荣禄

荣禄（1836年4月6号－1903年4月11号），字仲华，满族，满洲正白旗人，属乌喇瓜尔佳氏。19世纪后半段清帝国有名个满洲军政人物，慈禧太后个亲信。清朝挨末一个皇帝溥仪个外祖父，在拉晚清个政治活动当中，发挥邪气重要个作用。

生平

满洲权贵

荣禄出身拉世代军官家庭，自称是清初开国五大臣中费英东个后裔。年轻辰光，以荫生晋工部员外郎，咸丰九年（1859年），任户部银库员外郎个辰光，畀上司肃顺看弗顺眼，只好调离岗位。之后，伊走关系，捐到一个候补道（四品头衔）。咸丰十年、十一年嘸啥实际岗位好做，只好赋闲。弗过，也就在拉迭个辰光，伊同初代醇亲王奕𫍽建立相当紧密关系。为之后发迹打好基础。

扶摇直上

辛酉政变前，得到慈禧太后搭恭亲王奕䜣欣赏，出任内务府大臣，工部尚书，后势来，之后，调任西安将军。到1890年代，慈禧太后更加欢喜伊，就留北京，担任步军统领，参与到镇压戊戌变法个活动、组建武卫军防守北京、策划庚子拳乱当中协调清庭同东交民巷外国人个关系等事体。在拉之后八国联军战争当中，护送慈禧太后，一路跑路到西安。回来之后，担任总理衙门大臣，兵部尚书。到迭个辰光，伊已经是慈禧太后顶信任，依靠个大臣。

积劳丧命

弗过，因为工作太多，荣禄个身体健康也就一天天推板起来，伊想辞职疗养，慈禧又弗批准。个能，到1903年，终于生毛病死脱。死之前，向慈禧太后上表，总结自家一生个功过，慈禧太后命令厚葬，并谥文忠。

家庭

妻妾
- 元配萨克达氏，年轻辰光死脱。
- 继配爱新觉罗氏，灵桂之女，庚子事变辰光，同荣禄一道西行，在拉回来路上，在拉河南彰德府死脱。
- 侧室刘佳氏，以女贵，封一品夫人。
子女
- 儿子，纶厚，庚子事变辰光，随荣禄西行，至西安死脱，年纪只有十四岁。
- 嗣子，良揆。荣禄死个辰光，是员外郎，后势来加恩以四五品京堂候补。
- 女儿瓜尔佳氏，礼亲王诚厚妻。
- 女儿瓜尔佳氏，母爱新觉罗氏，荣禄亲信贻谷作媒，慈禧太后指婚，嫁醇亲王载沣做老婆（福晋），生宣统帝溥仪。

遗迹

荣禄在拉北京住过蛮多地方，现在一般公认标记出来个【荣禄故居】，位置在拉北京东城区交道口菊儿胡同3号、5号、7号搭寿比胡同6号。宅第分3部分：西面是洋式楼房，当中是花园，东面是住宅，住宅蛮大，前后侪分成五进。现在保留下来个是倒座、过厅。正房搭祠堂、花园侪畀拆脱哉，西面个洋楼，只有一座两层西式楼房保留下来。