吴 (三国)

来自 吴语维基百科
蹦到: 导航搜寻

吴(229年—280年)就三国辰光个吴国,也叫孙吴、东吴。3世纪个辰光孙权建立个政权,历史浪几次迁徙政治中心,从吴(苏州)到京口(镇江)建铁瓮城,再迁到建业(南京)建造石头城,再迁到武昌(鄂州)建吴王城,最后又从武昌回到建业。222年,孙权称吴王。黄龙元年(229年)四月,孙权称帝,国号吴,改元黄龙,是为吴大帝,吴也应始于搿个一年。 280年,畀西晋灭脱,三国结束。

简介[编辑]

吴(229~280)是三国个辰光孙权建立个政权。222年,孙权称王,并改元黄武。229年孙权称帝,定都荆州后迁到建业,史称东吴。孙权占据扬州、荆州、交州,地处长江中下游一带,春秋个辰光吴国就建勒搿搭,曹魏也封过孙权为吴王,所以史称“孙吴”;又因为俚个政治中心勒江东,也称“东吴”。 280年,畀西晋灭脱。

历史[编辑]

东汉末年,吴郡富春孙坚做之长沙太守,曾经带兵参与讨伐董卓。191年(初平三年),孙坚征荆州刘表、黄祖个辰光战死脱哉,只有三十七岁。

孙坚个倪子孙策勒孙坚死脱后投靠之袁术,问袁术借之兵马,带兵攻占之扬州。勒袁术称帝后,搭俚决裂,自立门户。曹操控制个许昌朝廷拜俚为讨逆将军,封吴侯。建安五年(200年)夏,孙策畀之前个吴郡太守许贡个门客暗杀,死个辰光只有廿六岁。

孙策死后,俚个兄弟孙权继位,勒短时期内稳牢之江东形势。后来孙权一方面镇压扬州境内个山越反叛,同时三征黄祖,想要控制荆州搭江夏。建安十三年(208年),荆州牧刘表死脱。曹操军也勒搿许辰光南下征讨荆州。刘表个倪子刘琮投降畀曹操。曹操勒得到之荆州后,想要进一步攻打孙权占据个江东。孙权联合刘备,勒赤壁之战当中大破曹操。此后曹操退守北方,占据荆州北部个南阳郡、江夏郡局部搭南郡局部地区。孙权派周瑜搭韩当等将领攻占之江陵。

搿许辰光,刘备攻下之荆州南部个长沙、桂阳、武陵、零陵四郡。后来孙权拿南郡借畀刘备。同时勒建安十五年,孙权得到之交州。勒刘备得蜀之后,孙权问刘备讨要荆州,最后双方同意以湘江为界,长沙、桂阳、江夏属孙权;零陵、武陵、南郡属刘备。建安廿四年,孙权搭曹操称藩,派吕蒙趁关羽攻襄阳个辰光夺荆州,从此刘备势力畀逐出荆州。

220年曹丕称帝,第二年刘备称帝,分别建立之魏、蜀。刘备称帝后,就以复仇之名发动夷陵之战。孙权先搭曹丕称臣,畀封为吴王,都武昌(今鄂州市),来避免两线作战。222年,刘备勒猇亭畀吴镇西将军陆逊击败,几乎全军覆没,刘备弗久就勒白帝城病死脱哉。战争结束之后,蜀相诸葛亮派邓芝出使吴国,吴蜀恢复同盟。孙权断绝之搭曹魏个短时同盟,让魏文帝曹丕先后三次对吴用兵,侪无功而还。后曹休又勒228年勒石亭对吴用兵,也畀陆逊,全琮搭朱桓等人迎击而失败。黄龙元年(229年,魏太和三年,蜀汉建兴七年)四月丙申,孙权称帝,国号吴,改元黄龙,是为吴大帝。

嘉禾二年(233年),孙权封辽东个公孙渊为燕王,吴帝孙权派太常张弥、执金吾许晏、将军贺达领兵一万多人还有送的去个金银财宝,想要立公孙渊为燕王,但不过公孙渊怕吴国呣没办法及时支援又觊觎财物,就斩杀使者。同时吴国几次攻打魏国,但不过侪无功而还。

嘉禾六年(237年)公孙渊自立燕王,改元绍汉,建立燕国。第二年正月问东吴称臣,然后就勒八月畀司马懿带兵平定哉,公孙渊畀杀脱,燕国政权灭亡。

赤乌四年(241年),孙权个长子孙登死脱。第二年孙权立孙和为太子,弗久又封孙霸为鲁王,引发之“二宫之争”,又称“南鲁党争”,朝中大臣也分为两派。最终孙和被废脱,孙霸畀赐死,名臣陆逊等十多个大臣侪勒二宫之争中畀逼死脱,最后幼子孙亮反而畀立为太子。吴国经搿件事体,举国分歧,埋下之内部斗争个祸根,逐渐开始衰败。

