唐納德·川普

来自维基百科
蹦到: 导航搜寻
唐納德·川普

唐納德·川普(英文:Donald John Trump)是美國一位偶像級地產商人企業家政治人物,乃朝擔任川普集團个總裁。伊生勒紐約一个地產商家庭,經商頭子精明活絡,勒廿世紀中後期,擔自家个公司打造成功一隻商業帝國。不過,比起其餘企業家,川普弗算頂頂成功个,伊曾經有過多趟破產个經歷。讓伊出名个,是伊誇張个舉動搭自賣自誇个本事。

生平[编辑]

川普个人生經歷跌宕起伏,伊是一个歡喜別人關注搭白相花頭个男人,從1980年代開始,就一直是美國娛樂新聞个話題人物。之後伊經歷過交關事業,生活高頭个跌宕起伏,不過一直朆離開過公眾關注,交關年數下來,川普積累到老多人氣搭粉絲,也成爲伊到2015年開始參選總統个基礎。

家庭背景[编辑]

川普个祖上是從德國過來个,相信基督敎長老會,乃朝還是紐約一个敎堂个經常會員。伊拉孃來自蘇格蘭,蓋咾伊也有得一半蘇格蘭血統。前兩年,川普到蘇格蘭老家進行投資,還專門去自家娘勒蘇格蘭高地个故居看了兩眼,過程弗超過90秒鐘。按照英國媒體个挖掘,川普希拉里勒祖上還有親眷關係。

參選總統[编辑]

勒拉2015年6月份,川普宣佈參與2016美國總統大選共和黨候選人提名个角逐,勒當天个招待會高頭,宣揚自家个川普長城論調,並講墨西哥對美國出口強姦犯搭竊賊。之後雖然交關媒體口誅筆伐,不過伊个票數一路領先。2015年7月,伊參加美國共和黨第一趟候選人辯論,當場鼓吹自家反對政治正確,又公開攻擊FOX个主持人梅根凱利。製造話題,支持率更加鬧猛。2015年11月巴黎恐怖襲擊之後,川普表示要禁止穆斯林入境,得到交關基層个支持。2016年年初,英國國會特爲開會,討論禁止川普入境。 2016年2月,川普已經在三个州拿著共和黨候選人个提名,聲望邪氣高。2016年3月1號,川普在共和黨結棍禮拜兩个選舉當中拿著一半以上个勝利,引發美國共和黨對自家未來个擔憂。2016年5月初,川普基本拿共和黨候選人提名鎖定。2015年5月12號,川普搭美國共和黨乃朝个實際頭面人物瑞安碰頭,討論如然拿自家个觀點同共和黨協調个問題。

2015年6月,川普拿到重組个選票,獲得个總票數超過1700張,同時,老早反對伊个交關美國共和黨大佬也開始支持伊,到7月,伊宣佈印第安納州州長麥克·彭斯是自家个美國副總統候選人,成爲自家个競選搭檔。到7月18號開始个2016年美國共和黨全會高頭,正式讓自家成爲黨派个候選人。之後,川普要面臨美國民主黨候選人希癩痢个挑戰。

个人資產[编辑]

川普話,自家个資產有一百多億美元。不過根據福布斯雜誌个估計,2015年伊个資產是45億美元。箇當中,包括交關自家个大廈,產業,高爾夫球場以及酒莊。伊還有自家个私人飛機,派頭老足。此外,川普還註冊超過三百多个商標,大部分儕是以自家个名號作爲名稱个。比方講:川普牛排川普強手棋川普礦泉水川普棒冰之類。伊還授權一家私人機構開設網絡課程,名頭叫做川普大學堂,販賣自家个成功學經驗。

著作[编辑]

川普從1980年代出名之後,就開始寫書推廣自家个形象,箇當中,伊个第一本書《如然談生意》是美國20世紀挨末階段頂頂成功个商業成功學書籍。銷量幾百萬,讓伊自家也洋洋得意。之後伊沒事體就出書,不過銷量儕嘸第一本好。到參選總統之後,伊个新書《斷腿米國》又開始暢銷,川普勒曼哈頓个川普大廈搞簽售會,排隊个人交交關關,場面類似好萊塢電影明星。

家人[编辑]

