大自鸣钟

大自鸣钟，一开始指个是1926年造好个川村纪念碑，后些来变成地区名，指个是上海市普陀区东南部长寿路西康路附近地区，大样模子西面到常德路，东面到陕西北路，南面是安远路，北面到普陀路。

历史

清代，大自鸣钟附近算松江府上海县法华乡，东面东芦浦，北面草长浦。东芦浦两岸有蔡家宅、沈家宅等村落，草长浦两岸则有草鞋浜村。箇面多数是农地，老百姓么坌田。1899年，上海公共租界拿伊喫进去。1900年，公共租界工部局勒拉箇头造小沙渡路（现在个长寿路）搭仔劳勃生路（现在个西康路）。

1911年，日资内外棉株式会社总经理川村利兵卫勒拉上海、南通等地开棉纺厂，勒拉苏州河南岸开办13家棉纺厂，还造仔简易个员工宿舍。工厂开办吸引人口，到1920年代，箇面已经成为公共租界西区一直较集中个商业中心。

1922年，川村利兵卫死脱。1924年，内外棉株式会社向公共租界工部局提交申请，为咾纪念川村利兵卫，勒拉小沙渡路、劳勃生路路口中央造了只川村纪念碑。川村纪念碑高九丈九尺，方形个，里向有6层楼，有只盘旋个楼梯好上下，顶楼摆只有四面钟面个钟，每一刻钟会得自动报时。

1930年代开始，箇面个商业逐步发展，周边造起二层楼左右个石库门里弄，箇面变成沪西主要个居住区搭仔商业区。1945年后，日商企业畀中国政府没收，由中国纺织建设公司接管。1950年代初，上海市政府维护箇面周边个下水管道搭危房简屋，设置上海市第四百货商店。1958年8月10号，为脱消除脱日本人个印子，乘枪势里改善道路交通，拿大自鸣钟拆脱。

大自鸣钟一带，还有勒拉苏州河西康路桥个宜康电子市场，又叫“大自鸣钟市场”，曾经是沪上有名个盗版碟、打口碟集散地。2009年1月份，大自鸣钟市场关门改造，现在变成功上海189弄购物中心。