漴阙
漴阙，现在也写成漴缺，曾用名龙皇、光明，勒拉上海市奉贤区柘林镇搭仔金山区漕泾镇交界处，曾是柘林镇个一座村，也曾是只集镇。嘉庆《松江府志》箇能描述伊：“华亭东南濒海，自柘林堡延袤而西数里为漕泾，中间地势拗入者，是名漴缺。”[1]
1301年，因为宋朝造个里护塘畀海水冲烂脱，故咾从漴缺开始造新个海塘，后人叫伊元大德海塘。1473年，箇段海塘曾全线翻新重新弄过。[2]
因为箇只集镇曾靠近杭州湾，箇面老早也是抗倭前线。嘉靖32年（1553年）十月，一百多名倭寇上岸，勒拉戚木泾、金山卫等地烧杀劫掠[3]，嘉靖33年正月，倭寇又侵略松江府沿海地区[4]。同年农历三月廿七，九十多名倭寇登陆漴阙，冲到松江府城，拿粮仓里向个粮食通通烧脱[5]。1575年五月底，海宁海啸，漴阙海塘决堤，房子畀水冲烂脱，几万人故脱，海水拿田没脱，变成功盐碱地[6]。
1634年，漴缺附近个塘段畀大潮冲开。拿涌水个地方堵牢以后，松江知府方岳贡、华亭知县张调鼎决定改造石海塘，工期一年，箇是上海头一趟出现料石塘。1640年，料石塘段两面个土塘又畀海冲烂脱，故咾石塘往两面延伸[2]。
1684年，江海关一开始设置拉箇埭[7]，后些来因为房子狭，两年后搬到上海县去哉。
1726年，造捍海石塘，西到漴缺，东到堰墩湾。
1937年11月，日军登陆金山卫，王子隆个部队反抗，让漴阙呒没畀烧脱。日军占领上海，经常抢物事，贼骨头也出来哉，老百姓侪逃出去，只挺穷人家还憕拉迭头。1950年，以梅林泾为界，箇头划进奉贤县胡桥乡，后些来併进柘林镇。箇面也曾变成功奉贤县海滨医院，专门治疗麻风病、传染性肝炎个病人[8]。
参见
[编辑]参考来源
[编辑]- ↑ （2007）“地名”，奉贤县续志．方志出版社．ISBN 978-7-80238-174-2．
- ↑ 2.0 2.1 （1987）“历代海塘”，奉贤县志．上海：上海人民出版社．ISBN 7-208-00027-1．於2018-09-21参阅． 档案，存勒互联网档案馆当中。（2016年3月27号）
- ↑ 《嘉靖东南平倭通录》：“倭贼百余由华亭县漴缺登岸，流劫戚木泾、金山卫等处。”
- ↑ 《倭变事略》：“春正月，倭寇入松江沿海地方。”
- ↑ “《金山倭变小志》：“春三月二十七日，贼九十余人自漴阙登岸焚舟内攻，直抵郡南门，焚烧海艘仓粮，千户童元、巡检李丛禄战死。贼从干巷转浦南去。”
- ↑ （1997）“大事记”，上海水利志．上海：上海社会科学院出版社．ISBN 7-80618-380-9． 档案，存勒互联网档案馆当中。（2018年1月18号）
- ↑ 嘉庆《松江府志》、同治《上海县志》等：“关使初驻漴阙。”
- ↑ （1987）“历史集市”，奉贤县志．上海人民出版社．ISBN 7-208-00027-1．於2018-09-23参阅． 档案，存勒互联网档案馆当中。（2016年3月27号）