南峰

南峰是来勒浙江省舟山群岛个岱山岛东只角个一个社区，属于舟山市岱山县高亭镇管。面积大约6平方公里，人口5000横里。社区管理委员会办公室来勒外八亩。岱山县新砌的个县行政中心，位置来勒社区东南个新填海乌赛。南峰社区包括南峰、黄官泥岙、板井潭3个村。1992年之前为南峰乡，包括里南峰、外南峰、黄官泥岙、小深水、板井潭5个村。1992年5月南峰乡撤消，外南峰村搭里南峰村介并拢成立南峰村，小深水村并拨黄官泥岙村。2005年6月，南峰地区3个村经过讨论，决定联合成立南峰社区，为舟山市渔农村新型社区之一。社区管理委员会办公室来勒外八亩，搭黄官泥岙村村民委员会介办公做对。

地理

社区位置来勒岱山岛东只角，西向是磨心山（岱山岛顶高），东向临岱山水道搭竹屿港介，南向搭张家山嘴头勒介打止搭东海村介交界，北向搭岱东镇介隔壁。总面积6平方公里横勒，其中耕地950亩，山林2250亩，盐滩1210亩。山林来勒社区西向个磨心山山脚，里头有野生獐搭雷竹介个基地，还有水库一只。盐滩来勒社区北向，属于双峰盐场。南部小深水湾新打出乌赛，岱山县新行政中心砌勒该里赛。东向岱山水道港深岸长，港口建设条件较关好。

社区主要道路是南峰路搭县道高宫线（高亭搭泥峙宫门）介。黄官泥岙村个小深水、外陈家、洪家门，板井潭村黄沙潭、陆家岙、板井潭，该眼相对独立个农村居民点统来勒高宫线大路边头。高宫线大路勒通公交车，朝南搭高亭，朝北好搭东沙、沙洋。

南峰路西向搭高宫线大路上头南峰车站介开始，朝东一直搭外南峰。沿路本来有搭外八亩、陆家山嘴、里南峰搭外南峰介4个居民点。解放后砌南峰小学、南峰卫生院格当公共机构，还有农民自家砌屋，4个居民点屋统砌拢。变成一个大型居民点，一般也统称为南峰，社区3/4个人口统庉勒该里。其中外南峰搭里南峰介除一份人家以外统是渔民，外八亩主要是农民搭盐民介，当中个陆家山嘴以农民为主渔民也有（农民户口来勒黄官泥岙村，渔民来勒南峰村，土地算黄官泥岙村）。按照地理位置来话，外八亩是整个社区个中心，所以南峰社区管理委员会刚即也来搭外八亩。不过按照人口分布来算，里南峰人口顶多其是人口分布个中心，所以社区管委会以外个其他商业搭公共服务机构介大部分统来搭多位于里南峰，包括南峰村村民委员会、农村信用合作社、南峰菜场、南峰社区卫生服务中心，还有保健站、超市格当介。里南峰有私人开个通村班车开勒高亭（岱山县城）。

居民点小深水个位置来勒岱山县新县政府竹屿新区规划区里向，因道路拓宽搭绿化建设介个因素，2006年辰光已经拆迁，人统邅了渔父乐园小区。栲岙老底子也属于南峰地区，居民也属于永兴庙界下弟子，行政上么属于东海村（该村拜高显庙菩萨），2006年辰光搭小深水介做队拆迁。

人口搭文化

南峰社区和总人口4946（2005年），其中南峰村超过3000个。在地人大多数是老底子搭宁波介邅来，语言文化基本搭宁波介做样，海洋特色又多眼。居民主要信中国传统宗教搭佛教介。传统宗教方面，南峰村搭黄官泥岙村介居民拜永兴庙（位置来勒洪家门），板井潭村（除出邬家岙）拜湖中庙菩萨，邬家岙老百姓拜海曙庙。外南峰沙滩还有天后宫，拜天后娘娘。同时基督教教徒也有眼，勿多。

因为人口出生率长年低，后生又统搭外头读书上班，社区在地人已经连续多年负增长，县政府邅了小深水有可能使社区人口走出慢眼，年轻人好甭搭高亭买屋去。另一方面，搭安徽省、河南省格当介来个后生光荡呛社区勒庉的也交关多，大多数是来撑抲鱼船个。刚即基本上每只抲鱼船统有外地人撑的。

因为人口长年流出，1992年南峰乡政府撤消后，老南峰乡卫生院、南峰小学和南峰中学也跟勒倒闭。刚即有南峰社区卫生服务中心，还有保健站4爿，村民一般毛病统好看好。学生读书方面，小学要搭高亭小学去读，中学搭高亭中学去。

经济

南峰社区产业结构比较多元化，渔（抲鱼）、农（种地）、工、盐（晒盐）四业并举。

捕捞是南峰社区顶大个传统产业，抲鱼船有搭100多只。南峰经济合作社是岱山县四大渔业经济合作社之一，另外3个是东海、山外搭大岙介。社区里向个南峰渔港是国家三级渔港。

主要企业包括岱山县染料化工厂、岱山县南方实业有限公司(岱山县中舟南峰高速船制造有限公司)、上海石油天然气有限公司石油储运分公司（东海平湖油气田岱山原油中转站）搭南峰水厂格当。岱山县南方实业有限公司是在地企业，老是1977年南峰渔业大队办个南峰船厂。别样高还有玩具厂（生产电动圣诞老人格当），鞋爿厂（生产拖鞋日本出口）、渔产品加工厂格当介个私企业30多爿。

双峰盐场是浙江省重点保留盐场之一，社区里头盐业人口也交关多。

农业人口主要来勒黄官泥岙村搭板井潭村介，主要种稻、番薯、蔬菜、杨梅格当。