范志毅

范志毅（1970年1月22日－），绰号范大将军，祖籍宁波，出生来勒上海杨浦区，是已退役个中国职业足球运动员，原来个国家队队长。

球员时期，范志毅主要司职中后卫，弗过因为身体条件好，伊经常畀挪到中场甚至锋线浪。伊勿光拿着过甲A联赛最佳射手，还是中国国家队目前进球顶顶多个后卫。2001年，范志毅获得亚洲足球先生，是中国第一位拿着箇個奖个球员。伊曾做上海申花个主力，1995年拿着联赛冠军搭仔几乎所有中国足坛个个人荣誉。1998年，伊开始去海外踢球，曾勒拉英格兰甲级联赛水晶宫当队长，是伊年个年度最佳队员。伊还勒拉盟苏格兰超级联赛邓迪队、英乙球队卡迪夫城踢球。回国后，伊曾去香港甲组足球联赛队伍香港流浪一头踢球一头做教练。伊亦曾担任中国足球乙级联赛队伍苏州趣普仕个技术总监。

2008年起，范志毅勒拉上海东亚协助工作，必过一直没具体个职务。2009年1月起，伊担任上海东亚个青年队主教练，带领上海U-16队参加全运会男足乙组比赛。2010年1月，俱乐部宣布范志毅担当球队主教练，必过赛季结束后并呒没留任。

离开东亚后，范志毅频繁踢老甲A明星赛、上海老克勒明星足球队等一系列业余足球活动，还经常出任上海球队个青年队或者预备队个教练。2020年，伊出任根宝足球基地技术总监。5月11号，当选上海足协副主席。范志毅还去参加综艺节目，甚至去客串拍电视剧。