高桥镇（上海市）

高桥镇，老底子叫清溪、清浦、清州，勒拉浦东新区个顶顶北面，濒临长江口。伊个南面是高行镇搭高东镇，西面是黄浦江，北面是长江，东面是东海。勒拉高桥港南面、张杨北路西面有充满荷兰风情个高桥新城。

历史

高桥镇箇块地么，唐代开始成陆，宋代先后隶属于昆山县临江乡搭仔嘉定县。中心个高桥古镇好追溯到南宋，伊个辰光已经有顺济庵、法昌寺咾啥个建筑。

明洪武十九年（1386年），明太祖朱元璋来勒箇埭造清浦寨，护守长江口。明永乐十年（1412年），高桥海边造土山，建烽堠，永乐帝叫伊“宝山”，亲笔写文章，立勒块碑，是“宝山御碑”。山来勒万历十年（1582年）畀海潮冲垮，箇块碑乃朝来勒高桥中学校园里向，是浦东新区文物保护单位。

明代，乃朝高桥镇北面二里地个地方，清浦镇邪气繁荣。必过明嘉靖三十二年（1553年），倭寇窝勒法昌寺里向为非作歹，加之河浜堵牢，市船弗通，商人商铺就沿咾清浦港向南搬到现在个高桥镇。

清雍正二年（1724年），隶属于宝山县。嘉靖年间，高桥镇从北行头（今北市梢）开始向南造北街，再沿咾高桥界浜（高桥港）造东街和西街，形成丁字形三条长街，是今朝高桥古镇“二港三街”个基本格局。宣统二年（1910年），设高桥乡。民国十七年（1928年），划进上海特别市，是高桥区。

因为界浜来勒天灯口直通黄浦江，加之上海开埠，高桥乡民集中去上海做工。1932年，上海顶早个海滨天然浴场来勒高桥长江口龙王庙开门迎客，加之市轮渡好直通上海外滩，高桥成为上海近郊个一处旅游胜地。1937年，日本部队攻打上海，龙王庙变成战场，海滨浴场畀毁脱。

高桥来勒吴淞口东面，历来是军事要地，1662年太平军进军上海搭仔1949年上海战役里向，高桥侪是战场，乃朝还有碉堡。

解放以后，区划历经改动。1956年2月，撤销高桥区，并入东郊区。1958年9月，凌桥、海滨、高东、高南四乡和高桥镇合并，成立东风公社。同年10月，东郊区撤销，改为隶属浦东县。1959年4月，东风公社改为高桥公社。同年5月，高桥公杜拆成海滨、凌桥、高东、高南四个公社。1960年1月，吴淞区建立，高桥中兴镇划畀吴淞区。同年2月，高桥镇改街道办事处，直属浦东县。11月，上海炼油厂、上海石油采购供应站、上炼新村等地区划畀吴淞区。1961年1月，撤销浦东县，划畀川沙县。同年7月，恢复高桥镇建制，隶属川沙县。1964年5月，吴淞区撤销，中兴镇地区划畀川沙县。1984年3月，政社分设，设立高桥镇、高桥乡、凌桥乡。

浦东开发开放以来，高桥镇不断发展。1992年，划畀浦东新区，成立外高桥保税区。1995年11月，撤销高桥乡建制，建立外高桥镇；撤销凌桥乡建制，建立凌桥镇。1998年9月7号，外高桥镇并入高桥镇。2000年4月，撤销高桥镇与凌桥镇建制，建立新的高桥镇。2005年，高桥老街由上海市政府列为历史风貌保护区。

境内主要地点

• 高桥港
• 高桥烈士陵园
• 仰贤堂
• 高桥绒绣馆
• 凌氏民宅/高桥人家陈列馆
• 太平天国烈士墓
• 永乐御碑
• 老宝山城遗址

特产

• 高桥松饼
• 高桥薄脆
• 松糕