江杨北路站
江杨北路站勒垃上海宝山区江杨北路绥化路，是上海轨道交通3号线个地面侧式车站、北面隻终点站，3号线、4号线共用个江杨北路车辆基地（宝钢车辆段）西面。
设计规划
[编辑]3号线北延伸早期规划里向呒没箇站个，北端终点附近线路走向经过比较，确定是沿咾同济路—富锦路跑个，对外运营部分到铁力路站就结束哉，铁力路站望西是出入库线[1]。必过勒垃宝钢车辆段设计个辰光，决定拿原设计里向畀职工上下班用个简易站台扩展成一座正式车站，拿车辆段里向个部分线路改成运营正线，箇就是现在个江杨北路站[2]。
车站结构
[编辑]侧式月台2面2线地面车站。虽然箇站有两隻站台，列车用个是站前折返方式，一般性只勒垃南面隻站台上下车。原先江杨北路车辆基地只有正线北面隻停车库，进出库线路亦接勒正线北面，故咾出入库列车常停勒北面隻闲置站台里向；随咾车辆基地扩建正线南面隻停车库，2015年2月16号到28号，车站临时停运[3]，调整线路布置，接进新车库，勒垃正线南面新增一道“第三线”[4][5]。
第三线勒垃实际建设个辰光，因为工程原因比原设计短一截，开通以後因为信号系统里向个长度帮实际弗一样，导致过箇隻股道个列车三天两头畀信号系统扣停。但是呢，阿尔斯通对U200信号系统维护少，印度方面[註 1]更新软件多埭也解决弗了，运营方只好修改实地轨道电路个位置来解决问题[7]。
| 地面层 | ||
| █ 3号线 备用站台 | ||
| █ 3号线 往上海南站方向（铁力路） | 
| |
| 站厅 | 1号出口、票务服务、自动售票机、人工服务台 | |
|
车站出口
[编辑]
江杨北路站个出口勒垃站厅南面，有得无障碍坡道。
接驳换乘情况
[编辑]江杨北路地铁站开通仔么，因为配套交通弗方便，车站周边有较多非法营运车辆（“黑车”）[8]。2008年7月份，车站南侧造出来江杨北路综合交通枢纽开工，有多座公交站台搭仔P+R停车场，2009年10月份基本完工[9]，必过到2010年5月底纔正式交付畀公交公司，公交枢纽开通运营[10]，配套个P+R停车场继续闲置到2016年2月份纔对外开放[11][12]。虽然公交枢纽开通仔么，公交部门新开仔几条线路，因为班次少、呒没覆盖月浦农村，黑车还是莫牢牢止[13][14]。
江杨北路P+R停车场有96隻停车位，工作日脚基本浪向好停满，日均周转率（停车辆次比泊位数量）约1.04，也就是平均每日天有100部车子停进来[15]。
注释
[编辑]- ↑ 3、4号线开通个辰光全线用Alstom U200信号系统，箇系统大部分客户集中勒印度城市轨道交通系统，故咾2014年阿尔斯通拿箇系统业务转移畀印度方面。後来3、4号线信号改造，因为箇技术能力忒推板，运营方决定彻底废弃整隻现有U200系统[6]。
参考资料
[编辑]- ↑ 夏则爱; 冯菁; 王宝辉. 上海轨道明珠线北延伸线友谊路以北走向探讨. 中国市政工程. 2002, (03): 59–62.
- ↑ 胡建忠; 蔡俊; 朱捷. 明珠线宝钢车辆段设计的探索与实践. 地铁与轻轨. 2003, (03): 33–37.
- ↑ 维保公司各专业开展3号线江杨北路车辆段改扩建工程. 访问日脚2015-02-17.
- ↑ 成正波; 张亮. 江杨北路站改后运营能力分析. 铁道通信信号. 2015, 51 (08): 86–89. doi:10.13879/j.issn1000-7458.2015-08.15150.
- ↑ 张也萌. 上海轨道交通3、4号线车辆基地扩建方案研究. 铁道标准设计. 2014, 58 (12): 133–138. doi:10.13238/j.issn.1004-2954.2014.12.032.
- ↑ 陈思维. 上海轨道交通3、4号线信号系统改造方案研究. 城市轨道交通研究. 2021, 24 (07): 148–153. doi:10.16037/j.1007-869x.2021.07.032.
- ↑ 王军. 轨道交通线路岔区列车位落码故障分析及处理. 隧道与轨道交通. 2022, (04): 52–54+68. doi:10.13547/j.cnki.dxgcysd.2022.04.008.
- ↑ 孙云 (2007-08-09). "地铁+5元摩的=出行捷径？". 新民晚报.
- ↑ 印嘉珍 (2010-02-22). "取缔钓鱼执法，上海查获黑车骤降九成". 民主与法制时报: p. B07.
- ↑ 江杨北路等三个综合客运交通枢纽建成并开通运营 (2010-05-28).[链接坏脱]
- ↑ 朱昊; 冯淑媛; 刘涛. 上海停车换乘系统发展状况评估和推广应用建议. 交通与运输(学术版). 2012, (01): 95–98.
- ↑ 李继成 (2016-02-16). "上海公共换乘停车场增至13家，车位逾4000个". 澎湃新闻.
- ↑ 余海漪. 基于政策工具视角的城市黑车治理模式的研究, 硕士 thesis. 复旦大学. 2014.
- ↑ 张欣平 (2017-01-19). "沪多部门开展联合执法 轨交3号线站点8辆“黑车”被端". 新民晚报.
- ↑ 喻军皓. 上海市P+R停车场库发展策略研究//中国城市规划学会城市交通规划学术委员会.创新驱动与智慧发展——2018年中国城市交通规划年会论文集. 上海市交通港航发展研究中心交通规划研究所. 2301–2315. 2018.
