二葉亭四迷

吴语维基百科,自由个百科全书
跳到导航 跳到搜索
二葉亭四迷

二葉亭 四迷ふたばてい しめい1864年4月4日元治元年2月28日) - 1909年明治42年)5月10日)是日本小說家翻譯家。本名長谷川 辰之助はせがわ たつのすけ)。筆名來自對自家處女作『浮雲』个弗滿咾而自罵「爾儂死死脫算數!くたばって仕舞(め)え)」个日文協音。有儂話是渠場爺罵渠个言話,昰个是俗說(好望『我半生个懺悔』)。也有儂謳渠長谷川 二葉亭はせがわ ふたばてい)。別號冷冷亭主人、杏雨。生在江戶市谷。據渠自家寫个經歷來望,在1883年2月1日1885年12月25日段辰光裏向,渠來在中專(在日本,本生叫專修學堂,瑲朞䜒專修大學)讀書、畢業。進入東京外國語學堂羅刹語科(瑲朞个東京外國語大學)學習以後,1886年1月,從同科改組成功个東京商業學堂(瑲朞个一橋大學)第三部羅刹語科退學[1]

替坪內逍遙結好,在渠鼓勵下頭寫著評論『小說總論』並發表。1887到1891年,以言文一致體寫成爻寫實主義小說『浮雲』,成爲日本近代小說个鼻祖。外加渠還翻譯著行情羅刹文學作品,邪氣出名个有土健日夫个「幽會」「邂逅」;對後首來个自然主義作家產生爻深刻影響。

其後貤作著『其面影』替『平凡』;弗過在1909年從羅刹歸去日本路丄客死盆後灣

經歷[编辑]

二葉亭四迷生在江戶市谷合羽坂尾張藩上屋敷(存疑)。其爺長谷川吉数是尾張藩个,當時做鷹獵隨從个生活。孃叫志津。老爹名辰藏,取「辰」字咾謳渠「辰之助」。

4歲辰光搬到孃後藤一家个故鄉名古屋去,跟牢野村秋足學漢學、並進入名古屋藩学堂讀書,貤替林正十郎學著眼法文。

1872年(明治5年),從藩学堂退學、回轉江戶;弗過後頭因爲爺調職,貤搬到松江去,替内村友輔學漢學。

洋學堂(瑲朞个愛知縣立旭丘高等學堂)畢業著以後,受當時辰光日本替羅刹締結千島樺太交換條約影響,深感日本个危機,便應考陸軍士官學堂。弗過未及格,蓋咾衹好放棄從軍,決定當外交官去。

爲著朝牢目標努力,渠1881年(明治14年)進入東京外國語學堂(瑲朞个東京外國語大學)羅刹語科。許歇教羅刹語个是戾夫·梅企尼巧夫黑野義文古川常一郎,渠也慢慢然歡喜、沈醉在羅刹文學裏向起來。[2]後首來,東京外國語學堂替東京商業學堂合併,渠所來在个東京外國語學堂羅刹語科變成爻東京商業學堂(瑲朞个一橋大學)个第三部羅刹語科。但弗過,四迷就此對東京商業學堂个校長矢野二郎交關有意見[1],後頭在1886年1月份便申請退學哉[1]

大田黑重五郎(水電實業家,原東芝專職董事)是四迷在東京外國語學堂替東京商業學堂邪氣要好个朋友,後首寫个小說『浮雲』便是擔渠當原型个[3]

據渠自家寫个經歷來望,在1883年2月1日1885年12月25日昰朞裏,渠在中專(在日本,本生叫專修學堂,瑲朞謳專修大學)讀書。畢業著無幾許辰光,便到坪內逍遙府丄學習。

1886年(明治19年)年2月份,渠登門拜訪坪內逍遙,後首便每隻禮拜全去[4]。在坪內个鼓勵下向,在「中央學術雜誌」丄向發表爻『小說總論』(以冷冷亭主人个名義);渠還翻譯著土健日夫爺搭囡』个一部分,弗過未譯光,也就無聲音哉。

第二年1887年(明治20年),借著坪內雄蔵(逍遙个本名)个名義刊行爻『新編浮雲』第一篇。在序裏向个署名是「二葉亭四迷」。居部處女作『浮雲』(第一篇~第三篇)因得有人發覺有得阿末篇朝後个草稿咾畀認爲是未完作,卻情,隻寫實主義个描寫替言文一致个文體無疑替當時文壇帶來爻新風,替伊歇辰光个文學者打開爻新思路。

同年渠在內閣官報局當上著官,蓋咾筆停脫著一瑲。貤畀社會主義影響,忖著弗少救濟貧民个方案。渠常時在貧民街進進出出,巧倒也巧,在茲花煙間裏尋著爻渠个元配福井つね。渠對貧民救濟蠻關心咾,後首來替報道貧民問題搭勞動問題个記者松原巖五郎横山源之助軋成朋友,也影響爻渠場个觀念。

1895年(明治28年)到陸軍大學堂羅刹語科赴任教示、1899年(明治32年)重設東京外國語學堂(瑲朞个東京外國語大學),在老早子恩師古川常一郎个推薦下頭做爻羅刹語科教授。儘管在位子丄辰光弗長,歡喜、仰慕渠个學生子倒是海海會。後首還當著過海軍編修書記[5]1901年(明治34年)貤受託任海軍大學堂羅刹語教授。

1902年(明治35年)在羅刹學著世界語,1906年(明治39年)在日本出版爻相關入門書籍。

通過內藤湖南个介紹,1904年(明治37年)3月份進入大坂朝日新聞社,專門負責到東京出差。弗過隻生活像煞弗大對渠胃口,東京朝日新聞社主筆池邊三山就擔渠挖到爻東京朝日去,開始替渠連載小說,外加畀渠一個月一百圓个高薪。渠發表爻『其面影』替『平凡』;期間夏目漱石个『虞美人草』也在連載,而昰兩部作品仍舊邪氣喫香。