252年四月,孙权驾崩,七十一岁。孙亮即位,改元建兴。由诸葛恪、孙弘、孙峻等辅政。253年春,诸葛恪征淮南,惨败。诸葛恪畀孙峻杀脱,大权落勒孙峻手里。

256年孙峻病死脱后,事体侪交畀从弟偏将军孙綝。后来孙綝废脱孙亮为会稽王,改立孙休为帝。弗久孙綝又畀孙休杀脱。

元兴元年(264年),孙休病死脱。搿许辰光蜀汉刚刚畀灭脱,交趾又叛吴降魏,东吴国内形势弗稳,想要立一个比较年纪大个君主。左典军万彧搭丞相濮阳兴、左将军张布推荐之孙和个长子孙皓即位。孙皓即位之初曾经一度施行仁政,下令抚恤国内人民,又开仓振贫,解决贫民个危机,又减省后宫宫女搭放生宫内多余个珍禽异兽,一时畀誉为令主,但不过因为东吴搿许辰光个国力弗来三哉,蛮难中兴,时运弗佳,所以俚变脱哉,弗久俚残暴个一面就显露出来哉。民怨弗绝。还好勒陆抗、陆凯等大臣个全力支撑下才让吴国茍延残喘。

274年,陆抗病死脱。咸宁五年,晋武帝下令分六路伐吴。晋军势如破竹,晋将王浑、杜预、王濬搭贾充等人相继攻破吴将张悌、沈莹、孙震、张象、伍延、薛莹、胡冲搭孙歆等人,吴国防线快速崩溃。

280年(太康元年),晋将杜预领十万大军继续前一次个攻势,孙皓紧急下令张悌领七八千人抵御,杜预破之张悌个大军,直逼建业,孙皓手下头已经呣没将才哉,自家晓得大势已去,就等西晋大军攻来个辰光,勒石头城浪宣布投降,280年东吴畀灭脱。

吴国灭亡个辰光,领州四、郡四十三、县三百一十三、户五十二万三千、吏三万二千、兵二十三万、男女口二百三十万、米谷二百八十万斛,舟船五千多艘,后宫五千多个人。

内政[编辑]

吴勒政治浪大体跟东汉相近,地方浪还是实行行州郡制,中央方面也是一样个。唯一不同个是东吴主要受江南本地豪族影响,单是在朝朝臣,有弗少顾姓人士(像顾雍)、朱姓人士(像朱桓)、陆姓人士(像陆逊)搭张姓人士(像张温),就是后来畀称为吴四姓个吴郡四大家族,搿点世族侪是江南个望族。

范围[编辑]

孙吴个疆域勒孙策个辰光就有九州当中个扬州个大部分。孙权勒赤壁之战后陆续获得之荆州西部、交州,勒打败关羽后获得之整个荆州南部。到孙权称帝后疆域再稳定下来。孙吴北面搭曹魏对峙勒长江淮河一带还有汉江长江一带,以建业、江陵为重镇;西面搭蜀汉相邻勒三峡,西陵为重镇;东还有南到东海南海,其中最南达现在个越南中部。孙吴原有三州(荆州、扬州、交州)32郡。勒226年设置广州,后并入交州。到264年复设,共增加一州。

思想[编辑]

经济个发展,搭外界交往个增加,促进之江南文化个提高,出现之一批知名个经学家搭文史之士,像虞翻、陆绩、韦昭。佛教开始勒江南传播,居士支谦从洛阳南来,世居天竺个西域僧康僧会稍晏从交趾北上。俚哚勒建康译经传法,影响交关大。道教勒南方民间继续流传。

帝系[编辑]

三国孙吴君主与年号 模板:Ed
庙号 谥号 君主名 在世时间 年號 年期 陵墓
始祖 武烈皇帝 孙坚 155年-191年 高陵
长沙桓王 孙策 175年-200年
太祖 大皇帝 孙权 182年-252年 黄武註1
黄龙
嘉禾
赤乌
太元
神凤
222年-229年
229年231年
232年-238年
238年251年
251年252年
252年
蔣陵
孙亮 252年-258年 建兴
五凤
太平
252年253年
254年256年
256年258年
景皇帝 孙休 258年-264年 永安 258年264年 宣陵
文皇帝 孙和 224年-253年 明陵
孙皓 264年-280年 元兴
甘露
宝鼎
建衡
凤凰
天册
天玺
天纪
264年265年
265年266年
266年269年
269年271年
272年274年
275年276年
276年
277年280年

註1:孙权受曹操册封吴王后,于222年自立年号黃武,至229年方称帝建国。
註2:吴国灭亡后,晋武帝孙皓封为归命侯,史称吴末帝。

参考文献[编辑]