范蠡

来自维基百科
跳到导航 跳到搜索

范蠡,字少伯,又叫鸱夷子皮或者陶朱公,早年住勒楚国个辰光,还朆出仕,人称范伯。以经商致富,广为世人所知,后代弗少生意人侪供奉俚个塑像,作为财神。俚还畀当作南阳范氏个先祖。

春秋楚国宛地三户邑(今朝河南南阳淅川县大石桥乡到寺湾镇间)人,是历史浪早期著名个政治家、军事家搭经济学家。俚出身贫寒,但天资聪明,年青个辰光,就交关有学识哉。范蠡个著作今朝侪已经寻弗着哉,计有《兵法》搭《养鱼经》搿两本书,勒《文选》当中也可以看见搿两本书个引句。

生平[编辑]

周景王廿四年(公元前496年),吴国越国发生之槜李之战(今朝浙江嘉兴),吴王阖闾阵亡,因此两国结怨,连年战乱弗断,周景王廿六年(前494年),阖闾个倪子夫差为之搭俚个爷报仇搭越国勒夫椒(今朝苏州太湖里)决战,越王勾践大败,只剩下来5000兵卒逃进之会稽山。范蠡就勒勾践穷途末路个辰光投奔越国,“人待期时,忍其辱,乘其败……”“持满而不溢,则于天同道,上天会佑之;地能万物,人应该节用,这样则获地之赐;扶危定倾,谦卑事之,则与人同道,人可动之。”俚向勾践慨述“越必兴、吴必败”个断言,进谏:“屈身以事吴王,徐图转机。”畀拜为上大夫以后,俚陪同勾践夫妇勒吴国做之三年个奴,“忍以持志,因而砺坚,君后勿悲,臣与共勉!” 三年过后回国,俚搭文种拟定兴越灭吴个办法,是越国“十年生聚,十年教训”个策划者搭组织者。范蠡服侍越王勾践廿几年,成就之越王霸业,畀尊为上将军。

范蠡认为勒自家有功于越王个情况下头,难以久居,“飞鸟尽,良弓藏;狡兔死,走狗烹”。俚晓得勾践搿个人“长颈鸟喙”,可以共患难,难以同安乐,就搭西施一淘泛舟齐国,变姓名为鸱夷子皮,带领倪子搭门徒勒海边浪结庐而居。着力垦荒耕作,兼营副业经商,呣没几年,就积累之数千万家产。俚仗义疏财,施善乡梓,范蠡个能力畀齐王赏识,齐王拿俚请进国都临淄,拜俚为相国。范蠡讲:“居官致于卿相,治家能致千金;对于一个白手起家的布衣来讲,已经到了极点。久受尊名,恐怕不是吉祥的征兆。”三年过后,俚拿相印还畀齐王,散尽家财畀知交搭老乡。

治军思想[编辑]

范蠡个军事宗旨:强则戒骄逸,处安有备;弱则暗图强,待机而动;用兵善乘虚蹈隙,出奇制胜。为后世称道并沿用。范蠡著名个经济思想:“劝农桑,务积穀”、“农末兼营”、“务完物、无息币”、“平粜各物,关市不乏,治国之道也。”、“夏则资皮、冬则资絺、旱则资舟、水则资车,以待乏也。”等到今朝还对现代个经济建设有积极意义。