洋泾浜英语

洋泾浜英语
Chinese Pidgin English
讀法	/jɑŋ³⁵ t͡ɕiŋ⁵⁵ pɑŋ⁵⁵/
使用戶蕩	中国
言話滅亡	中国境内灭亡
語系	皮钦语
言話代碼
ISO 639-3	cpi
語言瞭望站	52-ABB-da

洋泾浜英语（英语：Chinese Pidgin English），一种皮钦语。因Pidgin个发音同Pigeon（白鸽）一样，所以英文弗识个人有叫伊白鸽英语（Pigeon English）个。由于中文谐音，有叫伊洋泾帮个。洋泾浜英语是19世纪中外商人用个皮钦语，只有口头形式，呒没统一个书面形式，变体交交关关。伊是英语同上海闲话个结合产物，一定程度上受到宁波言话搭粤语个影响。伊语法弗符合英语习惯，语音受汉语影响，流行于伊个辰光个上海洋泾浜周边地区，故咾叫箇個名字。伊只是“中式英语”个一部分，但是经常用来指代中式英语。

名称来源

洋泾浜是上海一条小河浜，好通到黄浦江，从今延安东路外滩向西流到今朝个西藏南路伊面。19世纪，英国、法国陆续勒拉上海开租界，洋泾浜正是英法租界个界浜。开租界以后，同外国人个贸易需求弗断增加，必过中外商人言话弗通，“洋泾浜英语”便出现哉。

演变

洋泾浜是上海一条小河浜，好通到黄浦江，长约2公里，宽弗足20米，是上海英、法租界个界浜，所以叫箇只名字。勒拉同外国人交流个辰光，逐步形成箇种以上海闲话结构为主，英文单词夹花个洋泾浜英语。

后些来，其他地方个商人为咾有直接同外商交流个机会，纷纷学习英语。宁波商人涌进上海，乘枪势里出版商出版《英话注解》，用汉字畀英语注音。因为箇本书六位作者侪是宁波人，故咾用个发音自然是宁波言话。箇记洋泾浜英语逐渐变为英语、上海闲话、宁波言话个混合形式，各种出版物越来越多，成为伊个辰光广泛使用个中英商业语言。

中华人民共和国成立以后，洋泾浜英语个使用环境消失，大家也就弗用弗学哉。改革开放后，上海个对外贸易重新得到重视，老百姓英语水平弗断提高，“洋泾浜英语”逐渐成为形容英语弗标准个贬义词。

学习

洋泾浜英语个著名教材当属下段手册。箇本手册用吴语宁波言话写个，汉字只是用来标音个，短短几句言话有弗少英语个常用词。箇本手册版本弗少，下头是一种比较全个版本（括号里向，斜杠前是宁波言话发音个吴语拼音，斜杠后是英语原词）：

• 来是康姆（khaonm / come）去是谷（koh / go），二十四是吞的福（thentihfoh / twenty-four）。
• 是叫也司（yasy / yes）勿叫诺（noh / no），如此如此沙咸沙（soghaeso / so and so）。
• 真讚佛立谷（vahlihkoh / very good），靴叫蒲脱（buthah / boot）鞋叫靴（shiu / shoe）。
• 洋行買辦江摆渡（kaonpadu / comprador），小輪叫司汀巴（sythinpo / steamer）。
• 茶叫梯（thi / tea）翘梯请吃茶，雪堂（shihdaon / sit down）雪堂请侬坐。
• 烘山芋叫扑铁秃（phohthihthah / potato），东洋车子力克靴（lihkhahshiu / rickshaw）。
• 打屁股叫班蒲曲（paebutshoh / bamboo chop），混账王八蛋风炉（daefonlu / daffy low）。
• 那摩温（namouuen / number one）先生是阿大，跑街先生杀老夫（saehlaufu / shroff）。
• 麦克（mahkhah / mark）麦克钞票多，毕的生司（pihtihsansy / fifty cents）当票多。
• 红头阿三开泼度（khephahdu / keep door），自家兄弟勃拉茶（bahladzo / brother）。
• 爷要发茶（fahdzo / father）娘卖茶（madzo / mother），丈人阿伯发音落（fahinloh / father-in-law）。

参考

• 上海大学钱乃荣《上海语言发展史》