冷战

出自维基百科,自由个百科全书

冷战(英文:Cold War,俄文:Холодная война)是第二次世界大战完结之后,立在美国苏联两个超级大国个对立当中,所造成个长期对立事体。迭个战争弗通过公开开战进行,是通过暗地当中个对峙,扶持自家势力,进行此消彼长个争夺势力范围,来达到称霸并消灭对方个目的。冷战一般畀认为从1948年柏林危机开始,一直持续到1980年代挨末辰光个东欧剧变苏联解体

缘由[编辑]

立在第二次世界大战之前,因为自家鼓吹个主张搭西方世界资本主义严重对立,苏联就一直搭欧美国家关系邪气紧张。史大林大清洗集体农庄,让苏联形象恶劣。同时,苏联也搭纳粹德国关系暧昧,签署蛮多条约。1941年之后个苏德战争拿苏联搭英国、美国结盟,弗过,伊拉个关系当中,除脱共同要灭脱纳粹德国之外,还存在明显个竞争关系。到1944年,双方侪开始对纳粹德国进行反攻。苏联趁迭个机会,从自家个领土开始,一步步吞并东欧地区,并扶持当地个共产党建立自家掌控个政权。到1945年,苏联已经立在到维也纳个距离高头,扶持交关自家势力。迭个做法,也引发西方国家个恐惧。二战完结之后,苏联拒绝搭美国等国家立在战后重建或者德国地位问题高头进行合作,同时,立在东亚地区也扩张自家个势力。1947年,引发柏林危机,苏联为报复联邦德国个成立,对迭个辰光立在自家势力范围包围下头个西柏林进行封锁,之后,美国搭苏联个矛盾,就显山露水哉。迭个事体,也成为之后北大西洋公约组织成立个缘由。1947年,英国首相丘吉尔立在美国个演讲当中提到一条横贯欧亚大陆个铁幕,迭个讲法,也畀当成冷战开始个基准点之一。