中秋节

来自 吴语维基百科
蹦到: 导航搜寻
Moon over cumulus.jpg

中秋节东亚民间个一个传统节日,勒拉每年农历八月十五号。中秋节弗光光是华人个节庆,也是日本越南韩国朝鲜个传统佳节。

照中国农历来讲,农历八月是秋天头个第二个月,老古辰光叫仲秋,个咾民间叫渠中秋,又叫秋夕八月节八月半月夕月节,外加搿日天月亮顶顶圆,象征团圆,所以又叫团圆节

起源[编辑]

中秋搿个词,顶早见《周礼》,《礼记•月令》浪话:“仲秋之月养衰老,行糜粥饮食。”尚况朆说明是八月哪里一日。

唐朝之后,中秋节再成为固定个节庆。传说杨贵妃梦游月宫,获着霓裳羽衣曲,民间再开始过中秋节。一般性认为,中秋节宋朝辰光开始流行,到仔辰光,中秋节已经是中国一大传统节庆哉。

中秋节个传说里向,嫦娥奔月顶顶有名。

嫦娥奔月[编辑]

嫦娥奔月勒民间有好几只版本,下底介绍里向个一只:

传说勒拉远古辰光,天浪向有十只太阳。大力士后羿射脱仔九只太阳,第十只太阳吓来拉,只好乖乖里听言话,照辰光起落,造福老百姓。

后首来,后羿寻着嫦娥做娘子。

一日天,后羿得着一包弗死药,只要拿弗死药吃下去,就会得成仙升天。后羿回转去仔就拿弗死药交拨拉嫦娥。

哪里晓得,后羿个徒弟蓬蒙想要偷吃弗死药,渠趁后羿到外头去个辰光出出里爬进嫦娥个房间,逼渠拿弗死药交出来。嫦娥弗肯,就拿弗死药一侪吃下去,个咾就变成仔仙女,一脚飞到月宫(月亮)里向。

过节习俗[编辑]

香港维多利亚公园花灯。(2005年)
  • 赏月。
  • 月饼
  • 孛相灯笼
  • 桂花,吃桂花制成个各种食品,主要是糕点、糖果。
  • 斋月亮,拜祭太阴娘娘
  • 送礼拨亲眷朋友也是韩国人过中秋节个习俗。渠搭也拿中秋节叫 “韩国人个感恩节”。

宁波、台州、温州地区个八月十六[编辑]

浙江东部个宁波台州温州人介,中秋节来勒农历八月十六,是个大节刻,要做羹饭拨往生个家庭成员吃。

韩国个中秋节[编辑]

韩国人个放假表浪拿“秋夕”个英文翻译成 Thanksgiving Day,因为秋夕勒拉韩国是一个大节,会得连甩放三日天假。老早交通弗发达个辰光,民间会得利用搿段辰光回乡探亲。乃至今朝,每碰着秋夕,之前个一个号头,韩国各大公司侪会得大削价,来吸引老百姓买礼物互相赠送。

越南个中秋节[编辑]

越南人阴历八月半过中秋节,称为Tết Trung Thu(节中秋。“”为喃字,“中秋”是汉越音) 。当日夜来,小人要听关于阿贵个传说。越南小倌勒中秋夜来侪要拎仔鲤鱼灯出去孛相,预示大仔“跳龙门”个意思。

日本个中秋节[编辑]

日本传统个中秋节十五夜,也叫中秋明月芋明月栗明月。现代日本人,已经弗过中秋节哉。搿日大家可以覅工作,勒屋里向吃吃啤酒,弗看月亮看电视。因为传统文化个衰退,年纪轻个人侪弗晓得节个来头搭仔意义,听见过节,只晓得搿日覅去上班哉。

中秋诗词[编辑]

交关古代诗人写着歌颂中秋节个诗词。

宋朝苏轼写个——水调歌头•明月几时有 顶顶有名:

明月几时有?把酒问青天。不知天上宫阙,今夕是何年。我欲乘风归去,又恐琼楼玉宇,高处不胜寒。起舞弄清影,何似在人间! 转朱阁,低绮户,照无眠。不应有恨,何事长向别时圆?人有悲欢离合,月有阴晴圆缺,此事古难全。但愿人长久,千里共婵娟。

参考文献[编辑]

  1. 林之光,中秋个赏月天气,科技日报,2000-9-9(4)。


外部链接[编辑]

Commons-logo.svg
维基共享资源里向寻得着搭该篇文章搭界个多媒体资源: