郑孝胥

郑孝胥（1860年5月2号－1938年3月28号），字苏龛，号海藏，19世纪后半段到20世纪头30年当中东亚邪气有名个文化人、诗人、书法家、思想家、政治人物、外交活动名流，清朝末代皇帝溥仪个老师，满洲国第一任总理。

生平

出生名门

伊在拉福建省闽县（今福州）出生，从曾爷爷开始，屋里就侪是有功名个读书人士大夫，同清朝交关名流侪有亲密关系。因为迭个原因，伊也从小就认得李鸿章，张之洞之类个名流。1880年代开始，伊一面准备科举考试，一面就去李鸿章、张之洞个幕府做幕僚，个辰光，除脱学习诗词，打书法基础之类个儒家士大夫传统活动之外，也接触交关洋务，思维慢慢较开阔。1890年代，伊出访日本，从此搭日本人建立比较紧密个关系。

投身立宪

1900年代，清帝国在拉辛丑条约之后，也发觉必须有改革来延长自家个统治寿命，个能，就施行所谓个清末新政，并且号召要搞君主立宪。在拉迭个阶段，已经积累交关人脉搭政治手段个郑孝胥，表现邪气积极，先后参加上海商务印书馆、上海储蓄银行个创建以及新式教育推动等。光绪三十四年（1908年），郑孝胥受岑春煊派遣，出任预备立宪公会会长，要求清廷尽快召开国会。

藏身海上

1911年，郑孝胥得到湖南布政使个高级头衔，正准备跑到长沙开始就任，弗曾想，突然就爆发武昌起义，伊只好跑回上海，蹲在南阳路修造一座别墅，名字叫做【海藏楼】，同交关同样效忠清朝个大臣名流一道，相互活动，自称是“遗老”。迭个阶段，伊个经济来源，主要来自根据顾客要求，出售自家个书法作品，因为伊字写个好，所以销路还是相当灵光个。此外，伊作为“旧体诗”个代表人物，也对五四运动态度比较敌对，认为新文化运动是瞎污搞，加深伊对中华民国个敌对态度。

奔走复辟

作为上海个清朝遗老头面人物，郑孝胥一直搭蹲在北京个满清小朝廷保持联络。1920年代，伊直接回北京，担任已经是青年人个溥仪个帝师（迭个决定一定程度上也是伊老乡，溥仪国学老师陈宝琛个推荐），1924年之后，又同畀冯玉祥赶出紫禁城个溥仪一道跑到天津。因为伊对溥仪忠诚，并且号教导溥仪交关超出传统知识之外个新想法，就逐步成为溥仪信赖个“心腹重臣”。迭个阶段，伊发现单纯依靠几个宗社、遗老个力道来让溥仪重新登基恢复满清帝国，基本是白日做梦，只有依靠外部力量，才好扭转乾坤。个能，伊就开始同对溥仪也有兴趣个日本间谍开始勾勾搭搭。伊个思想勒伊自家个日记当中有明显反映：

自古中兴之主，必借兵力。今则海内大乱，日久莫能安戢，列国通不得已，乃遣兵自保其商业。他日非为中国置一贤主，则将启争端，其祸益大。故今日皇上欲图中兴，不必待兵力也，但使圣德令名彰于中外，必有人人欲以为君之日。

出关建国

1931年，九一八事变之后，郑孝胥同土肥原贤二谈拢，邀请溥仪离开天津，偷渡到日本人控制个旅顺，之后，伊帮助溥仪成为满洲国个“执政”，并且在拉2年之后“登基”，伊也出任迭个日本扶持个国家个政府负责人。弗过，因为伊对满洲国未来个规划，同日本个想法有蛮大个出入，导致后势来伊畀人架空，最后，在拉1938年，在拉长春死脱，享年78岁。

文化成就

除脱是有名个政治人物之外，郑孝胥也是有名文化人，是纪诗坛“同光体”倡导者之一，同陈衍、陈三立一道，畀人当成迭个派别个代表，有《海藏楼诗集》流传。伊个书法就更结棍，工楷、隶火，尤善楷书，取径欧阳询及苏轼，得力北魏碑版。所作字势偏长而苍劲朴茂。