Wikipedia:吴语书写体系

来自维基百科
蹦到: 导航搜寻

吴语书写体系指个就是吴语书面闲话个形式。此地就是要解决哪亨来写吴语个问题。

历史上吴语个书写体系[编辑]

吴语作为一种方言,特别是长期以来作为一种汉语个口语形式,历史上,来中国个方言里向,是交关有影响力搭实力个。而吴语书面作品,古代也是各方言里向相对来讲蛮多个,该搭吴语地区个文化发展水平也是符合个。胡适民国辰光还讲过,方言文学里向顶顶有希望个便是吴语文学

古代,多数个文章侪是用文言文写起来个,多数个近代汉语口语侪无书面形式。北方白话因为一直扮演官话个角色,老早个辰光(唐朝)就开始有白话作品哉。

现代意义浪个吴语头一趟来纸头上写落来,该歇已经几乎考证弗出哉。必过,明朝个冯梦龙收集一本吴语个山歌集,叫《山歌》,记录个便大部分是当时吴中老百姓口头个山歌。基本浪俚就拿俚笃直接记落来,朆通过转译,单单文言注解,好算是蛮早个一部吴语书面化个作品。个里向无数词汇,一径到今朝还来浪用。

要注意个是,从《山歌》一径到民国辰光个吴语小说,吴语个书面作品多数是拿苏州话写个,个搭苏州长期以来来吴语地区个文化地位也是蛮搭个。苏州话也是一径以来吴语个代表方言。

明清两朝,用吴语直接写纸头浪个机会基本浪呒个。清朝末年上海个怪才张南庄一本小说写起叫《何典》,行文里向夹杂交关吴语词汇,形成一种蛮奇特个风格。该本书里向张拿吴语词汇用得交关熟练交关灵,叫人拍案称奇。

到仔民国,社会风气活泛来,再一个白话文运动个推动,吴语书面作品个创作咦进到一个前所未有个高潮。有一大批吴语小说面世,形式浪多数采用官话叙述吴语对话个形式。该个辰光个吴语小说,也多数是用苏州闲话创作个,作者有上海常州人了啥。该个辰光个吴语小说个书面形式、用字用词已经交关接近当代吴语,有星常用字个写法也开始形成一定个共识,甚至造着一批吴方言字,像“朆”、“覅”、“啘”了啥,搭仔后来作家自觉新造个“倷”了啥,后首来多数侪拨拉收录到电脑用汉字字符集里向,侪好用输入法打出来。

还有一个值得注意个方面是外国传教士个吴语文献。外国传教士为仔传教,翻译着交关方言版本个圣经,像各地吴语个罗马字版本个圣经搭汉字版本圣经。

再有末,就是当代吴语研究者编个各种吴方言词典。像《吴方言词典》、《苏州方言词典》了啥。

维基百科浪个吴语书写体系[编辑]

吴语来历史浪有过自家个书写体系,为仔讲吴语个书面语勿是从零开始个,而是有一定个基础个。该个基础就是倪来此地写吴语个基础。假使勿尊重传统个说话,交关可能造成混乱个局面。有仔传统,乃末就有章好依哉,交关多个常用字侪有常用个写法,作兴该个写法勿是唯一个,必过来一定个历史时期,多数作品里向个字个写法侪有交关个一致性,个也好算是作家道里个君子协定或者默契。个也就方便倪后来个人,实际浪为倪提供着一只规范,好去整理来现代实用。

基础方言[编辑]

世界闲话个发展历史浪,文献个作用交关重要。像意大利但丁写《神曲》,个当地方言就变成意大利语个标准闲话。马丁路德拉丁文个《圣经》翻成功德文,个就是现代标准德文个来头。

北部吴语个语法搭仔词汇个共同性是蛮大个,所以即便侪是写自家个本地方言(当然要除去一点特别“土”个成分)别人也是看得懂个。勿过,考虑到对历史浪向个吴语文学个继承性,建议大家个书写,侪往苏州言话搭仔中派以前个上海言话靠拢一点。另外,不推荐用杭州言话写,为仔渠写出来个文字连大多数助词、代词系统也侪是官话系统个,搭仔普通话差勿多。

正字法[编辑]

正字法末,就是要解决如何写个问题。一径有人讲,吴语是方言,是“土话”,写勿出来个;实际浪勿是写勿出来,是该歇无拨只规范。吴语文献就是吴语完全好写出来个证据。

吴语个正字法也要以历史文献为典范,避免混乱,个再有权威性搭仔继承性。该个是吴语来各个方言里向个优势。假使大家侪来搞发明个说话,一个搭吴语个文学传统割裂,再一个也作兴会造成混乱个局面。为仔讲成例比最新考证要好,更加比自家个发明要好。

个上头还提着,吴语个文献上至明,下至民国,以陆里只为准呐?此地推荐搭当代吴语更加接近个近代文献为准,也就是以《海上花列传》为代表个一批民国以来个文献。书面语可以适当脱离口语,但勿好脱离忒远,勿然就变文言文哉。

当然,近代文献里向个字有星是还好商榷个。鲁迅辰光个白话文到今朝看也有交关变化个场花。像第二人称,《海上花列传》了啥写“耐”,而后首来有人造着专门个方言字“倷”,后者字形浪也更加合适,还已经进仔计算机字库,个末就好用“倷”哉。

具体个常用词特别是虚词个写法,请倷参考吴语文学条目里向个文献(交关网浪侪有电子版)搭吴语维基百科个用词指南

推荐大家使用可以考证个本字,而尽量勿要用普通话同音替代个字来写吴语。 下头提供一眼例子,左起是 普通话汉字 吴语汉字 吴语(上海音)国际音标

东西 物事 [məʔ][zɿ]

都 全 [zɛ]

吴语维基百科使用个言话[编辑]

以北部吴语为基础,以明代《山歌》以来个吴语白话文为典范,以方言学研究成果为参考,个就是维基百科用个吴语书面语。

该搭个“典范”指个是勒拉基本个虚词代词等等浪以上头提着个为典范,而勒拉更加广泛个词汇层面浪,好吸收广大吴语区个因素搭仔世界浪个别个言话个因素。

关于哪恁记录吴语[编辑]

记录吴语个方法呢邪气便当,就是拿平常日脚个白话写下来。Wikipedia个吴语版本呢是用汉字作为书写系统个,倷可以用本字、有历史文献支持个俗字或者呢,吴语发音相通个通假字来书写,但是,绝对弗可以用普通话音来通假噢。

举几只例子来讲:

  • 正确:必过现在会得讲上海闲话个小人越来越少勒。
  • 正确:不过现在会得讲上海言话个小人越来越少勒。
  • 现代标准汉语:不过现在会说上海话的小孩越来越少了。
现代标准汉语 本字 俗字 吴音通假
不过 不过 必过
会得
话(名词) 言話 閒話
小孩 小人

参考[编辑]