正广和汽水厂

正广和汽水厂，是上海市优秀历史建筑之一，来勒上海市杨浦区通北路400号。正广和汽水厂是英国商人来勒1892年造个，1921年搬到现在箇只地方（也有讲是1923年搬厂，1935年完工个）。1930年代，箇只厂是中国顶大个汽水厂，几乎完全控制中国个汽水销售，叫“汽水大王”。抗日战争里向，汽水厂畀日本人占领，厂房损坏严重，呒办法维持生产；战后，汽水厂跟华商建立合作关系，恢复生产。中国共产党控制上海以后，正广和汽水厂来勒1954年7月份由上海市地方工业局代管，改名正广和汽水公司，1966年因文化大革命改名上海汽水厂，1992年（貤有讲是1997年）才恢复原名。汽水厂个产品来勒改革开放初期还有知名度，必过后些来市场占比下降。

厂址里向有一座六层建筑，是公和洋行设计个，花仔白银1.5万两，占地1,321平方米，建筑面积7,000余平方米，高22米，重1.2万吨，现代主义建筑风格，钢筋混凝土框架结构。造好以后是汽水仓库。1996年，建筑畀改成办公楼。2013年，汽水厂地块开发，建筑畀整体顶升，向西北方向平移38米。正广和汽水厂来勒1999年成为第三批上海市优秀历史建筑，2004年成为第一批杨浦区登记不可移动文物。