吴越地区
吴越地区，也叫江浙地区。在拉长江下游，主要在拉长江南许，有常时江南也是指迭个一块地域。历史浪几经变迁，但总归依靠吴语只家生交流，吴越地区乃歇也有处叫“讲吴语（吴越语[1]）个地区” 徽语包属问题，请看吴语。
地理概念
[编辑]弗同个时期，吴越个概念也是有着眼变化个。在拉老早个春秋搭秦汉伊歇，吴越个地理范围一般搭江东重合；另一方面，闽地伊歇辰光常庄也是划入吴越个范围里向。但不过，到吴越国朝后，以及宋朝辰光两浙路搭江南东路个行政区划定型，吴越个范围也逐眼定落来哉。
吴越地区一般性包括整只浙江省搭上海市，还有江苏省南部讲吴语个地区，主要是苏锡常地区。除脱常州之外，大部分侪在拉五代十国辰光是吴越国个国土管辖范围，好讲是吴越个核心地区。此外，江西省个上饶地区、福建省个西北部搭仔老早属江南东路个安徽省长江以南个地区在拉历史浪也曾经受着过仔吴越文化个影响，属于广义浪向个吴越。
南京尽管也属于江南东路，弗过作为当今顶大个淮语城市，已经弗属于吴越个范畴哉。长江以北个启东、海门等地也讲吴语。属于难以推定个范围。
历史浪
[编辑]吴越地区古代长期侪在拉一只文化区里向。经历仔先秦辰光个吴国、越国搭楚国、统一个秦汉、三国个东吴、两晋还有南朝、统一个隋唐、 五代辰光个吴越国、宋朝江南东路搭两浙路、元朝江浙行省等，江浙人还一淘创造仔辉煌个吴越文化，拿江南建设成东亚支那大陆浪向顶繁华个地区。
吴越地区在拉历史浪长期属于同一个政区管辖。秦时属于会稽郡（治吴县）搭鄣郡（汉时改为丹阳郡）。朝后因为人口增长，到东汉个辰光拿原来个会稽郡拆分为吴郡搭会稽郡，分别治吴（苏州）跟山阴（绍兴）。东吴个辰光又设立仔吴兴郡（治今湖州）。乃么吴郡、会稽郡搭吴兴郡合称“三吴”。贞观时里，天下分成功仔十道，吴越地区划归江南道。开元年间因为江南道辖区忒大，划分在拉江南东道，江南西道还有黔中道，吴越地区搭福建地区同属江南东道；朝后貤拆分成功浙江东道搭浙江西道。五代十国是吴越国统治两浙地区。宋灭脱仔吴越以后，在拉吴越国个土地浪设立两浙路，南宋个辰光分置成功两浙东路搭两浙西路。蒙元辰光，置立仔江浙行省。明朝时里，江浙行省个苏南皖南部分划畀拉南直隶，长[2]落来各府置立浙江省。
文化传统
[编辑]吴语是吴越地区个通用语言。吴越地区自古文化发达，历史浪文化灿烂，人才辈出，产生仔大量个名士大儒。江浙民风细腻，温润，灵秀，是历史浪有名个才子佳人产地，也从来一向是经济搭文化侪交关发达个地区。
吴越地区个民众多笃信佛教，自古就有“东南佛国”个美誉。个咾，吴越地区名山宝刹也交关多，比较有名个寺庙有杭州个灵隐寺、苏州个寒山寺搭仔西园寺、湖州个法华寺、常州个天宁寺咾啥。四大佛山当中个普陀山也在拉吴越地区个舟山。
上古个吴越地区，“断发文身、鱼食饭稻”，刚猛尚武。隋唐以来，吴越地区个民风由尚武转向仔崇文。吴越自古文人辈出，是古代状元搭进士产生顶多个地方，也是今朝出产两院院士顶多个场许。