川普有過三趟婚姻,有三个兒子搭兩个囡兒。其中,有一个囡兒賣相蠻好——伊萬卡·川普,上過交關雜誌个封面。川普對伊个囡兒是相當驕傲个,還曾話歇,假使伊萬卡弗是伊个親囡兒,自家就會搭伊出去約會。川普乃朝个娘子是斯洛文尼亞人,老早做過一點風俗雜誌个封面模特。

觀點[编辑]

  • 川普曾經話歇,要勒拉美國墨西哥邊境修一堵牆,墨西哥人衹有通過伊个允許,再好進來。
  • 川普認爲,有必要製作特殊个身份證,用來辨別穆斯林搭其餘人。
  • 川普認爲,假使美國畀回敎背景个組織恐怖襲擊,應該禁止穆斯林入境。
  • 川普攻擊共和黨个總統參選人傑·布什低能量人。
  • 川普認爲,希拉里擔私人郵箱處理公務,應該捉到牢監里向關起來。外加話衹要自家上臺,隔手要啓動對伊个調查。
  • 川普講,即便自家勒拉第五大道上頭槍擊,自家个支持者也會繼續支持自家。
  • 川普因爲弗歡喜福克斯電台个主持人,拒絕參加共和黨人大選辯論會,不過繼續佔據民調个制高點。
  • 川普勒集會上向講要用豬油子彈來攻擊穆斯林,還話,迭能,伊拉便識相哉。
  • 川普話自家支持率高來邪,有交關人歡喜伊,尤其是朆讀過啥書个。
  • 川普威脅美國共和黨高層,講假使自家畀黨內最高會議做脫,就獨立參選,更號召支持者暴動。
  • 川普認爲要對中國个進口商品徵收45%个關稅,並威脅要對墨西哥採用外匯管制,弗讓伊拉自由匯款。
  • 川普講要構建美國優先个外交策略,讓日本韓國負擔美國駐軍軍費,或者可以讓伊拉自家發展核武器,弗要美國來幫助伊拉。
  • 川普自稱搭普京關係邪氣好,講普京誇自家叫做天才
  • 川普講,美國共和黨支持弗支持伊儕無所謂,伊自家好獲得交關獨立人士个票數,可以拿共和黨本身个票數大大超過。
  • 川普認爲全球變暖是中國搭墨西哥爲針對美國經濟製造个大迷魂陣,本身並弗存在。
  • 川普認爲北約組織當中交關國家對美國朆幫助,伊認爲假使伊拉今後嘸承擔責任,美國就無理由去保護伊拉。

政治傾向[编辑]

川普一般畀認爲嘸明顯个左右區分,伊个思維是民粹主義威權主義法西斯主義之類个結合體,歡喜用自家勒公司當中个總裁作風沿用到政治高頭。伊對自家个身份有優越感,對傳統个美國共和黨議題弗大感冒,重點批評乃朝美國太軟弱,弗夠強硬高頭。川普勒自家个記者問答會浪拿自家弗歡喜个拉美記者請出去;勒自家動員會浪鼓勵自家个支持者攻擊來搗亂个人,儕反映出伊對強權个迷戀。2015年年末,川普勒Twitter高頭引用意大利最高領袖墨索里尼个一句諺語,引發交關人批評,不過伊並弗在意,還爲自家辯護講迭个言語實在邪氣妙。

2016年6月,川普公佈自家對美國外交方面策略个看法,勒演講當中,伊反對美國勒冷戰之後就一直實行个新保守主義外交,認爲迭个外交釀成之後个交關毛病,並讓中東混亂。伊拿矛頭對準布什家族克林頓家族,承諾假使自家當選,會搭中國俄羅斯等威權國家關係改善,同時重新定義北約歐盟搭美國个關係。伊對美國个東亞盟友日本韓國也有意見,認爲伊拉應該更多自家保護自家。還話,今後美國弗要去多關心世界高頭个閒事,因爲美國自家內部還有老多問題朆解決。

攻擊別人家[编辑]

