730年),《南汇县志》里写道“鸡产浦东者大,有九斤黄、黑十二之名”。光绪五年(1879年)《川沙厅志》也有“鸡,吾乡产最大,有九斤黄、黑十二之名”个讲法 [5]

浦东鸡勒拉1956年个全国农业展览会高头畀讲好。 1971年,浦东鸡勒拉上海市农业科学院畜牧兽医研究所举办个品味质量鉴定会上向捞着冠军。后些来上海畜牧兽医研究所对浦东鸡进行杂交育种研究,叫“新浦东鸡” [6] [7]。浦东鸡搭仔新浦东鸡侪畀划进《上海市畜禽遗传资源保护名录》与《国家级畜禽遗传资源保护名录》当中[8] [9]

出口海外[编辑]

1843年,第一趟鸦片战争结束后,英国海军军官爱德华·贝尔彻回到英国,拿名为“Cochin-China”(交趾支那鸡)的鸡品种送畀维多利亚女王 。 1847年,来自英国汉普夏个穆迪(Moody)同来自埃塞克斯郡格雷斯个阿尔弗雷德·斯特金(Alfred Sturgeon)两個养鸡个人从上海引入鸡种(九斤黄),叫伊“上海鸡”(Shanghai Fowl)。上海鸡勒拉1850年个伯明翰博览会高头一举成名、非常行。箇上海鸡就是现在个交趾鸡(Cochin),只不过改只名“Cochin[3] [4]

1847年左右,九斤黄从上海输入美国 [3]

明治个时代,九斤黄也出口到日本。明治十五年(1882年)中国人带仔九斤黄去千叶县养鸡 [3]。同一辰光,尾张藩藩士海部壮平日语海部壮平搭海部正秀两兄弟开始拿千斤黄搭当地个土鸡杂交 [10]

特征[编辑]

浦东鸡长来比较大、三角形样子,嘴巴短貤有点弯,基部粗壮呈黄颜色,上头部分呈褐颜色。

只有一只头冠,冠、肉垂、耳叶侪是红颜色,肉垂貤薄貤小。虹彩呈黄颜色,皮肤则是白颜色或者淡黄颜色。大腿、脚指头也是黄颜色,部分有胫羽、趾羽。

公鸡个羽毛颜色有黑胸红背、红胸红背、黄胸黄背三种,母鸡则全身黄色,深深浅浅 [6] [8]

参考文献[编辑]

  1. (1992)《上海文化源流辞典》.上海社会科学院出版社,575. 
  2. 2.0 2.1 (2000)《中国历史大辞典·科技史卷》.上海辞书出版社,25. 
  3. 3.0 3.1 3.2 3.3 (1995)《中国养禽史》.中国农业出版社,117-120. 
  4. 4.0 4.1 (2017)The Sensational Story of the Cochin. 
  5. 5.0 5.1 (1994)《中国农史辞典》.中国商业出版社,8. 
  6. 6.0 6.1 《中国家禽品种志》. 
  7. 《沪郊百宝 上海农村特产资源集锦》. 
  8. 8.0 8.1 上海猪、上海羊、上海鸡的名单来了,好多是最正宗的“上海味道” (2021-01-16).
  9. 关于公布《国家畜禽遗传资源品种名录(2021年版)》的通知.
  10. 名古屋コーチン.