元代政区

元朝沿袭自金国个行尚书省，开始实行行中书省制。「行中书省」全称「某某等处行中书省」，简称「某某行中书省」或「某某行省」。开始搭金国一样，只是一種中央政府派遣在外个临时机构。后首由于战争咾啥个因素，行省也开始干预地方政务，逐渐变成功最高一级个地方行政区域。对于汉族聚居区，相比唐朝横过来㓰个“道”，元朝个“行省”多数是直过来个。

元朝初叶个行省管辖范围来得大，变化也比较频繁。到著中叶，开始稳定下来，一级层面拿全国分成功中书省直辖区、宣政院辖地、十个行中书省，还有征东、交趾、占城、缅中咾啥藩属性质个行省。到著末叶，为著镇压农民起义，又设著不少行省。另外，甘肃行省西面个别失八里、哈剌火州、哈密力不归行省，直属朝廷。

元代中叶一级政区
名称	首府	主要管辖范围
中书省直辖区		今河北、山东、山西搭河南、内蒙古一部分
甘肃等处行中书省	张掖	今宁夏、甘肃东北部
河南江北等处行中书省	开封	今河南南部、湖北东北部、江苏北部、安徽北部
湖广等处行中书省	武汉	今湖北东南部、湖南、广西、贵州大部、广东西南部
江西等处行中书省	南昌	今江西大部、广东大部
江浙等处行中书省	杭州	今江苏安徽两省南部、浙江上海全部、福建大部、江西东北部
辽阳等处行中书省	辽阳	今中国东北、朝鲜东北部、内蒙古自治区东北部
岭北等处行中书省	和林	今内蒙古北部、蒙古国、西伯利亚南部
陕西等处行中书省	西安	今陕西大部、内蒙古西南部、甘肃东南部、四川西北部
四川等处行中书省	成都	今四川大部、陕西西南部
云南等处行中书省	昆明	今云南、贵州西部
宣政院辖地		今西藏、青海大部

省下头个政区相当複杂，顶多好有省－路－府－州－县五级，顶少个只有两级，多数是三四级。府一般搭路同级，个别低于路。不少州只辖一县，甚至不辖。路、府侪可能直辖州、县，省也可能直辖州。来拉远离省中心个地方，还会得设置介于省、路之间个宣慰司道。