川普邪氣歡喜對別个競選人搞人身攻擊,伊勒參加競選之後,就擔自家認爲个主要對手——傑·布什稱呼爲低能人(Low-energy),之後又多趟質疑傑·布什遭到伊後台个操縱,是隻木偶。對另外一个開始辰光蠻紅个競選人本·卡森,川普稱呼伊「信仰有毛病」。對共和黨建制派个評論浪,川普貤加敢講,擔麥凱恩叫做投降派,並嘲笑伊勒越南戰爭當中畀捉牢當俘虜个事體。勒8月个辯論當中,伊稱呼共和黨个女候選人覅里娜(Carly Fiorina)面孔難看,弗好當總統。到10月之後,伊擔攻擊目標慢慢轉移到自家个競爭對手推德·庫慈顱比鰲頭浪來,對推德·庫慈,先開始質疑伊个出身問題(推德·庫慈勒加拿大出生),又畀伊一个綽號「騙子」。對顱比鰲,稱呼伊無足輕重,不足掛齒。這也引發對方對伊个反攻擊,讓共和黨辯論變成對罵个場化哉。

美國民主黨个候選人希拉里勃热·商特斯,川普个攻擊更加鬧猛,伊認爲希拉里嘸資格參選總統,並且有邪氣多个黑幕。同時,也攻擊伊个身體毛病,講伊「嘸辦法領導阿拉國家」。對商特斯个攻擊主要是伊个社會主義者頭銜。川普認爲伊實際浪就是一个共產主義者,要拿美國毀脫。並認爲迭个人嘸能力通過民主黨初選。2015年5月鎖定提名之後,川普个攻擊重點已經集中到希拉里身浪來。2016年5月6號,川普勒公共集會浪,稱呼希拉里是美國女性頂頂大个包袱,還講希拉里个老公比爾是有史以來頂壞个女性傷害者

自我陶醉[编辑]

川普對自家人生浪个成就邪氣自信,認爲自家是美國夢个代表,伊聲稱自家个著作《交易藝術》是世界浪第二偉大个書本,排頂頂偉大个書本《聖經》之後。對自家个商業經歷,伊認爲是徹頭徹尾个輝煌。有媒體講伊是富二代,有爺娘幫忙才有後勢來个大公司,伊反駁講自家雖然借小小个一百萬美元當做資本金,但自家創造出來个財富老早超過迭个一千多倍,是完全成功个佐證。對自家三趟瀕臨破產个經歷搭勒大西洋城个失敗投資,川普認爲自家儕化險爲夷,反過來更加好證明自家腦子思路清爽,具有轉危爲安个特性。勒對外策略浪,雖然川普基本嘸啥具體策略,但一直講自家絕對實事求是,弗白相花頭,要搭世界各國个領導人做頂頂來事个交易,會比奧巴馬做个好交關。面對美國共和黨內部反對伊个觀點,伊講自家獲得提名之後會拿所有人團結勒一淘,「所有人儕歡喜我」。

評價[编辑]

對川普个評價因爲來源方弗同,一般有得蠻大个差別。話起來,主流个人物一般對伊無啥好評,一眼激進分子或者爭議人物,對川普表達贊譽。

正面評價[编辑]

  • 俄羅斯總統普亭對川普評價邪氣高,認爲迭个人聰明,腦子好用,是一个明智人物。
  • 美國種族主義分子戴維努克歡喜川普,認爲伊代表白人个希望。
  • 法國極右翼分子老勒龐支持川普,認爲伊表達出白人个真實想法,是弗亂話个好人。
  • 美國伊斯蘭國家黑人組織公開贊賞川普,認爲伊个論點包含自家支持个反猶主義,是好信賴个人物。
  • 美國全國步槍協會公開支持川普,認爲伊是好保護自家持槍權个總統參選人。
  • 美國全國公路摩托協會公開支持川普,認爲伊好讓美國重新恢復強大,秀出自家个肌肉。

負面評價[编辑]

  • 美國著名學者叟威爾對川普个邊界政策个評價:「不過,美墨邊界弗設防,並弗代表進來个全是墨西哥人。川普迭个人明顯弗靈清」。伊還認爲,假使川普當選,美國青年應該移民到澳大利亞新西蘭,逃避川普可能搞出來个亂象。
  • 美國著名保守主義團體國家回顧對川普自稱个保守主義進行駁斥,認爲伊不過是披上一層保守主義外衣,實質上向搭交關勒拉丁美洲搞獨裁个寡頭分子性質無何兩樣。
  • 2012年共和黨總統參選人喬治·羅姆尼勒2016年3月表示,川普一直勒製造騙局,弄鬆共和黨个選民。
  • 美國企業家巴菲特講川普誇張美國个經濟毛病,勸自家个投資者弗要相信伊。
  • 美國總統奧巴馬認爲川普个言論勒讓美國共和黨自家混亂,並感謝伊保送民主黨候選人進入白宮。