顾炎武

顾炎武（1613年－1682年），原名绛，字忠清。明亡后，改名炎武，字宁人。此外，也用过蒋山佣个化名，后世畀尊称叫做亭林先生。明朝直隶昆山县（今江苏苏州昆山）人，17世纪东亚有名个儒家学者，清朝儒家学术重要个开拓人物，搭黄宗羲、王夫之一道，畀当成明末清初学问家个代表性人物，伊个【天下兴亡、匹夫有责】后势来成为近代著名个民族主义号召口号。

生平

出身江南

1613年7月15号（明帝国万历末年），顾炎武在拉南直隶昆山千灯镇出生，伊所在个顾氏家族，一直是江东望族。伊个大爷爷顾章志为南京兵部右侍郎。顾炎武还是徐乾学、徐秉义、徐元文三人个娘舅。

小辰光，顾炎武畀自家已经死脱个堂伯顾同吉过继为养子，伊个养母是王逑个女儿，十六岁未婚守节，白天纺织，晚上看书至二更才休息，独立抚养顾炎武成人，并且教育伊关于儒家传统忠君守节个想法。

混迹士林

1626年（天启6年），顾炎武考中秀才，与同窗归庄兴趣类似，2年之后，二人一道到南京参加应天乡试，并且一道加入个辰光江南地区流行个文人社团——复社。之后，顾炎武又参加好几趟科举考试，弗过侪弗曾成功，之后，伊个兴趣点转移到杂学防霾呢，开始写《天下郡国利病书》搭《肇域志》。崇祯十六年（1643年），伊靠捐钞票，成为国子监监生。

国变家毁

顾炎武平稳个士大夫生活轨迹，因为清军入关发生剧烈改变。1644年明帝国灭亡，顾炎武一开始隐居一段辰光观望局势，但第二年决定接受南明弘光朝廷召唤，到南京当官。弗过，走半路上，就接到消息，讲清军攻克南京，弘光帝畀捉牢。之后，顾炎武紧急跑到吴越地区，参加当地士大夫组织个反清活动。弗过，因为平常辰光弗曾有啥准备，伊拉个抵抗老快侪畀扑灭，顾炎武个老家昆山城，也因为抵抗清军，畀屠城4万人，伊个养母王氏也因此死脱，死之前，伊搭顾炎武讲，要伊永远弗要当清朝个官。迭个事体影响到顾炎武一生。

抗清梦碎

接收自家养母教导个顾炎武，在拉之后个将近10年当中，断断续续参加过蛮多江南地区组织个反清起义活动（包括同陈子龙一道动员吴胜兆反正），先后接受过南明鲁监国、南明绍武帝等把伊个官职，为反清复明做事体。弗过，此类活动基本侪因为各种各样个原因归于失败。弗但个能，伊还因为参加反清活动，畀自家下手个瘪三仆人顶牢，向清廷告发伊“谋反”。为逃避追捕，顾炎武只好剃发易服，并且在拿仇家杀脱之后，卖地卖房，从此离开昆山同江南，一辈子也弗曾回来。

游走华北

失去根基搭活动依托个顾炎武，跑到北方，一路侪观察、记录各地个风土人情，一面开始大量写书。先后到过山东、山西、河南、河北、陕西等地方。1659年，跑到山海关凭吊，年底，跑到陕西华阴县定居。在拉迭个阶段，伊彻底变成一个默认清廷统治，并且专心搞学问个文人。也因为个能，让清廷对伊个态度，也从追捕变成功拉拢，多趟派人请伊出山，到北京当清帝国个官僚。弗过，顾炎武对此类做法从来弗曾答应。伊还是号称要保留自家个名节。1682年，伊在拉山西活动辰光，因为上马失足跌出毛病，不治死脱，享年七十岁。

学术影响

相比气节或者反清活动，顾炎武更大个影响是在拉伊个学术方面。在拉18世纪，伊就畀当时个文人公认是清朝个“开国儒师”、“清学开山”始祖。伊论述个内容邪气丰富，包括经学、史学、音韵、小学、金石考古、方志舆地以及诗文诸学。

伊对陆王心学态度严厉，进行总体性清算，号召搞学问，要以经世致用作为目标，弗要纠结心性问题，，开启了朴实学风，此类做法，虽然在拉18世纪清帝国高压个文字政策下头蛮难实行，弗过为后势来清代中后期实用学问个兴起，打好蛮深刻个基础。

20世纪有名文化人梁启超在拉伊写个《中国近三百年学术史》当中认为：

乾嘉诸儒所做的工作，举其要者，约有十三个方面：一、经书的笺释；二、史料之搜补鉴别；三、辨伪书；四、辑佚书；五、校勘；六、文字训诂；七、音韵；八、算学；九、地理；十、金石；十一、方志之编纂；十二、类书之编纂；十三、丛书之校刻。上列诸项尽管分类并不十分严密，且亦不能包举无遗，但大致可以看出乾嘉学术的规模和气象。乾嘉诸儒的这些学问，论其端绪，除辑佚、类书等少数方面外，基本上都发自顾氏。有的学者认为，乾嘉学术的专精与顾氏学术的博通在精神上似乎相差很远，其实，倘若换一个角度来看，乾嘉诸儒的专精之学正是顾氏的广博之业进一步分化和深化的结果。故梁启超说：“亭林的著述，若论专精完整，自然比不上后人。若论方面之多，气象规模之大，则乾嘉诸老，恐无人能出其右。要而论之，清代许多学术，都由亭林发其端，而后人衍其绪。