浮雲(二葉亭四迷)

出自维基百科,自由个百科全书
(从浮雲 (二葉亭四迷)转戳到箇里)

『浮雲』(うきぐも是日本作家二葉亭四迷箇長篇小說。在1887年(明治廿年)到1889年間陸續發表,第一、第二篇由金港堂出版,第三篇在「都之花」丄向連載。

小說主要描繪爻主角內海文三(うつみ ぶんぞう)替渠場表阿妹阿勢(おせい),還有渠場朋友淘裏箇本田昇(ほんだ のぼる)三介頭。通篇以言文一致體(ダ体)寫成,是日本近代文學箇開端,也是二葉亭箇代表作。當時辰光,二葉亭四迷讀著渠場老師坪内逍遥箇文學論作『小說神髓』,覺著仍舊弗夠,便創作爻『浮雲』替其師作品『當世書生氣質』相爭彩。開初是以坪内逍遥箇名義(本名:坪内雄藏)發表箇咾,渠場老師也得到爻印稅箇一半。

卻情,二葉亭四迷對昰部作品弗大滿意,朝後廿年間幾乎弗曾再動筆。

故事概要[编辑]

內海文三頭子弗大活絡,做事體死板板。無出何差誤便畀炒爻魷魚,渠自尊心貤忒強,蓋咾弗肯求領導讓自家復職,心裏交關殟塞。相反,本田昇反倒會講言話,竄來快來邪;阿勢場孃阿政勢利來滿眼衹有銅鈿,擔文三摜脫哉,外加連得本生歡喜文三箇阿勢也對本田有意思起來。文三弗願意接受昰然一隻事實,日思夜想,直到末腳也仍舊一事無成。

作品解說[编辑]

二葉亭四迷在大學裏學習羅刹語,受羅刹文學影響邪深。一般認爲,茲篇小說是參考伊樊·行綽洛夫箇『奧勃洛沒夫』爲藍本箇。此外,篇小說箇文體從第一篇到阿末篇變化交關大,第三篇裏向主角文三箇獨白行行情情,弗像第一篇開頭許然有得大量像煞在引導讀者介箇旁白內容。從小說裏描寫箇部分搭各章名稱也好望出,戲作手法在逐眼減少。

部作品常莊讓人覺著是未完之作,弗過一隻「終」字在第三篇阿末明確寫在許。原舊有儂話未完成是因爲後首來發現爻寫在許續篇構想箇二葉亭四迷箇筆記,當然,渠箇具體想法便弗得而知爻。

相關葉面[编辑]

外部鏈接[编辑]