爱达·魔都号

爱达·魔都号出坞

爱达·魔都号（英语：Adora Magic City），中国头一艘国产大型游轮。箇部船2019年10月18号开始由上海外高桥造船造个，2023年11月4号拿伊交付畀中船嘉年华，2024年1月1号正式营运。箇部船将拿上海当母港，会得走日本搭东南亚个航线。

箇部船长里向有323.6米，阔37.2米，总吨位有13万5500吨，有24层楼高，2125间客房，好载乘客5246人。船上有豪华酒店、影院剧场、水上乐园、健身房、篮球场、免税店、海上探索营等设施，全船侪有5G信号。船上拢总配备20艘救生艇。

命名

2023年5月19号，箇艘船畀正式命名为“爱达·魔都号”（Adora Magic City），意思是“从上海出发，爱达全世界”。碰巧上海有“魔都”箇個外号，故咾箇個名字体现出伊“上海设计”、“上海制造”个特色。

历史

2015年10月13号，中国船舶集团、中国投资有限责任公司、嘉年华集团、意大利芬坎蒂尼集团、英国劳氏船级社（LR）搭上海市宝山区人民政府一道勒拉上海发布《邮轮产业六方合作共同宣言》。中船集团负责邮轮个建造、嘉年华集团负责邮轮个运营管理、芬坎蒂尼集团负责邮轮个设计论证、英国劳氏船级社负责邮轮个质量管理。2015年10月21号，嘉年華公司、中国投资有限责任公司搭中国船舶集团一道签署合资价值250亿元人民币（26亿英镑）个协议，成立中船嘉年华邮轮有限公司。

2017年2月，中船嘉年华宣布订购第一艘中华人民共和国国产个邮轮。

2018年11月，中船集团同美国嘉年华、意大利芬坎蒂尼集团签订邮轮合作设计建造合同，由上海外高桥造船有限公司承接爱达·魔都号个建造，总造价超过55亿元人民币。受采购合约个限制，整艘船个国产化率只有10%。

2019年10月18号，上海外高桥造船开始造箇艘邮轮。

2022年11月25号，中船嘉年华自主邮轮品牌个名字正式敲定为爱达邮轮（Adora Cruises）。

2023年5月19号，上海市文旅局同中船邮轮联合发布，箇艘邮轮个正式名字是“爱达·魔都号”（Adora Magic City），意思是“从上海出发，爱达全世界”。

2023年6月6号下半天1点33分，爱达·魔都号勒拉中国船舶集团旗下上海外高桥造船有限公司个2号船坞正式出坞，箇個辰光邮轮内装进度达到85%以上。

2023年7月17号-7月24号，爱达·魔都号进行首次试航。

2023年9月7号，爱达·魔都号开启完工验证航程，也是交付前阿末一趟试航。

2023年9月20号，爱达·魔都号个首航船票开卖。

2023年11月4号，爱达·魔都号正式交付畀中船嘉年华，2024年正式营运。