西渡街道

西渡街道是中华人民共和国上海市奉贤区下头一隻街道办事处，来勒奉贤区北部，东面是奉贤区金汇镇，南面是金海社区、奉浦社区，西接庄行镇，北濒黄浦江，江对岸是闵行区江川路街道。面积28.77平方公里，户籍人口5万人，2015年11月30号批复，2015年12月19号正式挂牌成立，是奉贤区历史丄第一隻行政区划意义丄个街道。街道办事处来勒西闸公路1276-1278号（原南桥镇西渡社区办事处驻地）。

名称由来

西渡，是“西渡口”个简称，亦名“敏航渡”。因为老个横泾港东面隻普渡庙前、横泾港西面隻秦皇驰道边侪有畀行人等摆渡个方亭，故咾分别叫“东渡口”、“西渡口”。旧址来勒今朝个西闵线客轮渡边浪向。

历史沿革

西渡口本来是南汇县太平乡插花地，民国22年（1933年），划畀奉贤县，算第九区个。慢交第九区合併进第一区，成仔“西渡乡”。1949年5月份，奉贤县解放，西渡乡算南桥区，下头14隻村。1957年9月份，撤区并乡，西渡乡并入萧塘乡。1959年9月，改萧塘人民公社，1984年政社分设，复改萧塘乡。1994年撤乡建镇，萧塘乡更名西渡镇。镇人民政府来勒萧塘。镇境东面是白庙港，对岸是金汇镇、齐贤镇，西面边界是竹港，对岸是邬桥镇，南面是江海镇、上海市工业综合开发区，北面黄浦江。2000年2月份，陈湾村、公谊村划畀上海市工业综合开发区。2003年，西渡镇并入南桥镇。2015年11月30号，上海市人民政府批复同意以原南桥镇西渡社区办事处管辖范围设立西渡街道办事处，街道办事处行政区域范围为：东到金汇港搭仔南桥镇北新村、五宅村、益民村村界，南到发展村、金港村、益民村村界，西至南竹港，北至黄浦江。2015年12月19号，西渡街道正式挂牌成立。

行政区划

西渡街道下头有10隻居委会，8隻村委会：鸿宝第一社区居委会、鸿宝第二社区居委会、鸿宝第三社区居委会、水闸居委会、闸园社区居委会、浦江居委会、新南社区居委会、水岸社区居委会、文怡社区居委会、金都居委会、发展村村委会、灯塔村村委会、南渡村村委会、金港村村委会、益民村村委会、关港村村委会、北新村村委会、五宅村村委会。