1908年(明治41年),渠以朝日新聞特派員身份赴羅刹做生活。期間,跑到生必堆魯薄去哉,渠在東京外國語學堂个羅刹語老師黑野義文便在伊面。[6]渠還擔森鷗外个『舞姬』、國木田獨步『牛肉替洋山芋』翻譯成爻羅刹文;弗過畀羅刹个白夜弄來失眠,外加翌年挨力生突勞維基大公辦喪事伊日在大雪裏立著交關辰光咾發寒熱哉,貤過著肺炎咾肺結核,料著自家要死,便寫著封遺書畀娘子替好婆(聽講是先託人交畀坪內逍遙),後頭聽著朋友勸要歸去。4月10日趁上日本郵船加茂丸,從倫盾出發返日。路丄肺炎加二惡化,5月10日盆後灣故哉。5月13日夜裏在新解坡火葬,30號屍骨送到著新橋。在新解坡个日本人墓地也有得渠儂个墓[7]

年譜[编辑]

※到1872年爲止是舊曆

  • 1864年 - 2月28日,養在江戶市谷(存疑)。
  • 1868年 - 11月,替孃、好婆一淘搬到名古屋去。
  • 1871年 - 8月,進入名古屋藩學堂。
  • 1872年 - 5月,從藩學堂退學。10月,轉去東京,住在麴町區飯田町
  • 1875年 - 5月,爺調職咾,搬到松江
  • 1878年 - 3月,貤搬回東京。5月進入森川塾,10月退學。
  • 1880年 - 2月到4月貤到森川塾讀書。昰三年考著三趟陸軍士官學堂,弗曾及格。
  • 1881年 - 5月,到東京外國語學堂(瑲朞个東京外國語大學)讀書。
  • 1883年 - 2月1日,讀中專(在日本,本底子叫專修學堂,瑲朞叫專修大學)。
  • 1885年 - 12月,中專課程上光;12月25日,中專畢業。
  • 1886年 - 1月、從東京商業學堂(瑲朞个一橋大學)羅刹語科退學。拜訪坪內逍遙。4月發表「小說總論」。
  • 1887年 - 6月,『浮雲』第一篇刊行。
  • 1888年 - 譯就土健日夫个「邂逅」「幽會」。
  • 1889年 - 8月到内閣官報局做生活。翻譯英文、羅刹文報紙。
  • 1893年 - 1月,搭福井つね結婚。
  • 1894年 - 12月,養落來大囡せつ
  • 1896年 - 2月,替つね離婚。出版『單戀』。
  • 1897年 - 12月,從内閣官報局辞職。
  • 1898年 - 11月,當上海軍編修書記。
  • 1899年 - 7月,辭脫海軍編修書記。9月,當上東京外國語學堂教授。
  • 1902年 - 5月,辭脫東京外國語學堂教授。跑到支那大陸蟹魯貧去當德永商會个顧問。
  • 1902年 - 9月,離開蟹魯貧,託老早个川島浪速,當上北京京師警務學堂事務長。
  • 1903年 - 7月,辭職回國。
  • 1904年 - 3月,當上大坂朝日新聞東京出差員。8月,替志野りう結婚。
  • 1906年 - 10月,開始連載「其面影」。
  • 1907年 - 10月,開始連載「平凡」。
  • 1908年 - 6月,畀派到羅刹个生必堆魯薄。
  • 1909年 - 3月,過著肺炎、肺結核咾住院。4月出國。5月10日,客死盆後湾,享年45歲。
  • 1910年 - 朝日新聞社出版渠个全集。石川啄木校閱。

作品一覽[编辑]

評論

小說

  • 浮雲(1887年 - 1891年,金港堂)
  • 其面影(1907年,春陽堂)
  • 平凡(1908年,文淵堂、如才堂)

翻譯

  • 單戀(1896年,春陽堂)
    • 「單戀」「奇遇」(邂逅)「幽會」の三篇。土健日夫
  • 筒當枕頭(1904年,金港堂) - 刀斯島伊
  • 楷魯科集(1907年,春陽堂) - 翻譯集
  • 血笑記(1908年,易風社) - 櫻獨雷夫
  • 浮草(1908年,金尾文淵堂) - 土健日夫
  • 叫花子(1909年,彩雲閣) - 豪合利,豪魯基譯作集

世界語相關

  • 世界語(1906年,彩雲閣)
  • 世界語讀本(1906年,彩雲閣)

相關項目[编辑]

腳註[编辑]

  1. 1.0 1.1 1.2 桶谷秀昭『二葉亭四迷と明治日本』(文藝春秋、1986年)
  2. 東京外国語学校史 外国語を学んだ人たち(不二出版)
  3. 中村光夫「知識階級」(日本ペンクラブ電子文藝館編輯室、2001年)
  4. 接受弗曉小說个逍遙替渠話个「照三遊亭圓朝寫落語然介寫寫相呢?」,是文學史丄弗可或缺个一段插曲。圓朝寫个落語、尤其是速記本對明治以降个日本語影響深極。
  5. 1899年(明治32年)2月1日收錄當時辰光在任者个『職員録 明治卅二年 甲』(印刷局)裏向有得渠名字。
  6. 「ロシアに渡った日本人―江戸・明治・大正・昭和 ユーラシア・ブックレット」 セルゲイ・イリイチ クズネツォフ著、 荒井 雅子翻訳 (東洋書店)
  7. Discover Singapore:The City's History and Culture Redefined by Susan Tsang, Marshall Cavendish, 2007, p92

外部鏈接[编辑]