奕䜣

来自维基百科
跳到导航 跳到搜索
Prince Gong.JPG

恭忠亲王奕䜣(满语:ᡳ ᡳᠨ,转写:I Hin;1833年1月11号-1898年5月29号),号乐道堂主人,满洲爱新觉罗氏道光帝第六子,咸丰帝同父异母阿弟,生母是静妃博尔济吉特氏,道光帝遗诏封“和硕恭亲王”。统称“六王爷”。伊是晚清有名个肉食者,也是洋务派代表人物搭交关近代化工程个推动人。

生平[编辑]

小辰光师从卓秉恬贾桢,脑子活络,得到道光帝欢喜,弗过,因为咸丰个老师杜受田传授伊一些讨人欢喜个技巧,让道光帝还是选择让咸丰作为自家个继承人。咸丰登基之后,拿奕䜣封成恭亲王,虽然表面上蛮尊敬推崇,弗过实际浪对迭个皇阿弟,也是有交关防范,让奕䜣嘸机会掌握实权。

1860年事体发生变化,在第二次鸦片战争当中,咸丰帝因为判断失误,为避免畀英法联军活捉,只好跑路到热河避暑山庄,临走之前伊让奕䜣当自家个全权钦差大臣,负责搭个谈判工作,在拉迭个过程当中,奕䜣逐渐熟悉同洋人打交道,最后签订《北京条约》,个辰光,伊个阿哥咸丰躲在避暑山庄弗肯回北京,个能,恭亲王在拉留守北京个大臣当中个声望,就更加高哉。

1861年七月,咸丰皇帝驾崩,之后,京城当中有交关人侪期待恭亲王好畀任命为议政王,辅佐同治皇帝。弗过,咸丰却让肃顺等掌握政治权利。让咸丰个两个老婆同恭亲王侪邪气弗满意,导致辛酉政变爆发,之后,奕䜣同慈禧太后、慈安太后一道拿肃顺为代表个八个顾命大臣做脱,从此开始作为外庭掌权人,执掌满清帝国个命脉。

1860-1880年代,奕䜣出任、兼任总理衙门首席大臣、领班军机大臣、议政王,是朝廷当中顶有权势个人物,也同曾国藩、李鸿章等人一道,推动晚清开始走洋务道路,向近代化转型。在拉迭个过程当中,伊积累大量人脉,声望,也逐步让慈禧感到妒嫉、怨恨。个能,到1884年清法战争爆发辰光,慈禧太后就借口伊做事体弗出力,拿伊一切职务侪剥夺,让伊下野。

之后,奕䜣就隐居多北京西面山当中个戒台寺,嘸过问政治。一直到1894年,因为日清战争当中实在结果太推板,慈禧才被迫同意让奕䜣出山,重新回到军机处。弗过,个辰光个奕䜣已经一点进取心也嘸哉,伊一点建议也给弗出来,混混僵僵过了三年,终于死脱。

遗迹[编辑]

恭王府,在拉北京市西城区什刹海地区,老早是和珅个宅邸,后势来和珅畀抄家之后,和珅之宅,赏把庆郡王永璘居住;和珅之园,赏把成亲王永瑆居住。一直到咸丰年,庆郡王个后代奕劻畀降封辅国将军,搬出去,此地就赏赐把奕䜣当住所。1921年,奕䜣个孙子拿此地卖把天主教会,成为辅仁大学校舍。