费利佩三世（西班牙）

费利佩三世（西班牙）

费利佩三世（西班牙文：Felipe III de España，1578年4月14号-1621年9月13号），称号受佑者（el Piadoso）。是17世纪开始辰光统治西班牙搭西班牙殖民帝国个西班牙国王。1598年接替自家个阿爸费利佩二世 (西班牙)开始统治西班牙、葡萄牙、西属尼德兰以及庞大个美洲殖民帝国。伊是西班牙哈布斯堡王朝个第三个君主。1598年立在巴伦西亚搭来自奥地利哈布斯堡家族个自家亲戚结婚。

伊欢喜享乐，欢喜拿自家个钞票资助绘画、歌剧等艺术，同时邪气欢喜狩猎。对政治搭军事弗是老上心，立在能力高头，也表推板。只有宗教浪还算是蛮虔诚，是个好人。

伊拿朝廷个事体侪交把自家个宠臣利马公爵，为保证西班牙弗破产，暂时终止对低地个武装进攻，同时搭英格兰、法国侪签署和平协议。弗过，因为高利贷太结棍，还是有负债太多个毛病，为解决迭个问题，到1609年西班牙摩尔人出乱子之后，伊下命令，拿这些人侪驱逐出西班牙，并拿伊拉个财产收归朝廷。迭个事体，成为后势来交关知识分子对西班牙攻击个把柄。

费利佩三世统治辰光，西班牙战争比较少，少数几趟出兵也算成功，所以，后势来个文人，还是拿伊称赞是一个合格个君主。伊统治个17世纪头廿年，整个欧洲乃至世界侪维持立在西班牙个熏天权威下保持大体稳定，号称西班牙治世。1618年三十年战争爆发之后，费利佩三世为维持自家立在低地个统治同时帮助奥地利个亲戚，决定让西班牙站到天主教一方参战。1621年9月13号，费利佩三世驾崩，拿王位搭西班牙殖民帝国，传畀儿子费利佩四世。